ވޭޕް މަނާކުރަން ގައުމީ ކުޅިވަރު ޖަމިއްޔާތަކުން ގޮވާލައިފި

ވޭޕް އަދި އީ ސިނގިރޭޓް ރާއްޖެ އެތެރެކުރުމާއި, ބޭނުންކުރުމާއި, ވިޔަފާރިކުރުމާއި ގެންގުޅުން މަނާކުރުމަށް 21 ގައުމީ ކުޅިވަރު ޖަމިއްޔާތަކުން ގޮވާލައިފި އެވެ.

ގައުމީ 21 ކުޅިވަރު ޖަމިއްޔާއިން ގުޅިގެން ނެރުނު ބަޔާނުގައި ބުނެފައިވަނީ, ދިވެހި ކުޅުންތެރިންނާއި، ތަމްރީނުދޭ ފަރާތްތަކުގެ މެދުގައި ވޭޕް އަދި އީ-ސިނގިރޭޓް ބޭނުންކުރުން ކަންބޮޑުވާމިންވަރަކަށް އިތުރުވަމުން އަންނަ ކަމަށެވެ.

މިކަމުގެ ސަބަބުން ކުޅުންތެރިންގެ ފުއްޕާމެއަށް ދިމާވާ ސިއްހީ އެކިއެކި މައްސަލަތަކާއި، ނޭދެވޭ އަސަރުތަކުގެ ސަބަބުން ކުޅުންތެރިންގެ ފާފޯމެންސް ދަށްވެ، ކުރިއެރުމަށް ހުރަސްއެޅި، ދުޅަހެޔޮކަން ގެއްލި، ކުޅިވަރު ކުޅުމާ ދުރަށްދާކަން ފާހަގަކުރެވޭ ކަމަށް އެބަޔާނުގައި ބުނެފައިވެއެވެ.

މިކަމަކީ ރާއްޖޭގެ ކުޅިވަރާއި، ދުޅަހެޔޮކަން ޕްރޮމޯޓް ކުރުމަށް ސަރުކާރުންނާއި މަދަނީ ފަރާތްތަކުން ކުރާ މަސައްކަތަށް ހުރި ބޮޑު ގޮންޖެހުމެއް ކަމަށާއި އަދި މިކަން ވެފައިވަނީ ބައިނަލްއަގުވާމީ ކުޅިވަރުގެ މައިދާނުގައި ދިވެހިން ދެކެން ބޭނުންވާ ރަން ވަނަތަށް ހާސިލުކުރަން އެޅިފައިވާ ހުރަހަކަށް ކަމަށްވެސް އެބަޔާނުގައި ބުނެފައިވެއެވެ.

ދުނިޔޭގެ ބައެއް ގައުމުތަކާއި އަދި ރާއްޖޭގެ އަވަށްޓެރި ބައެއް ގައުމުތަކުގައި ވެސް ވޭޕް އަދި އީ ސިނގިރޭޓް މަނާކޮށްފައިވާކަން ފާހަގަކޮށް އެބަޔާނުގައި ވަނީ, މިކަން ހައްސާސް މައްސަލައެއްގެ ގޮތުގައި ބަލައިގަނެ މިކަމަށް އަވަސް ފިޔަވަޅުތަކެއް އަޅައިދިނުމަށް ގޮވާލާފައެވެ.