ެއެއްވެސް ލިޔެކިޔުމެއް ނެތި އާރުޑީސީން 161 މިލިއަން ރުފިޔާ ދޫކޮށްފައިވޭ

ރޯޑް ޑިވަލޮޕްމަންޓް ކޯޕަރޭޝަން (އާރްޑީސީ) ގެ ކުރީގެ މެނޭޖްމަންޓުން އެއްވެސް ލިޔެކިޔުމެއް ނެތި 161 މިލިއަން ރުފިޔާ އެކި ފަރާތްތަކަށް ޖަމާކޮށްފައިވާ ކަމަށް އެކުންފުނިން މިއަދު ބުނެފި އެވެ.

އާރުޑީސީގެ މާލީގެ ހާލަތާއި ކުންފުންޏަށް ލިބިފައިވާ ގެއްލުންތަކުގެ ތަފްސީލު ހޯދުމަށް ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސަސް ކޮމިޓީއަށް އެކުންފުނީގެ މެނޭޖްމަންޓް މިއަދު ވަނީ ހާޒިރުކޮށް ސުވާލުކޮށްފައެވެ.

މި ކޮމެޓީއަށް ޖަވާބު އަރުވަމުން އާރުޑީސީން. ބުނެފައިވަނީ, އެ ކުންފުނިން 2022 ވަނަ އަހަރު 66 މިލިއަން ރުފިޔާ އަދި 2023 ވަނަ އަހަރު 95 މިލިއަން ރުފިޔާ އެއްވެސް ލިޔެކިޔުމެއް ނެތި އެކި ފަރާތްތަކަށް ޖަމާކޮށްފައިވާ ކަމަށެވެ. މި ފައިސާ ފޮނުވާފައިވަނީ އިންޓަނެޓް ބޭންކިންގ މެދުވެރިކޮށް ކަމަށްވެސް ބުނެފައިވެއެވެ.

މި ފައިސާ ހަރަދުކޮށްފައިވަނީ ކޮންކަމަކަށް ކަމެއް އެނގޭނެ އެއްވެސް ލިޔެކިޔުމެއް ކުންފުނީގައި ނެތް ކަމަށް އާރުޑީސީން ބުނެފައިވެއެވެ. މިފައިސާ މިގޮތަށް ދޫކޮށްފައިވާކަން އެނގުނީ ކުންފުނީގެ ބޭންކް ސްޓޭޓްމަންޓް ބެލުމުން ކަމަށްވެސް ވަނީ ބުނެފައެވެ.

މި މައްސަލަ އޭސީސީއާ ފުލުހުން ތަހުގީގުކުރަމުން އަންނަ އިރު, އެކުންފުނިންވެސް ދަނީ އޮޑިޓެއް ހެދުމުގެ މަސައްކަތް ކުރަމުންނެވެ. އަދި މި މައްސަލައާ ގުޅިގެން ފައިނޭންސް ގައި ހިމެނޭ ބައެއް މުވައްޒަފުންގެ ޑިޕާޓްމަންޓް ބަދަލުކޮށް, އެކުންފުނީގެ ސީއެފްއޯ ވެސް މަގާމުން ވަކިކޮށްފައިވާ ކަމަށް އެކުންފުނިން ވަނީ ބުނެފައެވެ. މި މައްސަލަ ބެލުމަށްފަހު މިކަމުގައި ޝާމިލްވާ އިތުރު. މުވައްޒަފުންނާ މެދު ފިޔަވަޅު އަޅަމުން ގެންދާނެ ކަމަށްވެސް ބުނެފައިވެއެވެ.