ތިނަދޫގެ ސަގާފީ އީދު ދައްކުވައިދޭ ލަވައެއް: އާދަކާދަ ދިރުވުމަށް އާ އުއްމީދެއް!

ތިނަދޫ ސިޓީގެ ހުނަރުވެރި ސްޓޫޑިއޯތަކުން ތިނަދޫގެ ސަގާފީ އީދު ފާހަގަކުރާ ގޮތް އަދުގެ ޖީލަށް އަލުން ދައްކާލައިފި އެވެ.

"ކުރިއޭ ދެ އީދުގެ ހަނދާން" ނަމުގައި މިރޭ މީސް މީޑީއާ ޕްލެޓްފޯމުތަކަށް ނެރުނު ޚައްސަ ލަވައަކީ ތިނަދޫގެ ގިނަ ލަވަތަކެއް ނެރެފެިފައިވާ ބުންނަރު ސްޓޫޑިއޯ، ޗައްޕަލާ ސްޓޫޑިއޯ، ސްޓޫޑިއޯ 33 އަދި ފޮޓޯ މޯލްޑިވްސްގެ އުފެއްދުމެެކެވެ.

މި ލަވައިގެ ޅެން ލިޔުއްވާފައިވަނީ ރާއްޖޭގެ މަޝްހޫރު ޅެންވެރިޔާ އަބްދުﷲ އަފީފެވެ. އަފީފްގެ ޅެންތަކުގައި ހުންނަ ފުންމިނާއި މާނަތަކުގެ ސަބަބުން މި ލަވައަށް އިތުރު ފުރިހަމަކަމެއް ލިބިފައިވާކަން ފާހަގަކުރެވެއެވެ. އަދި މި ލަވަ ކިޔާފައިވަނީ މުހައްމަދު ޒަލީފް، ރަފާ ކާމިލް އަދި މުހައްމަދު ޝަފީގްއެވެ.

މި ލަވައިގެ ވީޑިއޯއިން ފެންނަނީ އިހުގައި ތިނަދޫގައި އީދު ފާހަގަކުރަމުން އައި ސަގާފީ ގޮތްތަކެވެ. އެގޮތުން އީދު މަޅި، ވަޅެ ނޮންޓާ، ހިފަނެ ބޮޑިއާ އަދި ފޯޅި ދަންޑާ ފަދަ އިހުގެ ކުޅިވަރުތައް ކުޅުނު ގޮތް މި ލަވައިގައި ވަނީ ދައްކާލާފައި އެވެ. މިލަވައިގެ ވީޑިއޯއިން ތިނަދޫގެ އެކި އުމުރުފުރާގެ މީހުން ފެނިގެންދާއިރު ޚާއްޞަކޮށް ދޮށީ އުމުރުގެ މީހުންނާއި ޒުވާނުން އެކުގައި ފެނުމުން ޖީލުތަކުގެ ގުޅުން މިލަވައިން ރަމްޒުކޮށްދެއެވެ.

މި ލަވައިގެ ޕްރޮޑަކްޝަން ޓީމުން ބުނާ ގޮތުގައި މި ލަވައިގެ މަޤްޞަދަކީ ތިނަދޫގެ އިހުގެ ސަގާފަތާއި އާދަކާދަތައް ދިރުވައި އާލާކުރުމާއި، ޒުވާން ޖީލަށް މި ކަންކަން ގެންދިޔުމެވެ.

މި ލަވަ މީސް މިޑިއާއަށް ދޫކޮށްލިތާ ކުޑައިރުކޮޅެއްގެ ތެރޭގައި ގިނަ ބަޔެއްގެ ތަރުހީބު ވަނީ ލިބިފައި އެވެ.

ލަވައިގެ ލިންކު