ޔަހޫދީން ހުއްޓުމެއްނެތި ދެމުންދާ ހަމަލާތަކާއި އެކު ލުބުނާނުގެ ދިރާސީ އާއަހަރުގެ ކިޔެވުން ފަށާ ތާރީހު ފަސްކޮށްފި

ޔަހޫދީ އިޒްރޭލުން ހުއްޓުމެއްނެތި ދެމުންދާ ހަމަލާތަކާއި އެކު ލުބުނާނުގެ ދިރާސީ އާއަހަރުގެ ކިޔެވުން ފަށާ ތާރީހު ފަސްކޮށްފި އެވެ.

ލުބްނާނުގެ އެޑިއުކޭޝަން މިނިސްޓަރު ވިދާޅުވީ އެ ގައުމުން ސްކޫލް އަހަރު ފެށުން ފަސްކުރަން އެގައުމުގެ ސަރުކާރުން ނިންމާފައިވާ ކަމަށެވެ.

އައްބާސް ހަލަބީ ވިދާޅުވީ އެއް މިލިއަނަށް ވުރެ ގިނަ ދަރިވަރުން ކިޔެވުން ފަށަން އޮތް ތާރީހު ފަސްކުރީ އެއްމަހުގެ މުއްދަތަކަށް ކަމަށާއި އާ ތާރީހަކީ ނޮވެމްބަރު 4 ކަމަށެވެ.

އަދި މި ނިންމުން ނިންމާފައިވަނީ "ސެކިއުރިޓީ ރިސްކް"ތަކަށް ބެލުމަށް ފަހުގައި ކަމަށެވެ.

ލުބުނާނުގެ ދައުލަތުގެ ނޭޝަނަލް ނިއުސް އެޖެންސީން ޝާއިއުކޮށްފައިވާ މައުލޫމާތަށް ބަލާއިރު, އަމިއްލަ ޔުނިވާސިޓީތަކުގެ ކިޔެވުން މާދަމާ ފަށައިގަނެވޭނީ އެޔުނިވާސިޓީތަކުން ހާލަތަށް ރިޔާއަތް ކުރުމަށް ފަހުގައި އެވެ.

ލުބުނާނަށް އަމާޒުކޮށް ޔަހޫދީން މިިދިޔަ މަހު ވަނީ ވަރުގަދަ ހަމަލާތަކެއް ދޭން ފަށާފައި އެވެ. ހަމަލާތަކުގެ އާމަޒަކީ ހިޒްބުالله ކަން ޔަހޫދީން ހާމަކުރި ނަމަވެސް ހަމަލާތަކުގައި ގިނަ އަދަދެއް ކުޑަކުދިންނާއި ދަރިވަރުން ވަނީ ޝަހީދުވެފައި އެވެ. އަދި ލުބުނާނުގެ ދެ ލައްކައަށްވުރެ ގިނަ ރައްޔިތުން ވަނީ މިހާރުވެސް އެގައުމާއި ކައިރި އެހެން ގައުމުތަކަށް ހިޖުރަ ކޮށްފަކަން އދ އިން ވެސް ވަނީ ހާމަކޮށްފައެވެ.