ވެލިދޫ މަގު ހެދުމުގެ މަޝްރޫޢުގެ މަސައްކަތްވެސް ހަލުވި ސްޕީޑެއްގައި ކުރިޔަށް!

ނ ވެލިދޫގެ މަގުތައް ޒަމާނީ ފެންވަރަށް ހެދުމުގެ މަޝްރޫއުގެ މަސައްކަތް ބާރު ސްޕީޑުގައި ކުރަމުން އަންނަ ކަމަށް އެމަސައްކަތުގެ ކޮންޓްރެކްޓަރ ރޯޑް ޑިވެލޮޕްމެންޓް ކޯޕަރޭޝަން, އާރްޑީސީއިން ހާމަކޮށްފި އެވެ.

އާރްޑީސީއިން މިއަދު ވަނީ މި މަޝްރޫއުގެ އެންމެ ފަހުގެ އަދާހަމަ މައުލޫމާތު މީޑިއާތަކާއި ހިއްސާކޮށްފައެވެ. އެގޮތުން އާރްޑީސީން ބުނީ ނ. ވެލިދޫ މަގު ހެދުމުގެ މަޝްރޫޢުގެ ދަށުން މިވަގުތު ކުރިއަށްދަނީ ރާވެރިން މަގުގައި ދުވާރުގެ މަސައްކަތާއި އޯޝަން މަގުގައި ކާރބް ސްޓޯން ޖެހުމުގެ މަސައްކަތް ކަމަށެވެ.

ޖުމުލަ 88.5 މިލިއަން ރުފިޔާގެ މި މަޝްރޫއުގެ އަމަލީ މަސައްކަތް ފެށީ 15 ނޮވެމްބަރު 2021 ގައެވެ. މި މަޝްރޫއުގެ 80 އިންސައްތައެއްހާ މަސައްކަތް މިހާރު ވަނީ ނިމިފައި އެވެ.

މި މަޝްރޫއުގެ ދަށުން ވެލިދޫގެ 11 މަގަކާއި އަދި މަގަކަށް އިތުރުކުރާ ބައެއްގައި ތާރު އަޅާނެ އެވެ. އެއީ ޖުމުލަ 5.7 ކިލޯ މީޓަރުގެ މަގެވެ.