ދިރާގުން އުފެއްދި ފިންޓެކް ކުންފުންޏަށް އެމްއެމްއޭއިން ލައިސެންސް ދީފި

ފިންޓެކް ހިދުމަތްތައް ދިނުމަށްޓަކައި ދިރާގުން އުފެއްދި ސަބްސިޑަރީ ކުންފުނި ކަމަށްވާ ދިރާގު ފިންޓެކް ކޮމްޕެނީއަށް ރާއްޖޭގެ މައި ބޭންކު, އެމްއެމްއޭއިން ޕޭމެންޓް ހިދުމަތް ދިނުމުގެ ލައިސެންސް ދީފި އެވެ.

އެމްއެމްއޭއިން މިއަދު ބުނީ ގައުމީ ޕޭމަންޓް ސިސްޓަމްގެ ގާނޫނުގެ ދަށުން، ދިރާގު ފިންޓެކް ޕްރައިވެޓް ލިމިޓެޑަށް ރާއްޖޭގައި އިލެކްޓްރޯނިކް މަނީ އިޝޫކުރުމުގެ ހިދުމަތް ދިނުމަށް ބޭނުންވާ ޕޭމަންޓް ހިދުމަތް ދިނުމުގެ ލައިސަންސް މިއަދު ދީފައިވާ ކަމަށެވެ.

މި ލައިސަންސް ދިނުމާ ގުޅިގެން، ދިވެހިރާއްޖޭގެ ގުޅުން ޕަބްލިކް ލިމިޓެޑް އިން މިހާރު ދެމުން އަންނަ އިލެކްޓްރޯނިކް މަނީ އިޝޫކުރުމުގެ ޚިދުމަތް ދިރާގު ފިންޓެކް ޕްރައިވެޓް ލިމިޓެޑްގެ ދަށަށް ބަދަލުކުރެވިގެން ދާނެ ކަމަށް އެމްްއެމްއޭއިން ބުނެއެވެ.

ދިރާގުން އިލެކްޓްރޯނިކް މަނީ އިޝޫކުރުމުގެ ހިދުމަތް ދެމުން އަންނަނީ ދިރާގުޕޭގެ ނަމުގައި އުފައްދާފައިވާ ޑިޖިޓަލް ވޮލެޓެއްގެ ޒަރިއްޔާއިންނެވެ.

ދިރާގު ފިންޓެކް ޕްރައިވެޓް ލިމިޓެޑް އުފެއްދީ މިދިޔަ އަހަރުގެ ޑިސެމްބަރު މަހުގެ ތެރޭގައި އެވެ. އެކުންފުނީގެ ހިއްސާދާރުންގެ ގޮތުގައި ތިބީ ދިރާގުގެ ލީގަލް އަދި ބޯޑް ޑިރެކްޓަރު ހަޒްރަތު ރަޝީދު ހުސެއިން އާއި ދިރާގުގެެ މައި ކުންފުނި ދިވެހި ރާއްޖޭގެ ގުޅުން ޕްރައިވެޓް ލިމިޓެޑެވެ.