ޔުނައިޓެޑުން ޕްރީސީޒަން ނިންމާލީ ބޮޑު ބައްޔަކާއެކު

ކުރިއަށް އޮތް ސީޒަނަށް ތައްޔާރުވުމުގެ ގޮތުން މެންޗެސްޓަރ ޔުނައިޓެޑުން ކުޅުނު އެކުވެރިކަމުގެ ފަހު މެޗުގައި ވާދަވެރި ލިވަޕޫލް އަތުން 3-0 ގެ ނަތީޖާއަކުން އެޓީމު ބަލިވެއްޖެއެވެ.

އައު ސީޒަނަށް ތައްޔާރުވުމުގެ ގޮތުން ރޮސެންބާގް އަދި އާސެނަލް އާއި ދެކޮޅަ މެންޗެސްޓަރ ޔުނައިޓެޑް ކުޅުނު ދެމެޗުން އެޓީމު ބަލިވި ނަމަވެސް، ރެއާލް ބެޓިސް އަދި ރޭންޖާސް އާއި ދެކޮޅަށް ކުޅުނު ދެމެޗުން އެޓީމު ވަނީ މޮޅުވެފައެވެ. އަދި ލިވަޕޫލުން އައު ސީޒަނަށް ތައްޔާރުވުމުގެ ގޮތުން ރެއާލް ބެޓިސް އަދި އާސެނަލް އާއި ދެކޮޅަށް ކުޅުނު ދެމެޗުން ވެސް އެޓީމު ވަނީ މޮޅުވެފައެވެ.

ރޭގެ މެޗުގެ ފުރަތަމަ ހާފުގައި ލިވަޕޫލުން ދެލަނޑުގެ ލީޑެއް ހޯދިއިރު، އެޓީމުގެ ފުރަތަމަ ލަނޑު މެޗުގެ 10 ވަނަ މިނެޓުގައި ކާމިޔާބުކޮށްދިނީ ޒުވާން މިޑްފީލްޑަރު ފަބިއޯ ކަވާލިއޯ އެވެ. މިއީ އެޓީމުގެ ފޯވާޑް ޑިއޭގޯ ޖޯޓާ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

ލިވަޕޫލުގެ ދެވަނަ ލަނޑު ފުރަތަމަ ހާފުގެ 36 ވަނަ މިނެޓުގައި މުހައްމަދު ސަލާހް ތަނަވަސްކޮށްދިން ފުރުސަތެއްގައި ކާޓިސް ޖޯންސް ކާމިޔާބުކުރިއިރު، އެޓީމުގެ ތިންވަނަ ލަނޑު ދެވަނަ ހާފުގެ 61 ވަނަ މިނެޓުގައި ކާމިޔާބުކޮށްދިނީ ޑިފެންޑަރ ކޮންސްޓެންޓީނޯ ޓިމިކަސް އެވެ.

އައު ސީޒަން ފެށުމުގެ ކުރިން ލިވަޕޫލުން އެކުވެރިކަމުގެ އިތުރު އެއްމެޗު ކުޅުމަށް ހަމަޖެހިފައިވާއިރު، މިމަހުގެ 11 ވަނަ ދުވަހު އެޓީމުން ނުކުންނާނީ ސެވިއްޔާއި ދެކޮޅަށެވެ. އަދި މިމަހުގެ 10 ވަނަ ދުވަހު އިގިރޭސި ސީޒަން ހުޅުވުމުގެ ގޮތުން ކުޅޭ ޗެރިޓީ ޝީލްޑް މެޗުގައި މެންޗެސްޓާ ޔުނައިޓެޑް ނުކުންނާނީ ވާދަވެރި މެންޗެސްޓާ ސިޓީއާއި ދެކޮޅަށެވެ.