މާލޭގެ މަގަކަށް "ފަލަސްތީނު ހިނގުން" ނަމުން ނަން ދީފި

މާލޭގެ މަގަކަށް "ފަލަސްތީނު ހިނގުން" ނަމުން ނަން ދީފި އެވެ.

މިއަދު ބޭއްވުނު މާލޭ ސިޓީ ކައުންސިލްގެ ހަތަރުވަނަ ދައުރުގެ 151ވަނަ ރަސްމީ ޖަލްސާގައި މާލޭގެ މަގަކަށް "ފަލަސްތީނު ހިނގުން" ނަމުން ނަން ދިނުމަށް ވަނީ ފާސްކޮށްފައެވެ.

މި ނަން ކިޔާނެ މަގެއް ގޮތުގައި ފާސްކޮށްފައިވަނީ, މާފަންނު މަދަރުސާ ބިތްދޮށުގައި އޮންނަ ، ކޮރަލް ބޮއުލްވާޑްގެ ދެކުނަށް އޮންނަމަގެވެ.

މި މަގަށް "ފަލަސްތީނު ހިނގުން" ކިޔުމަށް ފާސްކުރީ މިއަދުގެ ޖަލްސާގައި ބައިވެރިވެޑައިގެންނެވި ހުރިހާ މެންބަރުންގެ އިއްތިފާގުންނެވެ.

މާލޭގެ ނަންނުދީ އޮތް ދެމަގުގެ ތެރެއިން އެއްމަގަށް ފަލަސްތީނާ ގުޅުވައި ނަމެއް ދިނުމަށް ނިންމާފައިވާ ކަމަށް މާލެސިޓީ މޭޔަރު އާދަމް އާޒިމް ވަނީ މީގެ ކުރިން ވިދާޅުވެފައެވެ. އަދި އެ މަގަށް ނަންދީ، މަގު ހުޅުވާނީ ރަސްމިއްޔާތަކާއެކު ކަމަށް ވެސް މޭޔަރު ވަނީ މީގެ ކުރިން ވިދާޅުވެފައެވެ.