އާއަހަރު ފެށުން ފާހަގަކުރަން މިފަހަރު ޑްރޯން ޝޯއަކާއި އެކު ފުޑް ފެސްޓިވަލެއް ހުޅުމާލޭގައި: ހަވާވެސް އަަރުވާނެ!

2025 ވަނަ އަހަރު ފެށުން ފާހަގަކުރުމަށް މޯލްޑިވްސް މާކެޓިން އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރްސީ) އިން ހުޅުމާލޭގައި ޚާއްސަ ހަރަކާތްތަކެއް ކުރިޔަށް ގެންދިޔުމަށް ތައްޔާރުވެއްޖެ އެވެ.

އެމްއެމްޕީއާރްސީން މިއަދު ބުނީ އައު އަހަރު ފެށުން ފާހަގަކުރުމަށް އެކޯޕަރޭޝަނުން ބާއްވާ ހަރަކާތްތައް މިއަހަރު އޮންނާނީ ހުޅުމާލެ ސެންޓްރަލް ޕާކުގައި ކަމަށެވެ. އެގޮތުން ބާއްވާ ދިވެހި ތަފާތު އެކި ބާވަތްތަކުގެ ރަހަ ބަލާލުމުގެ ފުރުސަތު ލިބިގެންދާ ފުޑް ފެސްޓިވަލް މި މަހުގެ 31 އަދި އަންނަ މަހުގެ އެއްވަނަ ދުވަހު ސެންޓްރަލް ޕާކުގައި ކުރިޔަށްދާނެކަން ވަނީ ހާމަކޮށްފައެވެ.

މި ފެސްޓިވަލްގެ ތެރެއިން ދިވެހި ސަގާފީ އެކި ހަރަކާތްތައް ވެސް ކުރިއަށް ގެންދިޔުމަށް ހަމަޖެހިފައިވާއިރު، ބޮޑުބެރުގެ ހަރަކާތްތައް ވެސް ކުރިއަށް ގެންދަން ވަނީ ނިންމާފަ އެވެ.

އަދި އައު އަހަރު ފެށުން ފާހަގަކުރުމަށް މިއަހަރު 31 ވަނަ ދުވަހުގެ ރޭ 21:00 ގައި ޚާއްސަ ޑްރޯން ޝޯއެއް ބޭއްވުމަށްވެސް ވަނީ ނިންމާފައި އެވެ. ފަތުރުވެރިއަކު ރާއްޖޭގައި ކުރާ ތަޖުރިބާ ދައްކާލާ މި ޑްރޯން ޝޯ އަކީ 15 މިނިޓަށް ކުރިޔަށްދާނެ ޑްރޯން ޝޯއެއްކަމަށް އެމްއެމްޕީއާރްސީން ބުނެއެވެ.

އަދި އައުއަހަރު ފަށާ ވަގުތު ކަމަށްވާ 1 ޖެނުއަރީ 2025 ވަނަ ދުވަހުގެ 00:00 ގައި ހަވާއެރުވުމަށްވެސް ވަނީ ނިންމާފައި އެވެ.

އެމްއެމްޕީއާރްސީއިން ކޮންމެ އަހަރަކުވެސް ރާއްޖޭގައި އައު އަހަރު ފެށުން ފާހަގަކުރުމަށް ޚާއްސަ ހަރަކާތްތައް ކުރިޔަށް ގެންދެއެވެ. އެގޮތުން މީގެ ކުރިން އެމްއެމްޕީއާރްސީން ވަނީ ރާއްޖޭގައި ބޭރުގެ ބައެއް ތަރިންގ ޝޯތައްވެސް އައު އަހަރު ފެށުމާއި ދިމާކޮށް ކުރިޔަށް ގެންގޮސްފައި އެވެ.