ލަންކާ ރިޔާސީ އިންތިހާބު : ތާރީހުގައި ފުރަތަމަ ފަހަރަށް ”ދެވަނަ ގުނުމަކަށް“

ސްރީލަންކާ ރިޔާސީ އިންތިހާބުގެ “ދެވަނަ ގުނުމެއް” ބާއްވަން ނިންމައި އެކަން އިލެކްޝަންސް ކޮމިޝަނުން އިއުލާންކޮށްފި އެވެ.

ސްރީ ލަންކާގައި “ދެވަނަ ގުނުމަކަށް” ގޮސްފައިވަނީ އިންތިހާބުގެ ވަގުތީ ނަތީޖާއިން އެއްވެސް ކެންޑިޑޭޓަކަށް 50 އިންސައްތައަށް ވުރެ އިތުރަށް ވޯޓު ލިބިފައިނުވާތީއެވެ.

ލަންކާ އިންތިހާބުގައި ވޯޓުލުމުގައި އަމަލު ކުރަމުން އަންނަ އުސޫލުގައި ވޯޓުލާއިރު އެމީހަކު ބޭނުންވާ 3 ކެންޑިޑޭޓުން ތަރުތީބު ކުރެވެ އެވެ.

ފުރަތަމަ ބުރުގައި 50 އިންސައްތަ އެއްވެސް ކެންޑިޑޭޓަކަށް ނުލިބޭނަމަ، އެންމެ މަތިން ވޯޓު ހޯދާ ދެ ކެންޑިޑޭޓުން ފިޔަވައި ހުރިހާ ކެނޑިޑޭޓުން ބަލިވީ ކަމަށް ނިންމާނެއެވެ. އެއަށްފަހު ބަލިވި ކެންޑިޑޭޓުންގެ ވޯޓުތައް އަލުން ގުނާއިރު، ދެވަނައަށް ހިޔާރުކޮށްފައިވާ ކެންޑިޑޭޓަކީ އެންމެ މަތިން ވޯޓު ލިބުނު ކެންޑިޑޭޓެއް ނަމަ އެ ވޯޓު އެ ކެންޑިޑޭޓަށް ލިބުނު ވޯޓެއް ގޮތުގައި ގުނާނެ އެވެ. އަދި ފުރަތަމަ ހިޔާރު ކުރި 2 ކެންޑިޑޭޓުން ބަލިވެ، 3 ވަނަ ކެންޑިޑޭޓެއްގެ ގޮތުގައި އެންމެ މަތިން ވޯޓު ލިބުނު ކެންޑިޑޭޓަކު ހިމެނޭ ނަމަ އެ ވޯޓެއްވެސް އެ ކެންޑިޑޭޓަށް ލިބުނު ވޯޓެއް ގޮތުގައި ގުނާނެ އެވެ.

ލަންކާ އިންތިހާބުގެ ވަގުތީ ނަތީޖާތައް ދައްކާ ގޮތުގައި، އެންޕީޕީގެ ކެންޑިޑޭޓް އަނޫރާ ކުމާރަ ދިސަނަޔަކެ އަށް ލިބިފައިވަނީ 42.3 އިންސައްތަ ވޯޓެވެ. އަދި އިދިކޮޅު ލީޑަރު، ސަޖިތު ޕްރިމަދާސަ އަށް ލިބިފައިވަނީ 32.7 އިންސައްތަ ވޯޓެވެ.

ލަންކާގެ އިލެކްޝަން އިން މިހާރު ނިންމާފައިވަނީ އެންމެ ގިނަ ވޯޓު ހޯދި މި ދެ ކެންޑިޑޭޓުންގެ ދެމެދުގައި އެގޮތަށް ވޯޓު ގުނުމަށެވެ.