
މާދަމާ ބާއްވާ ލަންކާގެ ރިޔާސީ އިންތިހާބާއި ގުޅިގެން އެގައުމުގައި ދިރިއުޅޭ ދިވެހިން ސަމާލުވުމަށް އިލްތިމާސްކޮށްފި
# ރާއްޖެ - ސްރީލަންކާ--
މާދާމާ އޮންނަ ލަންކާގެ ރިޔާސީ އިންތިހާބާއި ގުޅިގެން އެގައުމުގައި ދިރިއުޅޭ ދިވެހީން ސަމާލުވުމަށް ލަންކާގައި ހުންނަ ރާއްޖޭގެ ހައިކޮމިޝަނުން އިލްތިމާސްކޮށްފި އެވެ.

ހަައިކޮމިޝަންގެ ރަސްމީ އެކްސް އެކައުންޓުން ރޭ ކުރި ޕޯސްޓެއްގައި ބުނެފައިވަނީ 21 ސެޕްޓެމްބަރ 2024ވާ ހޮނިހިރު ދުވަހު ބޭއްވުމަށް ހަމަޖެހިފައިވާ ސްރީލަންކާގެ ރިޔާސީ އިންތިޚާބާއި ގުޅިގެން، ސަލާމަތީ ފިޔަވަޅުތައް އިތުރުކުރެވިފައިވުމާއެކު، މިދަނޑިވަޅުގައި އިތުރަށް ސަމާލުވެވަޑައިގެންނެވުމަށް އެންމެހާ ދިވެހި ރައްޔިތުންނަށް އިލްތިމާސް ކުރާ ކަމަށެވެ.
މިގޮތުން، ބޭރަށް ވަޑައިގަންނަވާއިރު އައިޑެންޓިފިކޭޝަން ގެންގުޅުއްވުމަށާއި، ވޯޓުލާ މަރުކަޒުތައް ކައިރިއަށް ވަޑައިނުގަތުމަށާއި، ދަންގަޑިތަކުގައި ބޭރުގައި ނޫޅުއްވުމަށާއި، ފުލުހުން ނުވަތަ ސަލާމަތީ ޚިދުމަތްތަކުގެ އިރުޝާދުތަކަށް ކިޔަމަންވެވަޑައިގަތުމަށް ހައިކޮމިޝަނުން ވަނީ އިލްތިމާސްކޮށްފައެވެ.
މީގެއިތުރުން ކުރިއަށް އޮތް ބަންދު ދުވަސްތަކަށް ވިސްނަވައި ވިސާއާއި ގުޅުންހުރި ކަންކަން ހަމަޖެއްސެވުމަށްވެސް ވަނީ އިލްތިމާސްކޮށްފައެވެ.
މާދަމާ އޮންނަ ލަންކާގެ ރިޔާސީ އިންތިހާބާއި ގުޅިގެން އެގައުމުގެ ދާހިލީ ހާލަތު ގޯސްވެދާނެ ކަމަށް ގިނަ ބަޔަކު އަންނަނީ ބުނަމުންނެވެ. އެގޮތުން 2022 ވަނަ އަހަރު އެގައުމުގެ ރައީސް ކަމުގައި ހުންނެވި ގޮޓާބަޔަ ރާޖަޕަކްސަގެ ވެރިކަން ވައްޓާލުމަށްފަހު މިއީ އެގައުމުގެ ރައީސްއަކު އިންތިހާބު ކުރުމަށް ބާއްވާ ފުރަތަމަ އިންތިހާބު ކަމުން ގައުމު ހަލަބޮލިވާނެ ކަމަށް ބެލެވޭތީ އެގައުމުގެ ސަލަމާތީ ބާރުތަކުން އަންނަނީ ސަލާމަތީ ކަންކަން ވަރުގަދަ ކުރަމުންނެވެ.