އެމްއޭސީއެލްގެ މުވައްޒަފުންނަށް ޑޮލަރުން ދެމުންދާ އިނާޔާތްތަކަށް އުނިކަމެއް ނާންނާނެ ކަމުގެ ޔަގީންކަން ދީފި

ރާއްޖެއަށް ދިމާވެފައިވާ ޑޮލަރުގެ ދަތިތަކާއި އެކު ސަރުކާރުން ބޮޑެތި ފިޔަވަޅުތަކެއް އަޅަމުން އައި ނަމަވެސް އެކަމުގެ އެއްވެސް ދަތިކަމެއްް އެމްއޭސީއެލްގެ މުވައްޒަފުންނަށް ދިމާނުވާނެ ކަމަށް އެކުންފުނިން ބުނެފި އެވެ.

ރާއްޖޭގެ އެންމެ ބޮޑު އެއް ކުންފުނި ކަމަށްވާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް, އެމްއޭސީއެލްއަކީ އެކުންފުނީގެ މުވައްޒަފުންނަށް ކޮންމެ މަހަކުވެސް ކަނޑައެޅިފައިވާ މުސާރައިގެ ވަކި އިންސައްތައެއް ޑޮލަރުން މުސާރަ ގޮތުގައި ދެމުންދާ ކުންފުންޏެވެ. ރާއްޖޭގައި ޑޮލަރުގެ ދަތިކަން ބޮޑުވެ ސަރުކާރުން ބޮޑެތި ފިޔަވަޅުތަކެއް އަޅަން ފެށުމާއި އެކު އެމްއޭސީއެލްގެ މުވައްޒަފުންނަށް ޑޮލަރުން ދެމުންދާ މުސާރަ ކަނޑާލަފާނެ ކަމުގެ ބިރު އޮތީ ހީވެފައި އެވެ.

ނަމަވެސް އެކުންފުނީގެ މެނޭޖިންގ ޑިރެކްޓަރު އިބްރާހިމް ޝަރީފް މުހައްމަދު މިއަދު ކުންފުނީގެ މުވައްޒަފުންނަށް ފޮނުއްވި މެމޯއެއްގައި ވަނީ ރާއްޖެއަށް ކުރިމަތިވެފައިވާ މާލީ ހާލަތުން އަރައިގަތުމަށް ކުރަމުންދާ ގެންދާ މަސައްކަތްތަކާ ގުޅިގެން އެކުންފުނީގެ މުވައްޒަފުންނަށް ދެމުންގެންދާ އެއްވެސް އިނާޔަތްތަކަށް ( ޑޮލަރުގެ އެހީ ހިމެނޭހެން ) އުނިކަމެއް ނާންނާނެ ކަމުގެ ޔަގީންކަން ދީފައި އެވެ.

އެގޮތުން މެމޯގައި ވިދާޅުވީ އެފަދަ ބަދަލުތަކެއް އައިސްފާނެ ތޯ މުވައްޒަފުން ކުރަމުންދިޔަ ސުވާލުތަކާއި އެކު އެކަމާއި ގުޅިގެން ރާއްޖޭގެ އިއްޒަތްތެރި ރައީސުލްޖުމްހުރިއްޔާއާއި އެކަމާއި ގުޅޭގޮތުން ވަރަށް ފުޅާ ދާއިރާއެއްގައި މަޝްވަރާކޮށްފައިވާ ކަމަށެވެ. މި މަޝްވަރާގައި އެމްއޭސީއެލްގެ މުވައްޒަފުންނަކީ ވަރަށް މުޖިންމު މަސައްކަތްތަކެއް ބުރަކޮށް ކުރަމުން ގެންދާ މުވައްޒަފުންތަކެއް ކަމަށް ރައީސް ފާހަގަކުރެއްވި ކަމަށާއި އެމްއޭސީއެލްއަކީ ރައީސް ވަރަށް އިސްކަން ދެއްވާ ތަނެއް ކަމަށާއި އެމްއޭސީއެލްގެ މުވައްޒުން ރާއްޖޭގެ އިގުތިސާދަށް ކުރަމުންދާ ހިދުމަތްތައް ޝުކުރުވެރިކަމާއި އެކު ބަލައިގަންނަ ކަމުގައި ވިދާޅުވި ކަމަށް އެމްޑީގެ މެމޯގައި ވަނީ ފާހަގަކޮށްފައެވެ.

އަދި ކުންފުނީގެ މުވައްޒަފަކަށް ލިބޭ އެއްވެސް އިނާޔަތެއް އުނިނުކުރައްވާނެ ކަމުގެ ފުރިހަމަ ޔަގީނަކްކަން ރައީސް ދެއްވި ކަމަށްވެސް އެމްޑީ ވިދާޅުވިއެވެ.