ހަންޏާމީދޫގެ ހިނގި އަލިފާނުގެ ހާދިސާއެއްގައި ގެޔަކަށް ބޮޑެތި ގެއްލުންތަކެއް, ހާލުގައި ޖެހުނު ފަރާތްތަކަށް އެންޑީއެމްއޭއިން އެހީވަނީ!

ހަންޏާމީދޫގެ ހިނގި އަލިފާނުގެ ހާދިސާއެއްގައި ގެޔަކަށް ބޮޑެތި ގެއްލުންތަކެއް ލިބިއްޖެ އެވެ.

ނެޝަނަލް ޑިޒާސްޓަރ މެނޭޖްމެންޓުން މިއަދު ބުނީ 2024 އޯގަސްޓް 09 ވަނަ ދުވަހުގެ ރޭ ދަންވަރު އދ. ހަންޏާމީދޫގައި އަލިފާނުގެ ހާދިސާއެއް ހިނގައި ދިރިނޫޅެވޭވަރަށް އެތަނަށް ގެއްލުން ލިބިފައިވާ ކަމަށެވެ.

އަދި މި ހާދިސާގައި ހާލުގައި ޖެހުނު އެގޭގެ ފަރާތްތަކަށް އެހީތެރިކަން ފޯރުކޮށް ދިނުމުގެ މަސައްކަތް ކައުންސިލް އާއި ގުޅިގެން އެ އޮތޯރިޓީން ކުރަމުންދާ ކަމަށްވެސް ވަނީ ބުނެފައި އެވެ.

މި ހާދިސާއާއި ގުޅިގެން އަދި މިހާތަނަށް ފުލުހުންގެ ބަހެއް ލިބިފައި ނުވެއެވެ.

އެރަށުން މައުލޫމާތު ދިން ބަޔެއް ފަރާތްތަކުން ބުނާގޮތުގައި އަލިފާނުގެ ހާދިސާ ހިނގުމާއި އެކު އެގޭގައި އެވަގުތު ތިބި މީހުން ވަނީ ސަލާމަތުން ގެއިން ނެރެފައި އެވެ. އަދި މި ހާދިސާގައި އެއްވެސް މީހަކަށް އަނިޔާއެއް ލިބިފައިވާ ނުވާކަމަށްވެސް އޭނާ ބުންޏެވެ.