ތިންވަނަ ބޮޑު ހަނގުރާމައެއްގެ ބިރު އެބަ އޮތް - ނަޝީދު

ތިންވަނަ ބޮޑު ހަނގުރާމައެއްގެ ބިރު އުފެދިފައިވާކަމަށް ކުރީގެ ރައީސް, މުހައްމަަދު ނަޝީދު ވިދާޅުވެއްޖެ އެވެ.

އެކްސްގައި ކުރެއްވި ޕޯސްޓެއްގައި ނަޝީދު ވިދާޅުވީ, ބޮޑެތި ބާރުތަކުން އާންމުން އަސްކަރިއްޔާގައި ނުވަތަ ދިފާއީ ބާރުތަކުގައި މަސައްކަތްކުރަން މަޖުބޫރުކުރުވަމުން އަންނަ ކަމަށެވެ. އަދި ގައުމުތަކުގައި ހަތިޔާރު އިތުރުކޮށް އަސްކަރީ ބާރުގަދަކުރުމުގެ ވާދަވެރިކަމެއް އުފެދިފައިވާ ކަމަށްވެސް ނަޝީދު ވިދާޅުވި އެވެ.

މީގެ އިތުރުންވެސް ނަޝީދު ވަނީ ނަސްލީ ތަފާތުކުރުންތަކާއި ހިޖުރަކުރުމާ ދެކޮޅުވާ މިންވަރުވެސް އިތުރުވެފައިވާކަން ފާހަގަކޮށް ކަންބޮޑުވުންފާޅުކޮށްފައެވެ.

މިކަންކަމާއެކުވެސް ނަޝީދު ވަނީ އެ ޕޯސްޓުގައި މޫސުމަށް އަންނަ ބަދަލުގެ ކަންބޮޑުވުންތައްވެސް ފާޅުކޮށްފައެވެ.

ރާއްޖޭގެ ސިޔާސީ މަސްރަހުން މިވަގުތު ދުރަށްޖެހިވަޑައިގެން ހުންނަވައި, ނަޝީދު މިހާރު މަސައްކަތް ކުރައްވަމުން އަންނަނީ ކްލައިމެޓް ވަލްނަރަބަލް ފޯރަމް (ސީވީއެފް)ގެ ސެކެޓްރީ ޖެނެރަލްގެ މަގާމުގައެވެ.