ބޮޑުވަޒީރު ކަމުން ދުރުކުރި ހަސީނާގެ ވިސާގެ މުއްދަތު އިންޑިއާއިން އިތުރުކޮށްފި

ރައްޔިތުން ނުކުމެ ބަންގްލަދޭޝްގެ ބޮޑުވަޒީރުކމަުގެ މަގާމުން ދުރުކޮށްފައިވާ ޝެއިޚް ހަސީނާ ހިމާޔާތްހޯއްދަވައިގެން ހުންނެވި އިންޑިއާއިން އެކަމަނާގެ ވިސާގެ މުއްދަތު އިތުރުކޮށްދީފައިވާ ކަމަށް އިންޑިއާގެ ނޫސްތަކުން ރިޕޯޓުކޮށްފި އެވެ.

ހަސީނާގެ ވިސާގެ މުއްދަތު އިންޑިއާއިން އިތުރުކޮށްދީފައިމިވަނީ ހަސީނާއަށް ހައްގު އަދަބު ދިނުމަށް މަގުފަހުކުރުމަށް އެކަމަނާ އަނބުރާ ގައުމަށް ފޮނުވާލުމަށް ގޮވާލާ ބަންގްލަދޭޝްގެ ގިނަ ބަޔަކު ގޮވާލަމުންދާ ދަނޑިވަޅެއްގައި އެވެ.

ހަސީނާގެ ވިސާ އިތުރުކޮށްދިން ނަމަވެސް އަދިވެސް އިންޑިއާއިން ހަސީނާއަށް ސިޔާސީ ހިމާޔަތް ދީފައި ނުވަނީ އެކަމަށް މަގުފަހިވާ ގޮތަށް ގާނޫނެއް އިންޑިއާގައި ނެތުމުން ކަމަށް މީޑިއާ ރިޕޯޓްތައް ބުނެ އެވެ.

އިންޑިއާގެ ނޫސްތަކުން ބުނާގޮތުގައި ހަސީނާ ހުންނެވީ ވަރުގަދަ ސެކިއުރިޓީއެއްގެ ދަށުން ވެރިރަށް ނިއުދިއްލީގެ ސަރަހައްދެއްގައި އެވެ.

ބަންގްލަދޭޝްގެ އިންތިގާލީ ސަރުކާރުން މިދިޔަ ޑިސެމްބަރު މަހުގެ 23 ވަނަ ދުވަހު ހަސީނާ އަނބުރާ ގައުމަށް ފޮނުވާލުމަށް ރަސްމީކޮށް އިންޑިއާގައި ވަނީ އެދިފައި އެވެ. އެގޮތުން ހަސީނާ އަނބުރާ ބަންގްލަދޭޝަށް ގެންގޮސް އެކަމަނާގެ މައްޗަށް ދައުވާ ކުރަން ބޭނުންވާ ކަމަށް އެގައުމުގެ ސަރުކާރުން ބުނެއެވެ. ހަސީނާގެ މައްޗަށް ދައުވާ ކުރަން ނިންމާފައިވަނީ 2024 ވަނަ އަހަރު 500 އަށް ވުރެ ގިނަ މީހުން މަރުވި މުޒާހަރާގައި ހިނގި ހަމަނުޖެހުންތަކާއި ގެއްލުވާލާފައިވާ މީހުންގެ ހާދިސާތަކުގައި ހަސީނާ ބައިވެރިވި ކަމުގެ ތުހުމަތުގަ އެވެ.

މިދިޔަ އަންގާރަ ދުވަހު ބަންގްލަދޭޝްގެ އިމިގްރޭޝަން ޑިޕާޓްމަންޓުން ވަނީ ހަސީނާގެ އަތުގައި އޮތް ޕާސްޕޯޓް ހިމެނޭ ގޮތަށް 97 ޕާސްޕޯޓް ކެންސަލްކޮށްފައިވާ ކަމަށް ބުނެފަ އެވެ.