ރާއްޖެއާއި ސައުދީއާ ދެމެދު ވިޔަފާރި އާއި އިގްތިސާދީ ދާއިރާއާއި ގުޅޭ އެއްބަސްވުމެއްގައި ސޮއިކޮށްފި

ދިވެހިރާއްޖެއާއި ސަޢޫދީ ޢަރަބިއްޔާއާ ދެމެދު، ވިޔަފާރިއާއި އިޤްތިޞާދީ ދާއިރާއިން އެއް ބާރުލުން އިތުރުކޮށް، ދެ ޤައުމުގެ ގުޅުން ބަދަހިކުރުމަށްޓަކައި އެމްއޯޔޫއެއްގައި ސޮއިކޮށްފި އެވެ.

މި އެމްއޯޔޫގައި ސޮއިކޮށްފައިވަނީ، މިނިސްޓަރ އޮފް އިކޮނޮމިކް ޑިވެލޮޕްމަންޓް އަލްފާޟިލް މުޙައްމަދު ސަޢީދު ރިޔާދަށް ކުރެއްވި ރަސްމީ ދަތުރުފުޅެއްގައެވެ.

މި އެމްއޯޔޫގައި ދިވެހި ސަރުކާރުގެ ފަރާތުން ސޮއިކުރެއްވީ އިކޮނޮމިކް މިނިސްޓަރ މުޙައްމަދު ސަޢީދެވެ. ސަޢޫދީ ޢަރަބިއްޔާގެ ފަރާތުން ސޮއިކުރެއްވީ، މިނިސްޓަރ އޮފް ކޮމަރސް އަދި ޖެނެރަލް އޮތޯރިޓީ އޮފް ފޮރިން ޓްރޭޑްގެ ބޯޑް ޗެއާރމަން، ޑރ. މާޖިދު ބިން އަބްދުالله އަލްޤަސަބީއެވެ.

އެކޮނޮމިކް މިނިސްޓްރީން ބުނީ މި އެމްއޯޔޫގެ ސަބަބުން، ދެ ޤައުމު ދެމެދު ވިޔަފާރީގެ ގުޅުން ހަރުދަނާކުރެވި، ބޯޑަރ ހުރަސްކޮށް ކުރެވޭ ފޮރިން އިންވެސްޓްމަންޓްތައް އިތުރަށް ފުޅާ ކުރުމަށް މަގުފަހި ވެގެންދާނެ ކަމަށެވެ. މީގެ އިތުރުން، ވިޔަފާރިއާއި ފަތުރުވެރިކަން، އަދި އިމާރާތް ކުރުން ފަދަ މުހިންމު ދާއިރާތަކުން ދެގައުމު ދެމެދު ގުޅުން އިތުރަށް ބަދަހިވެގެންދާނެ ކަމަށެވެ..

ސަޢޫދީ އަރަބިއްޔާގެ މިނިސްޓަރ އޮފް ކޮމަރސް އަދި ޖެނެރަލް އޮތޯރިޓީ އޮފް ފޮރިން ޓްރޭޑްގެ ބޯޑް ޗެއާރމަން، ޑރ. މާޖިދު އަދި ސަޢޫދީ އަރަބިއްޔާގެ ސަރުކާރުން ދިވެހިރާއްޖޭގެ ތަރައްޤީއާއި ކުރިއެރުމަށް ދެއްވަމުން ގެންދަވާ އަހަމިއްޔަތުކަމާއި، ބށއްވަވާ ގާތް ގުޅުން ފާހަގަ ކުރައްވައި، އެކަމަށް މިނިސްޓަރ ސަޢީދު ޝުކުރު އަދާކުރައްވާފައި ވެއެވެ.

އަދި ސޮއިކުރި އެމްއޯޔޫއަކީ، ދެ ޤައުމު ދެމެދު ޒަމާނުއްސުރެ ޤާއިމް ކުރެވިފައިވާ ގާތް ގުޅުމުގެ ރަމްޒެއް ކަމުގަޔާއި، މި އެމްއޯޔޫގެ އެހީގައި، ރައީސް ޑރ. މުޙައްމަދު މުޢިއްޒުގެ ދުރުރާސްތާ އިޤްތިޞާދީ ވިސްނުންފުޅު ހާސިލްކުރުމަށް އިތުރުބާރަކަށް މިކަން ވެގެންދާނެކަން ފާހަގަކުރެއްވިއެވެ.

ދިވެހިރާއްޖެއާއި ސަޢުދީ ޢަރަބިއްޔާއަކީ، ޒަމާނުއްސުރެ ޚާރިޖީ އަދި އިޤްތިޞާދީ ގޮތުން ގާތް ގުޅުމެއް ގާއިމް ކުރެވިފައިވާ ދެ ގައުމެވެ.

މިނިސްޓްރީން ބުނީ މި އެއްބަސްވުމުގެ ސަބަބުން، މި ގުޅުން އިތުރަށް ހަރުދަނާކުރެވި، ކުރިއަށްއޮތް ތަނުގައި ވިޔަފާރި އަދި އިޤްތިސާދީ ދާއިރާއިން އިތުރު މަސައްކަތްތައް ކުރުމަށް މަގުފަހިވެ، ވިޔަފާރިތަކަށް އިތުރު ފުރުޞަތުތައް ހުޅުވިގެންދާނެއެވެ.