ހުޅުދުއްފާރު މަގު ހެދުމުގެ މަޝްރޫއު: ބައެއް މަގުތަކުގައި ތާރު އެޅުމަށް ތައްުޔާރުވަނީ!

ހުޅުދުއްފާރު މަގު ހެދުމުގެ މަޝްރޫއުގެ މަސައްކަތް ބާރު ސްޕީޑެއްގައި ކުރިޔަށްދާ ކަމަށް އެމަޝްރޫއުގެ ކޮންޓްރެކްޓަރު އާރްޑީސީއިން ބުނެފި އެވެ.

އާރްޑީސީއިން ރޭ ވަނީ މި މަޝްރޫއުގެ އެންމެ ފަހުގެ އަދާހަމަ މައުލޫމާތު މީޑިއާތަކާއި ހިއްސާކޮށްފައެވެ. އެގޮތުން އެކުންފުނިން ބުނީ ހުޅުދުއްފާރު މަގު ހެދުމުގެ މަޝްރޫއުގެ ދަށުން ބޮޑުތަކުރުފާނު މަގު، އަމީނީމަގު އަދި މަޖީދީ މަގުގައި އޭބީސީ ފަށަލަ އެޅުމުގެ މަސައްކަތް ދަނީ ކުރަމުން ކަމަށެވެ. އޭބީސީ ފަށަލަ އަކީ ތާރު އެޅުމުގެ ކުރިން މަގުގައި އަޅާ ފަށަލައެކެވެ.

މި މަޝްރޫއުގެ ދަށުން ހުޅުދުއްފާރުގެ ބޮޑު ހަ މަގެއްގައި 3.2 ކިލޯ މީޓަރުގެ މަގުގައި ތާރު އަޅައި މަގުތަކުގައި ފެން ހިންދާ ނިޒާމު ގާއިމުކޮށް މަގު ބައްތި ހަރު ކުރާނެ އެވެ.

ތާރު އަޅާ މަގުތައް

1. ބޮޑުތަކުރުފާނު މަގު
2. އަމީނީ މަގު
3. އިސްކަންދަރު މަގު
4. ޖަމީލް މަގު
5. މަޖީދީ މަގު
6. ހާބަރު މަގު

މި މަޝްރޫއު އާރްޑީސީއާ ހަވާލުކޮށްފައި ވަނީ 88 މިލިއަން ރުފިޔާއަށެވެ.