ފެނަކަ ޑިޖިޓަލް ކުރުމަށް ކުރާ ދަތުރު: ފެނަކައިގެ އަމިއްލަ ޑިވެލޮޕަރުންގެ ހުނަރުވެރި މަސައްކަތްތަކެއް!

ރާއްޖޭގައި ފެނާއި ނަރުދަމާ އަދި ކަރަންޓުގެ ހިދުމަތް ދެމުން އަންނަ އެންމެ ބޮޑު ކުންފުނި ކަމަށްވާ ފެނަކަ ކޯޕަރޭޝަނުން މިވަނީ އެކުންފުނީގެ ހިދުމަތްތައް އެންމެ ޒަމާނީކޮށް މިއަދު ދުނިޔޭ ހިނގަމުންދާ ޑިޖިޓަލް ދުނިޔޭގެ ތެރެއަށް ވެއްދުމަށް ޚާއްސަ މަސައްކަތްތަކެއް ފަށާފައި އެވެ.

އެގޮތުން މިމަހުގެ 17 ވަނަ ދުވަހު މި މަސައްކަތުގެ މަގު ޗާޓު އިފްތިތާހްކޮށް ބައެއް ހިދުމަތްތައް ވަނީ ޑިޖިޓަލްވެސް ކޮށްފައެވެ. އެކުންފުނީގެ އެމްޑީ މުއާޒް އިފްތިތާހްކުރި ކުންފުނީގެ ޚާއްސަ މަގުޗާޓުގައި ކުންފުނިން ދެމުންދާ ޚިދުމަތްތައް އޮމާންކަމާއެކު، މިހާރަށްވުރެ އަވަސްކޮށް ދިނުމަށް މަގުފަހިވާނެ ތަފާތު އެކި ސޮފްޓެވެއަރތަކާއި ޕޯޓަލްތައް ހިމެނެއެވެ.

މި ޕޯޓަލްތަކަކީ ރާއްޖެއިން ބޭރުގެ ކުންފުނިތަކުން ގަތް ސޮފްޓްވެއާތަކެއް ނޫނެވެ. ނުވަތަ ބޭރުގެ ޑިވެލޮޕަރުންނަށް ދީގެން ފަރުމާ ކުރި ޕޯޓަލްތަކަކާއި ސޮފްޓްވެއާތަކެއް ނޫނެވެ.

ފެނަކަ ދުނިޔެއަށް ލޯހުޅުވިފައިވާ ޑިޖިޓަލް ވަސީލަތްތައް މުއްސަދި ކުންފުންޏަކަށް ކުރާ ދަތުރުގައި އެންމެ ބޮޑު ރޯލެއް އަދާކުރަނީ އެކުންފުނީގެ އަމިއްލަ ހުނަރުވެރި ޑިވެލޮޕަރުންނެވެ. މި މަސައްކަތަށް ކުންފުނީގެ އަމިއްލަ އައިސީޓީ ޑިޕާޓްމެންޓެއް އުފައްދާފައިވާއިރު އެކުންފުނި ޑިޖިޓަލް ކުރުމަށް ކުރާ ހުރިހާ މަސައްކަތެއްގެ ފަހަތުގައި ތިބި އެޑިޕާޓްމެންޓުގެ, ފެނަކައިގެ އަމިއްލަ ޑިވެލޮޕަރުންނެވެ.

ފެނަކައިން މިއަދު އާންމުކުރި ވީޑިއޯއެއްގައި އެކުންފުނީގެ އައިސީޓީ ޑިޕާޓްމެންޓުގެ ޑިރެކްޓަރު މުހައްމަދު ސާމީން ވިދާޅުވީ ފެނަކަ ޖިޑިޓަލް ކުރުމުގެ ވާހަކަ ދެކެވެންފެށީންސުރެ އެންމެ ފުރަތަމަވެސް ވިސްނީ މެނުއަލްކޮށް ކުރަމުން އައި ކަންކަން އޮޓަމޭޓްކޮށް ކުރެވޭނެގޮތަކާމެދުގައި ކަމަށެވެ. އެގޮތުން ބެލި ބެލުމުން އެންމެ ބޮޑު ޗެލެންޖަކަށް ދިމާވީ ރިއަލްޓައިމްކޮށް ބުރާންޗްތަކުން ކުރަމުން އައި ކަންކަން ހެޑް އޮފީހުގެ ސްޓާފުންނާ ހަމައަށް ގެނެވޭނެ ގޮތެއް ހެދުން ކަމަށާއި އެއާއި އެކު ކުންފުނީގެ އިންޖިނިއަރުން ރަށްރަށަށް ފޮނުވައިގެން މަސައްކަތްތައް ފެށި ކަމަށާއި މިހާރު ކުންފުނީގެ ޕްލާންޓުތަކަށް ޚާއްސަ ސޮފްޓްވެއާތައް ފަރުމާކުރެވިފައިވާ ކަމަށް ސާމީން ވިދާޅުވިއެވެ.

ސާމީން ވިދާޅުވީ ކުންފުނީގެ މަސައްކަތްތަކަށް ޑިވެލޮޕްކުރާ ކުރާ ސޮފްޓްވެއާތަކަކީވެސް ކުންފުނީގެ އިންޖިނިއަރުންނާއި ޑިވެލޮޕަރުން އަމިއްލަ އަށް ފަރުމާކުރާ ސޮފްޓްވެއާތަކެއް ކަމަށެވެ. އޭގެ ތެރެއަށް ފަވާ ޖެނެރޭޝަނަށާއި ފެން ޕްލާޓުތަކަށް ޑިވެލޮޕްކުރާ ސޮފްޓްވެއާތަކަކީ މިހާތަނަށް ރާއްޖޭގައި ނެތް ފެންވަރުގެ ބޮޑެތި ސޮފްޓްވެއާތަކެއް ކަމަށެވެ.

