މިއަހަރުގެ ހައްޖު އޮޕަރޭޝަން ވަރަށް ކާމިޔާބު - ޝަހީމް

މިއަހަރުގެ ހައްޖު އޮޕަރޭޝަން ވަރަށް ކާމިޔާބުކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.

ފޭސްބުކްގައި މިއަދު ހިއްސާކުރެއްވި ޕޯސްޓެއްގައި ޝަހީމް ވިދާޅުވީ, ﷲ ގެ ރަޙުމަތުން ޙައްޖު އޮޕްރޭޝަން ކާމިޔާބުކަމަށް އުފަލާއެކު ފާހަގަކުރާ ކަމަށެވެ.

ޝަހީމް ވިދާޅުވީ, މިއަހަރު ހައްޖުގެ އަޅުކަން އަދާކުރެއްވި ދިވެހި ހާޖީންނަށް ފެންވަރު ރަނގަޅު ދިވެހި ރަހަތަކާއެކު ކާނާ ފޯރުކޮށްދެއްވުނު ކަމަށާއި ބަލި މީހުންނަށް އެންމެ މަތީ ދަރަޖައިގައި އެހީތެރިކަން ފޯރުކޮށްދެވުނު ކަމަށެވެ.

ބަލިމީހުންގެ ތެރޭގައި, ޑައިލެލިސް ހަދާ މީހުންނާއި، ކެންސަރަށް ފަރުވާ ހޯދާ ބައެއް މީހުންނާއި، ހިތުގެ ބަލި ހުންނަ ބައެއް މީހުން ހިމެނޭއިރު އެންމެނަށް އޯގާތެރިކަން ފޯރުކޮށްދެވުނު ކަމަށް ޝަހީމް ވިދާޅުވި އެވެ. އަދި އެޑްމިޓް ކުރެވުނު ފަރާތްތަކަށް މަތީ ދަރަޖައިގައި އެހީ ފޯރުކޮށްދެއްވުނު ކަމަށްވެސް ވިދާޅުވި އެވެ.

ޝަހީމް ވިދާޅުވީ, މަގު އޮޅުނު 100 އެއް ހާ ހާޖީން ސްމާޓް ޑިވައިޒްގެ އެހީގައި ލޮކޭޓްކޮށްގެން ގެނެވުނު ކަމަށެވެ. އަދި ބަލިމީހުން ހިމެނޭހެން ޢަރަފާތަށް ނުވަދެވޭ އެކަކު ވެސް ނެތް ކަމަށް ވިދާޅުވިއެވެ. އަދި ވީލްޗެއާގައި ގިނައަދަދެއްގެ ހާޖީން އުޅުނު އިރު, އެންމެންނަށްވެސް އެހީތެރިކަން ފޯރުކޮށްދެވުނު ކަމަށް ޝަހީމް ވިދާޅުވި އެވެ.

އަރަފާތުގެ ފޭލިގޭގެ އިންތިޒާމްތައް ފުރިހަމަ ނަމަވެސް މިނާގެ ފޭލިގޭގެ ތާށިކަމެއް ހުރިކަމަށް ޝަހީމް ފާހަގަކުރެއްވި އެވެ. އެކަން މެދުވެރިވި ސަބަބުތައް ބަލައި ކުރިއަށް އޮތްތަނުގައި ރަނގަޅުކުރަން އަޅަންޖެހޭ ފިޔަވަޅުތައް އަޅާނެ ކަމަށް ޝަހީމް ވަނީ ވިދާޅުވެފައެވެ.

ޝަހީމް ވަނީ ހައްޖު އޮޕަރޭޝަންގައި އެހީތެރިކަން ފޯރުކޮށްދެއްވި ހުރިހާ ފަރާތްތަކަށް ޝުކުރު އަދާކުރައްވާފައެވެ. އެގޮތުން ހައްޖު ކޯޕަރޭޝަންގެ މެނޭޖްމަންޓާއި މުރާލި މުވައްޒަފުންނާއި ހިއްވަރުގަދަ އެހީތެރިންނާއި, ހައްޖު މިޝަން އަށް ޝުކުރުއަދާކުރެއްވި އެވެ.

ޝަހީމް ނިންމާލަމުން ވިދާޅުވެފައިވަނީ މިއީ ހައްޖު ކޯޕަރޭޝަންގެ ތާރީހުގައިވެސް މިހާ ގިނައަދަދެއްގެ ހާޖީން ގެންދެވުނު ދެވަނަ ފަހަރު ކަމަށާއި, މިފަހަރު ރަނގަޅުކުރަން ޖެހޭ ކަންކަން ފާހަގަކޮށް އަންނަ އަހަރު ރަނގަޅުކުރާނެކަމަށެވެ.

މިއަަހަރު ރާއްޖެއިން ޙައްޖުގެ އަޅުކަން އަދާކުރައްވަނީ ޖުމްލަ 1150 ޙައްޖުވެރިންނެވެ. މިހުރިހާ އެންމެންވެސް ދިޔައީ ހައްޖު ކޯޕަރޭޝަންގެ ބެލުމުގެ ދަށުންނެވެ.