ތިނަދޫއިން ކޯންޑިޝަނަލް ގޯތި ދިނުން ހުއްޓުވައި ދިނުމަށް ވަގުތީ އަމުރަކަށް އެދެފި

ތިނަދޫ ސިޓީން ކޮންޑިޝަނަލް ގޯތި ދިނުމަށް އެރަށު ކައުންސިލުން ތައްޔާރުވަމުންދަނިކޮށް އެކަން ހުއްޓުވައި ދިނުމަށް އަމުރަކަށް އެދި ތިނަދޫ މެޖިސްޓްރޭޓް ކޯޓަށް މައްސަލައެއް ހުށަހަޅަފައިފި އެވެ.

އިތުބާރު ހުރި މަސްދަރަކުން މައުލޫމާތު ދިން ގޮތުގައި އަމިއްލަ ފަރާތަކުން މިއަދު ތިނަދޫ ކޯޓަށް ވަގުތީ އަމުރަކަށް އެދި ހުށަހެޅި މައްސަލަ ކޯޓުން މިއަދު މެންދުރު ވަނީ ބަލައިގެންފައި އެވެ.

އެގޮތުން މައްސަލަ ހުށަހެޅި ފަރާތުން ހުށަހަޅާފައިވަނީ ތިނަދޫ ސިޓީ ކައުންސިލްގެ އިދާރާއިން ކޮންޑިޝަނަލް ގޯތި ދިނުމަށް ކަމާބެހޭ ފަރާތްތަކާއި މަޝްވަރާ ނުކޮށް އަދި އެފަރާތްތަކުން ހުއްދަ ނުހޯދާއި ދިވެހިރާއްޖޭގެ ހެދުފައުވާ ގަނޫނުތަކާއި ގަވާއިދުތަކާއި ހިލާފަށް އަދު އިންސާފުން އެއްކިބާވެ މާލީ ތަނަވަސްކަން ނެތް ފަރާތްތަކަށް ގޯތި ދިނުމަށް ޕޮއިންޓް އިތުރުވާގޮތަށް ގަވާއިދެއް ހަދައި 415/415/104,60/UL ގެ ދަށުން ގޯއްޗަށް އެދުމުން ޝަރުތުހަމަވާ ގިނަ ރައްޔިތުން ގޯތި ލިބުމުން މަހްރޫމުވެފައިވާތީ އާއި މައްސަލަ ހުށަހެޅި ފަރާތްވެސް ހިމެނޭތީ ތިނަދޫ ސިޓީން ކޮންޑިޝަނަލް ގޯތި ދިނުން ހުއްޓުވައި ދިނުމަށް އެދި ކައުންސިލްގެ އިދާރާގެ މައްޗަށް ކޯޓުން އަމުރެއް ނެރެދިނުމަށެވެ.

މިފަދަ އަމުރަކަށް އެދެފައިވާ އިރު ތިނަދޫއިން ދޫކުރާ ގޯތިތައް ލިބޭ މީހުންގެ މެދުގައި ގުރުއަތުލުން އަންނަ އާދިއްތަ ދުވަހު ބާއްވަން ވަނީ ކައުންސިލުން ތާވަލުކޮށްފައެވެ.

ދެކުނުގައި އާބާދީ އެންމެ ބޮޑު އެއް ރަށް ކަމަށްވާ ތިނަދޫން ދިރިއުޅުމަށްޓަކައި 200 ގޯތި ދޫކުރަން ވަނީ ނިންމައިފަ އެވެ. އެ ގޯތިތަކަށް އިއުލާންކުރީ މިދިޔަ އަހަރުގެ އޭޕްރީލްގަ އެވެ. އޭގެ ތެރޭގައި ތިނަދޫ ރައްޔިތުންނަށާއި ދަފްތަރު ހިމެނޭ މީހުންނަށާއި ރަށުން ބޭރު މީހުންނަށާއި އެކަނިވެރި މައިންނާއި ބަފައިންނަށާއި ތިނަދޫގައި ވިޔަފާރިކުރާ ރަށުން ބޭރު މީހުންނަށާއި ޕްރޮފެޝަނަލް ދާއިރާއިން ހިދުމަތްދޭ މީހުންނަށް ދިނުމަށް ކަނޑައަޅާފައިވާ ގޯތިތައް ހިމެނެ އެވެ.

އެއީ 1،500-2،000 އަކަފޫޓުގެ ގޯތިތަކެވެ.