ފަހަތުން އަރައި އެޗްއެމްއެޗް ބަލިކޮށް އެސްއެސްއާރު ކުއާޓާގެ ފުރުސަތު ބޮޑުކޮށްފި

8 ވަނަ އޮފީސް/ކޮމްޕެނީ ހޭންޑްބޯޅަ މުބާރާތުގެ އަންހެން ދެވަނަ ޑިވިޝަން ގުރޫޕް ސީގައި މިރޭ ސަން ސިޔާމް ރިސޯޓް (އެސްއެސްއާރު) އާއި ހުޅުމާލޭ ހޮސްޕިޓަލް (އެޗްއެމްއެޗް) ވާދަކުރި މެޗު ފަހަތުން އަރައި 12-09 ގެ ނަތީޖާއަކުން ކާމިޔާބުކޮށް އެސްއެސްއާރުން ކުއާޓާގެ ފުރުސަތު ބޮޑުކޮށްފިއެވެ.

މުބާރާތުގައި އެސްއެސްއާރު ކުޅުނު ފުރަތަމަ މެޗުގައި އެމްސީސީ އަތުން 14-07 ގެ ނަތީޖާއަކުން މޮޅުވިއިރު، ދެވަނަ މެޗުގައި ޓީމު ޖުޑިޝަރީ އަތުން އެޓީމު މޮޅުވީ ވާދަވެރި ކުޅުމަކަށްފަހު 7-8 ގެ ނަތީޖާއަކުންނެވެ. ނަމަވެސް އެޓީމުގެ ތިންވަނަ މެޗުގައި 23-08 ގެ ނަތީޖާއަކުން ސީއެޗުޑީސީ އަތުން ވަނީ ބަލިވެފައެވެ. އަދި އެޗްއެމްއެޗްގެ ފުރަތަމަ މެޗުގައި ޓީމު ޖުޑިޝަރީ އަތުން 18-08 ގެ ނަތީޖާއަކުން ބަލިވިއިރު، ދެވަނަ މެޗުގައި ސީއެޗުޑީސީ އަތުން ބަލިވީ 09-29 ގެ ނަތީޖާއަކުންނެވެ. ނަމަވެސް އެންމެ ފަހުން ކުޅުނު މެޗުގައި އެޓީމުން ވަނީ 17-09 ގެ ނަތީޖާއަކުން މާލޭ ސިޓީ ކައުންސިލް (އެމްސީސީ) ބަލިކޮށްފައެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، ފުރަތަމަ ހާފުގެ ކުޅުން ނިމިގެންދިޔައީ ހަތަރު ޕޮއިންޓްގެ ލީޑަކާއެކު 5-1 ގެ ނަތީޖައަކުން އެޗްއެމްއެޗް ކުރީގައި އޮވެގެންނެވެ. ނަމަވެސް މެޗުގެ ދެވަނަ ހާފުގައި އެސްއެސްއާރުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގައި އެޓީމުން އިތުރު 11 ލަނޑު ކާމިޔާބުކުރިއިރު، މިހާފުގައި އެޗްއެމްއެޗްއަށް ކާމިޔާބުކުރެވުނީ ހަތަރު ލަނޑެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ އެސްއެސްއާރުގެ ފާތުމަތު ރިސްމާ އެވެ.

މިނަތީޖާއެކު ކުޅުނު ހަތަރު މެޗުން އެސްއެސްއާރަށް ނުވަ ޕޮއިންޓް ލިބިފައިވާއިރު، ލަނޑުގެ ތަފާތުން އެޓީމު މިވަގުތު އޮތީ ގުރޫޕްގެ ދެވަނައިގައެވެ. އަދި މިމެޗުން ބަލިވި އެޗްއެމްއެޗްއަށް ހަތަރު މެޗުން ލިބިފައިވަނީ ތިން ޕޮއިންޓް ލިބިފައިވާއިރު އެޓީމުން މުބާރާތް ނިންމާލީ ގުރޫޕްގެ ހަތަރު ވަނައިގައި އޮވެއެވެ.

މިއަހަރުގެ އޮފީސް/ކޮމްޕެނީ ހޭންޑްބޯޅަ މުބާރާތުގެ އަންހެން ދެވަނަ ޑިވިޝަނުގައި 20 ޓީމަކުން ވާދަކުރަމުން އަންނައިރު، މިޑިވިޝަނުގެ މެޗުތައް ކުރިއަށްދަނީ ބައިވެރިވި 20 ޓީމު ހަތަރު ގުރޫޕަކަށް ބަހާލައިގެންނެވެ. އެގޮތުން ކޮންމެ ގުރޫޕެއްގައި ފަސް ޓީމު ހިމެނޭއިރު، ކޮންމެ ގުރޫޕަކުން އެންމެ ރަނގަޅު ނަތީޖާއެއް ހޯދާ ދެޓީމަށް މުބާރާތުގެ ކުއާޓާ ފައިނަލުން ފުތުސަތު ލިބިގެންދާނެއެވެ.