އިސްލާމީ މަރުކަޒުގައި ޚުޠުބާއެއް ދެއްވުމުގެ ދަޢުވަތު ފަލަސްތީނުގެ އިސްލާމިކް މިނިސްޓަރަށް!

ރާއްޖޭގެ އިސްލާމީ މަރުކަޒުގައި ޚުޠުބާއެއް ދެއްވުމަށް ދަޢުވަތު ފަލަސްޠީނުގެ އިސްލާމިކް މިނިސްޓަރ ޑރ. މުޙައްމަދު މުޞްޠަފާ ނަޖުމުއަށް އަރުވައިފި އެވެ.

މި ދައުވަތު މިނިސްޓަރ ޑރ. މުޙައްމަދު މުޞްޠަފާ އަށް އެރުއްވީ ރާއްޖޭގެ އިސްލާމިކް މިނިސްްޓަރު ޑރ މުހައްމަދު ޝަހީމް އަލީ ސައީދު އެވެ.

އެގޮތުން މިނިސްޓަރު ޝަހީމް ވަނީ މިއަދު މިނިސްޓަރ ޑރ. މުޙައްމަދު މުޞްޠަފާ ބައްދަލުކުރައްވާފައި އެވެ. ބައްދަލުވުމަށްފަހު މިނިސްޓަރ ޝަހީމް އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖެވަޑައިގެން، އިސްލާމީ މަރުކަޒުގައި ޚުޠުބާއެއް ދެއްވުމަށް ދަޢުވަތު އެމަނިކުފާނަށް އަރުވާފައިވާނެ ކަމަށާއި އެމަނިކުފާނު ރާއްޖެވަޑައިގަންނަވާނެ ކަމަށެވެ.

މި ބައްދަލުކުރެއްވުން އޮތީ މިހާރު ވަޒީރު ޝަހީމް ސައުދީއަށް ކުރައްވަމުން އަންނަ ދަތުރުފުޅުގެ ތެރެއިންނެވެ.

ޝަހީމް ސައުދީޢަށް ކުރައްވަމުން އަންނަ ދަތުރުފުޅަކީ އިސްލާމީ ޤައުމުތަކުގެ އިސްލާމީކަންތައްތަކާ ބެހޭ ވުޒާރާތައް ބައިވެރިވާ ގޮތަށް ބާއްވާ ޚާއްޞަ ކޮންފެރެންސްގެ 9 ވަނަ ސެޝަންގައި ބައިވެރިވެވަޑައިގަތުމަށް ޓަކައި ކުރައްވަމުން އަންނަ ދަތުރުފުޅެކެވެ.

މައްކާގައި ބޭއްވުމަށް ހަމަޖެހިފައިވާ މި ބައިނަލްއަޤްވާމީ ކޮންފެރެންސް އޮގަސްޓު މަހުގެ 4 ވަނަ ދުވަހާއި 5 ވަނަ ދުވަހުގައި ކުރިއަށް ދާނެއެވެ. މި ދަތުރުފުޅު ނިންމަވާލެއްވުމަށް ފަހު އިސްލާމީކަންތައްތަކާ ބެހޭ ވަޒީރު ރާއްޖެ އެނބުރި ވަޑައިގަންނަވާނީ އޮގަސްޓު މަހުގެ 7 ވަނަ ދުވަހުގައެވެ. އެގޮތުން އިސްލާމީ އުންމަތުގެ މުހިއްމު މަޢުޟޫއުތަކަށް ޢިލްމީ ކަރުދާސްތައް ހުށައެޅިގެންދާ މި ކޮންފެރެންސްގައި އިސްލާމީކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ބައެއް ސެޝަންތައް ޗެއަރކޮށްދެއްވުމަށް ވަނީ ހަމަޖެހިފައެވެ.