ހަސީނާ ސަރުކާރާއި ދެކޮޅަށް ކުރަމުން އަންނަ މުޒާހަރާތައް ހޫނުވެ މަރުވި މީހުންގެ އަދަދު 70 އަށްވުރެ މައްޗަށް!

ބަންގްލަދޭޝްގެ ބޮޑުވަޒީރު ޝެއިޚް ހަސީނާ އިސްތިއުފާއަށް ގޮވާލާ އެގައުމުގެ މަގުތަކަށް ގިނަ ބަޔަކު ނުކުމެ ކުރަމުން އަންނަ މުޒާހަރާތައް ހޫނުވެ ހިނގަމުން އަންނަ ހަމަނުޖެހުންތަކުގައި މަރުވި މީހުންގެ އަދަދު 70 އަށް ވުރެ މައްޗަށް އަރައިފި އެވެ.

ހަސީނާ އިސްތިއުފާ އަށް ގޮވާލާ ގިނަ ބަޔަކު ބަންގާޅުގެ މަގުތަކަށް ނުކުތުމާއި އެކު މުޒާހަރާތައް ރޫޅާލުމަށް ފުލުހުން ކަރުނަގޭސް ޖަހައި، ސްޓަން ގްރެނޭޑް ގޮއްވާލުމާއި އެކު ހަމަނުޖެހުންތައް ވަރުގަދަ ހިނގި ކުރިމަތިލުންތަކުގައި މަރުވި މީހުންގެ އަދަދު ވަނީ 76 އަށް އަރާފައި އެވެ. އޭގެ ތެރޭގައި 13 ފުލުހަކުވެސް ހިމެނެއެވެ.

ވެރިރަށް ޑާކާއާއި އުތުރުގެ ޑިސްޓްރިކްޓްތައް ކަމަށްވާ ބޮގުރާ، ޕަބްނާ އަދި ރަންގްޕޫރުގެ އިތުރުން ހުޅަނގުގެ މަގުރާ، އިރުމަތީގެ ކޮމިއްލާ އަދި ދެކުނުގެ ބަރިސަލް އަދި ފެނީގައި ހިނގަމުން އަންނަ މި ހަމަނުޖެހުންތަކުގައި އެތައް ބަޔަކު މަރުވެފައިވާ ކަން އެގައުމުގެ ފުލުހުންނާއި ޑޮކްޓަރުން އަންނަނީ ނޫސްތަކަށް ކަށަވަރުކޮށްދެމުންނެވެ.

ރިޕޯޓުތައް ބުނާ ގޮތުގައި ކުރިއަށް އޮތް ގަޑިތަކުގައި ކާފިއު އިއުލާންކުރަން އެގައުމުގެ ސަރުކާރުން ތައްޔާރުވަމުން އަންނަ އިރު، މުވާސަލާތީ ހިދުމަތް ތައް މިހާރު ވެސް ވަނީ ކަނޑާލައިފަ އެވެ.

ހަސީނާގެ އިސްތިއުފާއަށް މުޒާހަރާގެ ބައިވެރިން ގޮވާލީ ސަރުކާރުގެ ވަޒީފާތަކަށް ކޯޓާ ގެނައުމުގެ ނިޒާމު ނިމުމަކަށް ގެނައުމަށް ގޮވާލައި މިދިޔަ ޖުލައި މަހު ފެށި މުޒާހަރާތައް ހަމަނުޖެހުންތަކަކަށް ބަދަލުވެ 200 އަށް ވުރެ ގިނަ މީހުން މަރުވުމާ ގުޅިގެންނެވެ.

އަލްޖަޒީރާގެ ތަންވީރު ޗައުދަރީ، ވެރިރަށުން ރިޕޯޓް ކުރަމުން އަންނަ އިރު، އެގައުމުގެ ހާލަތު އޭނާ ސިފަކޮށްފައި ވަނީ "ހަލަބޮލި އަދި ނުރައްކާތެރި" ހާލަތެއްގެ ގޮތުގަ އެވެ.