ރާއްޖެ އާއި ޗައިނާއާއި ދެމެދު ކަރަންސީ ސެޓެލްމެންޓު އެއްބަސްވުމެއްގައި ސޮއިކޮށްފި

ދިވެހި ސަރުކާރާއި ޗައިނާގެ މަރުކަޒީ ބޭންކު ކަމަށްވާ ޕީޕަލްސް ބޭންކް އޮފް ޗައިނާއާ ދެމެދު، ކަރަންޓް އެކައުންޓް މުޢާމަލާތްތައް ދެ ގައުމުގެ ފައިސާއިން ހިންގުމަށް މަގުފަހިކޮށްދިނުމަށް ފަހުމުނާމާއެއްގައި މިއަދު ސޮއިކޮށްފި އެވެ.

މިއަދު އެކޮނޮމިކް މިނިސްޓްރީން ނެރުނު ނޫސް ބަޔާނެއްގައި ބުނީ މިއަދު ސޮއިކުރެވުނު އެއްބަސްވުމަކީ ދެ ޤައުމުގެ މެދުގައި އިޤްތިޞާދީ ގުޅުން ވަރުގަދަކޮށ،ް ވިޔަފާރިއާއި އިންވެސްޓްމަންޓް އިތުރުކުރުމަށް އެޅިގެންދާ މުހިންމު ފިޔަވަޅެއް ކަމަށެވެ. އަދި މިފަހުމުނާމާގެ ދަށުން ދެ ޤައުމުގެ މެދުގައި ކަރަންޓް އެކައުންޓް މުޢާމަލާތްތަކާއި ސީދާ އިންވެސްޓްމަންޓްތައް ދެޤައުމުގެ ފައިސާއިން ހިންގުމަށް މަގުފަހިކޮށްދޭ އޮނިގަނޑެއް ޤާއިމުކުރެވި, ދެ ޤައުމުގެ މެދުގައި ވިޔަފާރިއާއި އިންވެސްޓްމަންޓްގެ ގުޅުންތައް އިތުރަށް ހަރުދަނާވެގެންދާނެ ކަމަށް ވެސް ވަނީ ބުނެފައި އެވެ.

މިނިސްޓްރީން އިތުރަށް ބުނީ މި އެއްބަސްވުމުގެ ސަބަބުން ލޯކަލް ކަރަންސީތަކުގައި ކަރަންސީ ސެޓްލްމަންޓްތައް ހަރުދަނާވެ، ޗައިނާއިން މުދާ އިމްޕޯޓްކުރާ ދިވެހި ވިޔަފާރިވެރިންނަށް ލުއިފަސޭހަކަން އިތުރުވެ، ދެ ގައުމުގެ ދެމެދުގައި ބޯޑަރު ހުރަސްކޮށް ކުރާ އިންވެސްޓްމަންޓްތައް އިތުރުކުރުމަށް މަގުފަހިވެގެންދާނެ ކަމަށް ބެލެވޭ ކަމަށެވެ.

އަދި މި އެއްބަސްވުމުން ދައްކުވައިދެނީ ރައީސް މުއިއްޒު އިޤްތިޞާދީ ފުދުންތެރިކަން އިތުރުކުރުމަށާއި، ބައިނަލްއަޤްވާމީ މުހިންމު ބައިވެރިންނާއެކު ވިޔަފާރީގެ ގުޅުން ތައް ބަދަހިކުރުމަށް ރައީސުލްޖުމްހޫރިއްޔާ ޑޮކްޓަރ މުޢިއްޒު ގެންގުޅުއްވާ ސްޓްރެޓެޖިކް ތަޞައްވުރު ކަމަށްވެސް ބަޔާނުގައި ބުނެފައި ވެއެވެ.

މުޙައްމަދު މުޢިއްޒު މިއަހަރު ޖެނުއަރީ މަހު ޗައިނާއަށް ކުރެއްވި ފުރަމާނަ ދަތުރުފުޅުގެ ސަބަބުން ދެޤައުމުގެ ގުޅުން އިތުރަށް ބަދަހިވެގެން ގޮސްފައިވާކަންވެސް މިނިސްޓްރީން ބުނެއެވެ.

އެގޮތުން އެ ދަތުރުފުޅުގައި ރައީސުލްޖުމްހޫރިއްޔާ ޑޮކްޓަރ މުޢިއްޒާއި ޗައިނާގެ ރައީސް ޝީ ޖިންޕިންގ ވަނީ ރާއްޖެއާއި ޗައިނާއާ ދެޤައުމުގެ ދެމެދުގައި އޮތް ސްޓްރެޓެޖިކް ކޯޕަރޭޓިވް ޕާޓްނަރޝިޕް އިތުރަށް ހަރުދަނާކުރެއްވުމާ ބެހޭގޮތުން މަޝްވަރާކުރައްވައި ދެޤައުމުގެ ދެމެދުގައި އޮތް އިޤްތިޞާދީ ގުޅުން އިތުރަށް ބަދަހިކުރެއްވުމަށް ދެޤައުމުގެ ދެމެދުގައި އޮތް ގާތް ގުޅުމުގެ މައްޗަށް އަލިއަޅުއްވާލެއްވިއެވެ.

ދެގައުމުގެ ދެމެދުގައި ބައިލެޓަރަލް ޓްރޭޑް ގާތްގަނޑަކަށް 700 މިލިއަން ޑޮލަރަށް ވުރެ މައްޗަށް އަރާއިރު ޗައިނާއަކީ ރާއްޖޭގެ ވިޔަފާރީގައި އެންމެ ބޮޑު ބައިވެރިޔާއެވެ. މީގެ އިތުރުން ޗައިނާއަކީ ރާއްޖެއަށް ފަތުރުވެރިން ޒިޔާރަތްކުރާ އެންމެ ބޮޑު މާކެޓެވެ.

އެކޮނޮމިކް މިނިސްޓްރީން ބުނީ މި އެމްއޯޔޫގައި ސޮއިކުރުމަކީ އިގްތިސާދީ ގުޅުން ބަދަހިކޮށް، ދެ ގައުމުގެ ދެމެދުގައި ވިޔަފާރި އާއި އިންވެސްޓްމަންޓް ފްލޯ އިތުރުކުރުމަށް އެޅުނު މުހިންމު ފިޔަވަޅެއް ކަމަށެވެ.