އެމްއެމްޕީއާރްސީގެ އެމްޑީއަކަށް މަޝްހޫރު ޓީޓީ ކުޅުންތެރިޔާ ޝިއުރީ!

ރާއްޖޭގެ ފަތުރުވެރިކަން މާކެޓު ކުރުމަށް އުފައްދާފައިވާ މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން, އެމްއެމްޕީއާރްސީގެ މެނޭޖިންގ ޑިރެކްޓަރުގެ މަގާމަށް ބޭފުޅަކު އައްޔަނުކޮށްފި އެވެ.

ޕްރައިވެޓޭޒޭޝަން އެންޑް ކޯޕަރޭޝަން ބޯޑުން މިއަދު ބުނީ އެމް.އެމް.ޕީ.އާރު.ސީ ގެ މެނޭޖިންގ ޑިރެކްޓަރު ކަމުގެ މަޤާމަށް ގ. ގޯލްޑަން ހައުސް އަލްފާޟިލް އިބްރާހިމް ޝިއުރީ އައްޔަނުކޮށްފައިވާ ކަމަށެވެ.

ޝިއުރީއަކީ ރާއްޖޭގެ ޓޭބަލް ޓެނިހުގައި ފިރިހެން އެންމެ މޮޅު ކުޅުންތެރިޔާއެވެ.ޝިއުރީ މިވަގުތު ހުންނެވީވެސް ރާއްޖޭގެ ޓީޓީ އެސޯސިއޭޝަނުގެ ނައިބު ރައީސްގެ މަގާމުގަ އެވެ. މީގެ އިތުރުން ޝިއުރީއަކީ މިހާރު ވެސް މޯލްޑިވްސް ނެޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ (އެމްއޭއެންސީއައި) ގެ އެގްޒެކެޓިވް ބޯޑު މެމްބަރެކެވެ. އަދި ހައްޖު ކޯޕަރޭޝަންގެ މެމްބަރުކަން ވެސް އޭނާ ކުރެއްވި އެވެ.

އޭނާ ވަނީ މެލޭޝިއާގެ ލިމްކޮކްވިންގް ޔުނިވަސިޓީން ބިޒްނަސް އެޑްމިނިސްޓްރޭޝަން އިން ޕަބްލިކް ރިލޭޝަން އެންޑް ކޮމިއުނިކޭޝަން ދާއިރާއިން މާސްޓާސް ޑިގްރީ ހާސިލް ކުރައްވައިފަ އެވެ.

އެމްއެމްޕީއާރްސީގެ އެމްޑީގެ މަގާމު ހުސްވީ އެ މަގާމުގައި ހުންނެވި ފާތިމަތު ތައުފީގު މަގާމުން ވަކިކުރުމާ ގުޅިގެންނެވެ.

އެމްއެމްޕީއާރްސީ އަކީ ރާއްޖޭގެ އިގުތިސާދުގެ މައި ސިނާއަތް ކަމަށްވާ ޓޫރިޒަމް ޕްރޮމޯޓްކޮށް، އިޝްތިހާރުކުރުމުގެ މަސްއޫލިއްޔަތު އަދާކުރާ ކުންފުންޏެވެ.