ޕީއެންސީގެ މައި ޖަގަހަ މާދަމާ ރޭ މާލޭގައި ހުޅުވަނީ

ވެރިކަން ކުރާ ޕްރޮގްރެސިވް ޕާޓީ އޮފް މޯލްޑިވްސް, ޕީއެންސީގެ މައި ޖަގަހަ މާދަމާ ރޭ ހުޅުވުމަށް ތައްޔާރުވެއްޖެ އެވެ.

ޕީއެންސީގެ ސިޔާސީ ހަރަކާތްތައް ފުޅާކުރުމަށްޓަކައި މާލޭގައި ހުޅުވާ ޕީއެންސީގެ މައި ޖަގަހަ ހުޅުވުމަށް ހަމަޖެހިފައިވަނީ ހ.ވެޔޮވިލާގައި އެވެ. ހ ވެޔޮވިލާއަކީ މީގެ ކުރިން އެމްޑީޕީއާއި ޑިމޮކްރެޓްސްއިން ބޭނުންކުރި ހަރުގެވެސް ހުރި އިމާރާތެވެ. އެ ހަރުގެ ހުންނަނީ މާލޭގެ އާޓިފިޝަލް ބީޗުގެ ކުރިމައްޗަށް ވާގޮތަށެވެ.

ޕީއެންސީއިން ބުނީ ހ.ވެޔޮވިލާގައި ހުންނަ އެ ޕާޓީގެ ޖަގަހަ ހުޅުވުމުގެ ރަސްމިއްޔާތު ހޮނިހިރު ދުވަހުގެރޭ 20:30 ގައި އޮންނާނެ ކަމަށެވެ.

ޖަގަހަ ހުޅުވައިދެއްވާނީ ޕްރޮގްރެސިވް ކޮންގްރެސް ކޯލިޝަންގެ ލީޑަރު ރައީސް ޑރ.މުޙައްމަދު މުޢިއްޒުއެވެ.

ޕީއެންސީއިން ވަނީ ޖަގަހަ ހުޅުވުމުގެ ރަސްމިއްޔާތުގައި ބައިވެރިވުމަށް ޕީއެންސީގެ މެމްބަރުން އަދި އެންމެހާ ދިވެހިރައްޔިތުންނަށް ދަޢުވަތު އަރުވައިފައެވެ.