ބަންގްލަދޭޝްގައި މުޒާހަރާކުރި ދަރިވަރުންގެ ޑިމާންޑަކީ ވެރިކަން ޔޫނުސް އާއި ހަވާލުކުރުން!

ވެރިކަމުގެ ނިޒާމެއް ރަސްމީކޮށް މިވަގުތު ނެތް ބަންގްލަދޭޝްގެ އިންތިގާލީ ސަރުކާރު ހަވާލުކުރަން އެގައުމުގައި މުޒާހަރާކުރި ފަރާތްތަކުން ބޭނުންވާ ފަރާތް ހާމަކޮށްފި އެވެ.

ރިޕޯޓުތައް ބުނާގޮތުގައި ބަންގްލަދޭޝްގައި ބޮޑެތި މުޒާހަރާތަކެއް ކުރިޔަށް ގެންދިޔަ ދަރިވަރުންތަކުގެ ތެރެއިން މުޒާހަރާތަކުގައި އިސްކޮށް ހަރަކާތްތެރިވި ދަރިވަރުން މިހާރު އަންނަނީ އެގައުމުގެ ރައީސް ޝަހާބުއްދީންއާއި އެކު އިންތިގާލީ ސަރުކާރެއް އެކުލަވާލުމާއި ގުޅޭގޮތުން މަަޝްވަރާކުރަމުންނެވެ.

އެގޮތުން މި މަޝްވަރާތަކުގައި އެދަރިވަރުން ވަނީ އިންތިގާލީ ސަރުކާރު ނޯބެލް ސުލްހައިގެ އިނާމު ހާސިލްކުރެއްވި މުހައްމަދު ޔޫނުސް އާއި ހަވާލުކުރުމަށް ޑިމާންޑުކޮށްފައެވެ.

ޔޫނުސްއަކީ ދުނިޔޭގެ އިޖުތިމާއީ މޮޑެލް ބިޒްނަސް ކޮންސެޕްޓުތައް އެކުލަވާލުގައި ނަން މަޝްހޫރު ބޭފުޅެކެވެ.

އިންތިގާލީ ސަރުކާރުގެ ވެރިޔާގެ މަގާމަށް އޭނާގެ ނަން ދަރިވަރުން ހުށަހަޅާފައިވަނީ ޔޫނުސްއާއި އެކު ދަރިވަރުން ކުރިޔަށް ގެންދިޔަ ފުޅާ މަޝްވަރާތަކަކަށް ފަހުގައި އެވެ. އެގޮތުން ބައެއް ރިޕޯޓުތައް ބުނާ ގޮތުގައި ޔޫނުސް ވަނީ ފުރަތަމަ އެހުށަހެޅުން ގަބޫލުކުރަން ދެކޮޅު ހަދާފައިއެވެ. ނަމަވެސް ފުޅާ މަޝްވަރާތަކަށްފަހު މިހާރު ޔޫނުސް ހުންނެވީ އިންތިގާލީ ސަރުކާރާއި ހަވާލުވުމަށް ތައްޔާރަށްކަން ރައީސް ޝަހާބުއްދީންއާއި އެކު އޮތް ބައްދަލުވުމުގައި ދަރިވަރުން ވަނީ ބުނެފައި އެވެ.

ޔޫނުސް މިވަގުތު ހުންނެވީ ފްރާންސްގެ ޕެރިސްގައި އެވެ. އިންތިގާލީ ސަރުކާރު އޭނާއަށް ހަވާލުކުރައްވަން ނިންމަވައިފި ނަމަ އޭނާ ބަންގްލަދޭޝްއަށް ދިޔުމަށް ތައްޔާރަށް ހުރި ކަމަށްވެސް ބައެއް ރިޕޯޓުތައް ބުނެއެވެ.

--