ރާއްޖެއިން ލަންކާއަށް ކަނޑައެޅުއްވި ސަފީރު ފަތްކޮޅު އަރުވައިފި

ރާއްޖެއިން ލަންކާއަށް ކަނޑައެޅުއްވި އައު ސަފީރު މަސްއޫދު އިމާދު, އެމަނިކުފާނުގެ މަގާމުގެ ފަތްކޮޅު އެ ގައުމުގެ ރައީސް ރަނިލް ވިކްރަމަސިންހައަށް އަރުވައިފިއެވެ.

ސަފީރުގެ ފަތްކޮޅު އަރުވާފައިވަނީ އެކަމަށްޓަކައި އިއްޔެ ލަންކާގެ ރައީސްގެ ގެކޮޅުގައި ބޭއްވުނު ހާއްސަ ރަސްމިއްޔާތެއްގައެވެ.

މި ރަސްމިއްޔާތަށްފަހު ރާއްޖޭގެ ސަފީރާއި ލަންކާ ރައީސް ވަނީ މުހިއްމު މަޝްވަރާތަކެއް ކުރައްވާފައެވެ. އެގޮތުން ދެގައުމުގެ ގުޅުން ބަދަހުކުރުމާއި ގުޅޭ ގޮތުން ވަނީ މަޝްވަރާކުރައްވާފައެވެ.

ސަފީރު މަސްއޫދު އިމާދު ދެއްކެވި ވާހަކަފުޅުގައި، ސްރީލަންކާއަށް ކަނޑައަޅުއްވާފައި ހުންނަވާ މަންދޫބެއްގެ ގޮތުގައި މަސައްކަތް ކުރެއްވުމަށް، ރާއްޖޭގެ ރައީސް ޑރ. މުހައްމަދު މުއިއްޒު އެމަނިކުފާނާ ހަވާލުކުރައްވާފައިވާ އިތުބާރާއި މަސްއޫލިއްޔަތު ވަރަށް ބޮޑަށް އެނގިވަޑައިގަންނަވާކަމުގައި ވަނީ ވިދާޅުވެފައެވެ.

ސަފީރު މަސްއޫދު ވަނީ ދެގައުމުގެ ތާރީހީ ގުޅުން އިތުރަށް ބަދަހިކުރުމަށް މަސައްކަތް ކުރައްވާނެ ކަމަށެވެ. އަދި ލަންކާއަކީ ހަމައެކަނި އިޤްތިޞާދީ އަދި އިޖްތިމާޢީ ތަރައްޤީގެ ބައިވެރިއެއް ނޫންކަމަށާއި، ލަންކާއަކީ ދިވެހިންގެ ގިނަ ބަޔަކު އުޅޭ ޤައުމެއްކަމާއި، އަދި ގިނަ ބަޔަކަށް ލަންކާއަކީ އެމީހުންގެ ދެ ވަނަ ވަޒަންކަން ފާހަަގަކުރައްވާފައެވެ.

މި ބައްދަލުކުރެއްވުމުގައި ލަންކާގެ ރައީސް ރަނިލް ވިކްރަމަސިންހަ ވަނީ ރާއްޖޭގެ ސަފީރަށް މަރުހަބާ ދަންނަވާފައެވެ. އަދި ދެ ޤައުމުގެ ގުޅުން އިތުރަށް ބަދަހިކުރުމަށް މަސައްކަތްކުރައްވާނެކަމުގެ ޔަގީންކަންވެސް ލަންކާގެ ރައީސް ދެއްވިއެވެ.