ގިރުނބާ ޕޯޓަލްއަކީ ފެނަކަ ޑިޖިޓަލް ކުރުމުގެ މަގުޗާޓުގެ ދަށުން އެކުލަވާލެވި، ބޭނުން ކުރަން ފެށުނު އެންމެ މުހިއްމު ޑިޖިޓަލް ކޮމްޕޮނެންޓެވެ. މިއީ، ފެނަކައިން ރަށްރަށުގައި ދެމުންދާ ޚިދުމަތްތަކާ ގުޅޭ ގިނަ ޑޭޓާތަކެއް ވަގުތުން ވަގުތަށް ރައްކާ ކުރެވި، ރަށްރަށުގައި ޤާއިމްކުރެވިފައިވާ ފެނަކަ އިންޖީނުގެތަކާއި، ފެން ޕްލާންޓުތަކުގެ ޙާލަތު ވަގުތުން ފެންނަގޮތަށް ފަރުމާ ކުރެވިފައިވާ ޕޯޓަލްއެކެވެ. މިއާއެކު ޚިދުމަތްތަކަށް ބުރޫއަރާފާނެ ޙާލަތެއް ދިމާވުމުގެ ކުރިން، ދުރާލާ ތައްޔާރުވެ ފިޔަވަޅުތައް އެޅުމަށް ފުރުސަތު ފަހިވެގެންދާނެ ކަމަށް އެކުންފުނިން ބުނެއެވެ.

ގިރުނބާގެ އިތުރުން، ކުންފުނީގެ އެޗްއާރ މަސައްކަތްތައް ޒަމާނީކޮށް ޑިޖިޓަލައިޒް ކުރުމަށް ޙާއްސަ ސޮފްޓްވެއަރއެއްވެސް ވަނީ ތައާރަފްކޮށްފައެވެ. މި ސޮފްޓްވެއަރއާއެކު، ޗުއްޓީއަށް އެދުމާއި ސަލާމް ބުނުންފަދަ، މުވައްޒަފުންނާ ސީދާ ގުޅުންހުރި ކަންކަމަށް ފަސޭހަތަކެއް ލިބިގެންދާނެއެވެ. މީގެ އިތުރުންވެސް ފެނަކަ ޓެންޑަރ ޕޯޓަލްއާއި، ޓިކެޓިން ސިސްޓަމް، ފިއުލް މެނޭޖްމަންޓް ސިސްޓަމް، މައިފެނަކަ ޕޯޓަލްފަދަ، ކަސްޓަމަރުންނަށް ކުންފުނީގެ ޚިދުމަތްތައް ހޯދުމަށް ފަސޭހަ ވެގެންދާނެ އެތައް ކަމެއް މި މަގުޗާޓުގައި ހިމެނިފައިވެއެވެ.

މީގެތެރެއިން އެޗްއާރ ސިސްޓަމް ފިޔަވައި، ދެން ހުރި ސޮފްޓްވެއަރތަކަކީ، ފެނަކައިގެ ޑިވެލޮޕަރުންނާއި ސޮފްޓްވެއަރ އިންޖިނިއަރުން ތަރައްޤީކުރާ ފެނަކައިގެ އަމިއްލަ ސޮފްޓްވެއަރތަކެކެވެ.

ފެނަކަ ޑިޖިޓަލައިޒް ކުރުމުގެ ދަށުން، ޕަވަރ މޮނިޓަރ ކުރުމަށް ބޭނުންކުރެވޭ ސެންޓްރަލް ސްކާޑާ ސިސްޓަމް ތ އަތޮޅުގައި މިހާރު ވަނީ ބޭނުން ކުރަން ފަށާފައެވެ. އަދި ކުންފުނިން ބޭނުންކުރަމުންދާ ހުރިހާ ކަރަންޓު މީޓަރެެއް ސްމާރޓް މީޓަރަށް ބަދަލުކުރުމުގެ ކުރުމަކީވެސް ފެނަކައިގެ ޑިޖިޓަލް ޕްލޭންގެ ތެރޭގައި ހިމެނޭ ކަމެކެވެ. މި ޕްރޮޖެކްޓްގެ ދަށުން ދ.ކުޑަހުވަދޫގައި ސްމާރޓް މީޓަރު ޤާއިމްކޮށް ރަސްމީކޮށް ޚިދުމަތްދޭން މިހާރު ވަނީ ފެށިފައެވެ. ފެނަކައިގެ އަމާޒަކީ މި މަގުޗާޓުގައި ހުރި ކަންކަން މިއަހަރު ނިމުމުގެ ކުރިން ފުރިހަމަކޮށް ކުންފުނީގެ މަސައްކަތް ޑިޖިޓަލައިޒް ކުރުމެވެ. މިއާއެކު، މުވައްޒަފުންގެ މަސައްކަތްތަކަށާއި ކުންފުނީގެ ޚިދުމަތްތަަކުގެ ސްޕީޑް އަވަސްވެގެންދާނެ ކަމަށް އެކުންފުނިން ބުނެއެވެ.