ވޭޕް މަނާ ކުރަން ނިންމުމުން ޑަބްލިއުއެޗްއޯގެ މަރުހަބާ!

ރާއްޖޭގައި ވޭޕް މަނާކުރަން ނިންމި ނިންމުމަށް ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ) އިން މަރުހަބާ ވިދާޅުވެއްޖެ އެވެ.

ޑަބްލިއުއެޗްއޯ ސައުތް އީސްޓް އޭޝިއާ އިން ބުނީ, ރާއްޖޭގައި ޒުވާން އުމުރުގެ ކުދިންގެ މެދުގައި ކަންބޮޑުވާ މިންވަރަށް ވޭޕްކުރުން އިތުރުވެފައިވާ މި ދަނޑިވަޅުގައި ސަރުކާރުން ވޭޕް މަނާކުރުމަށް ނިންމި ނިންމުމަށް މަރުހާބާ ކިޔާ ކަމަށެވެ.

އެ އިދާރާއިން ބުނެފައިވަނީ, 2019 ވަނަ އަހަރުގެ ގްލޯބަލް ޔޫތު ޓޮބެކޯ ސާވޭއިން ދައްކާ ގޮތުގައި ރާއްޖޭގައި 13 އަހަރާއި 15 އަހަރާ ދެމެދުގެ 23.1 އިންސައްތަ ފިރިހެން ކުދިންނާއި 10.7 އިންސައްތަ އަންހެން ކުދިން އީ ސިނގިރޭޓް ނުވަތަ ވޭޕް ބޭނުންކޮށްފައިވާ ކަމަށެވެ.

ދުންފަތުގެ އިސްތިއުމާލު ކުރުމުގެ ހުރިހާ ވައްތަރަކީ ވެސް ގެއްލުންހުރި އަދި ކެންސަރާއި ހިތުގެ ބަލިތަކާއި ފުއްޕާމޭގެ ދާއިމީ ބަލިތަކާއި ހަކުރު ބަލި ފަދަ ގައިންގަޔަށް ނާރާ ބަލިތަކަށް ހުށަހެޅޭ ނުރައްކާ ބޮޑު ކަމެއް ކަމަށް އެއިދާރާއިން ބުނެފައިވެއެވެ.

ރާއްޖޭގައި ވޭޕް ބޭނުންކުރުމާއި ވިއްކުމާއި ގެންގުޅުން މަނާކުރުމަށްވެސް ސަރުކާރުން ވަނީ ނިންމާފައެވެ. އެގޮތުން ނޮވެމްބަރު 15ވަނަ ދުވަހުން ފެށީގެން ރާއްޖެއަށް ވޭޕް އެތެރެކުރުން މަނާކޮށް ޑިސެމްބަރު 15 އިން ފެށިގެން ވޭޕް ބޭނުން ކުރުމާއި ގެންގުޅުމާއި އުފެއްދުމާއި ވިއްކުމާއި އިޝްތިހާރު ކުރުން މަނާކުރުމަށް ސަރުކާރުން ވަނީ ނިންމާފައެވެ. މީގެ އިތުރުންވެސް ސިނގިރޭޓާއި ދުނަފަތުގެ އެހެނިހެން ބާވަތްތަކުން ނަގާ ޑިއުޓީވެސް ބޮޑުކުރުމަށް ސަރުކާރުން ވަނީ ނިންމާފައެވެ.