މެދުއިރުމަތީގެ ހާލަތު ގޯސްވެފައިވާ ދަނޑިވަޅެއްގައި އެމެރިކާއިން ޔޫއޭއީއާއި އެކު ދިފާއީ ގުޅުންތައް ވަރުގަދަކޮށްފި

އެމެރިކާގެ އެހީތެރިކަމާއެކު ޔަހޫދީ އިޒްރޭލުން މެދުއިރުމަތީގައި ވަރުގަދަ ހަނގުރާމައެއް ކުރަމުންދާ ދަނޑިވަޅެއްގައި އެމެރިކާއާއި ޔޫއޭއާއި ދެމެދު ދިފާއީ ގުޅުންތައް އިތުރަށް ވަރުގަދަކުރަން ނިންމައިފި އެވެ.

އެމެރިކާ ސަރުކާރުން ބުނީ ޔުނައިޓެޑް އަރަބް އެމިރޭޓްސް (ޔޫއޭއީ) އަކީ ދިފާއީ ބޮޑު ބައިވެރިއެއްގެ ގޮތުގައި އެމެރިކާގެ ރައީސް ޖޯ ބައިޑަން ގަބޫލުކުރައްވައި، އަސްކަރީ ގުޅުން އިތުރަށް ބަދަހިކުރައްވާފައިވާ ކަމަށެވެ.

ބައިޑަން އާއި ޔޫއޭއީގެ ރައީސް ޝެއިހް މުހައްމަދު ބިން ޒައިދު އަލް ނަހްޔާން ވައިޓް ހައުސްގައި ބޭއްވި ބައްދަލުވުމަށް ފަހު ހޯމަ ދުވަހު މިކަން އިއުލާނު ކުރުމުން ޔޫއޭއީ އަކީ އެމެރިކާގެ ދިފާއީ ބޮޑު ބައިވެރިއެއްގެ މަގާމު ލިބުނު ދެވަނަ ގައުމެވެ. ބައިޑަންގެ ސަރުކާރުން ވަނީ 2021 ވަނަ އަހަރު އިންޑިއާއަކީވެސް އެމެރިކާގެ ދިފާއީ ބައިވެރިއެއްގެ ގޮތުގައި އިއުލާނުކުރައްވާފައި އެވެ.

ވައިޓް ހައުސްއިން ނެރުނު ބަޔާނެއްގައި ބުނީ މި މަގާމުގެ ސަބަބުން މެދުއިރުމައްޗާއި އިރުމަތީ އެފްރިކާ އަދި އިންޑިއާ ކަނޑުގެ ސަރަހައްދުތަކުގެ ދިފާއީ އެއްބާރުލުމާއި ސަލާމަތާއި ރައްކާތެރިކަން އިތުރަށް ބަދަހިވެގެންދާނެ ކަމަށެވެ. އަދި ސަރަހައްދީ ހަމަޖެހުން ދެމެހެއްޓުމުގައި އެމެރިކާ، ޔޫއޭއީ އަދި އިންޑިޔާގެ އަސްކަރީ ބާރުތަކުގެ އިތުރުން އެހެނިހެން އާންމު އަސްކަރީ ބައިވެރިންގެ މެދުގައި ގުޅިގެން ތަމްރީނުދިނުމާއި، ތަމްރީނުތަކާއި، އަސްކަރީ ގޮތުން ގުޅުން ބަދަހިކޮށްގެން، ހީވެސް ނުކުރާ ފަދަ އެއްބާރުލުމެއް ލިބިގެންދާނެ ކަމަށް އެ ބަޔާނުގައި ވެ އެވެ.

ރައީސް ބައިޑަން އާއި ޔޫއޭއީގެ ރައީސް ޝެއިހް މުހައްމަދު ބިން ޒައިދު އަލް ނަހްޔާންގެ ބައްދަލުވުން ބާއްވާފައި މިވަނީ އިސްރާއީލުން ލުބުނާނަށް ދޭ ހަމަލާތައް ވަރުގަދަކޮށްފައިވާ ދަނޑިވަޅެއްގައެވެ. ހިޒްބުالله ގެ އަސްކަރީ އިންފްރާސްޓްރަކްޗާއަށް އަމާޒުކޮށް އިސްރާއީލުން އެ ސަރަހައްދަށް ދިން ހަމަލާތަކުގައި 35 ކުޑަކުދިންނާއެކު 492 މީހުން އިއްޔެ ވަނީ ޝަހީދުވެފައި އެވެ. އަދި ޔަހޫދީން ފަލަސްތީނާއި ދެކޮޅަށް ކުރަމުން އަންނަ ހަނގުރާމަ ވެސް ވަނީ އެމެރިކާގެ އެހީތެރިކަމާއި އެކު ވަރުގަދަ ކޮށްފައެވެ.