އީދަށް ގައްދޫވެސް ތައްޔާރު, ގިނަ ކުޅިވަރުތަކާއި އެކު ހަވާއެރުވުންވެސް އޮވޭ!

ކުރިޔަށް އޮތް އަޟްހާ އީދު ގދ ގައްދޫގައި ކުލަގަދަކޮށް ފާޙަގަކުރުމަށް އެރަށު ކައުންސިލުން ތައްޔާރުވެއްޖެ އެވެ.

ގައްދޫ ކައުންސިލުން އިސްނަގައިގެން ކުރިޔަށް ގެންދާ މި ހަރަކާތްތަކުގެ ތެރޭގައި ސަގާފީ ގިނަ ހަރަކާތްތަކެއް ކުރިޔަށް ގެންދިޔުމަށް ވަނީ ނިންމާފައި އެވެ. އޭގެ ތެރޭގައި އީދު މަޅިއާއި , ބޮޑު ޖަމާއަތުގައި އީދު ނަމާދު ކުރުމާއި އީދު ސަޔާއި ,އުޟްހިޔާ ކަތިލުމާއި , އީދު ކޯޑި ހަރަކާތާއި , އީދު ބޮޑުމަސް ހަރަކާތް ހިމެނެއެވެ.

މީގެ އިތުރުން އީދު ފާހަގަކުރުމަށްޓަކައި އީދު ދުވަހުގެ ރޭ އެރަށުގައި ހަވާއެރުވުމަށްވެސް ވަނީ ނިންމާފައި އެވެ.

ގައްދޫގައި ކުރިޔަށް ގެންދާ އީދު ހަރަކާތްތަކާއި ތަފްސީލް:

1. އީދު މަޅި: ޢީދު މަޅީގެ ޙަރަކާތް އޮންނާނީ ޢީދުވިލޭރޭ 9.00 ގައި ރަސްފަންނު ސަރަހައްދުގައި
2. އީދު ފެންކުޅި
3. މޮޓޯ ސްޕޯޓްސްގެ ޑްރޭގް ހަރަކާތްތައް
4. އީދު ނަމާދު : ޢީދު ނަމާދު ބޮޑު ޖަމާޢަތުގައި ކުރުން އޮންނާނީ ގައްދޫ ރަސްމީ ބޯޅަދަނޑުގައި. ޢީދު ނަމާދު ކުރުން އޮންނާނީ ޢީދު ދުވަހުގެ ހެނދުނު 7.00 ގައި.
5. އީދު ސައި : ޢިދު ނަމާދަށް ވަޑައިގަންނަވާ ހުރިހާ ފަރާތްތަށް ( ކުޑަކުދިންނާއި، އަންހެނުން،އަދި ފިރިހެން ބޭފުޅުން) ބައިވެރިވެވޭގޮތަށް ތައްޔާރުކޮށްފައިވާ ޢީދު ސައި އޮންނާނީ ޢީދު ނަމާދުކުރާ ތަނާއި ގުޅިގެންދާގޮތަށް ބޯޅަދަނޑުގައި
6. އުޟްހިޔާ ކަތިލުން: އުޟުޙިޔާ ކަތިލުން އޮންނާނީ ޢީދު ނަމާދަށްފަހު އޮންނަ ޢީދު ސައި ނިމުމުން.
7. އީދު ކޯޑި: ޢީދު ކޯޑި ކުޅުން އޮންނާނީ ގައްދޫގެ ބޮޑެތި މަގުތަކުގައި ޢީދު ދުވަހުގެ ހަވީރު 4.00 އިން ފެށިގެން 18.00 އަށް.
8. އީދު ބޮޑުމަސް:

އީދުގައި ގައްދޫގައި ކުރިޔަށްގެންދާ ހަރަކާތްތައް ކުރިޔަށް ގެންދިޔުމަށް ހަމަޖެހިފައިވަނީ އެރަށުގެ ކްލަބު ގަސްދޮށާއި މޮޓޯ ސްޕޯޓްސް އާއި ގދ އަތޮޅު މަދަރުސާއާއި އެރަށު ފެނަކަ ބްރާންޗާއި ސިއްހީ މަރުކަޒާއި ލަޔާ އެސޯސިއޭޝަނާއި ގުޅިގެންނެވެ.

މީގެ އިތުރުން އީދު ދުވަހުގެ ރޭ ބާއްވާ ހަރަކާތްތައް ކުރިޔަށް ގެންދިޔުމަށް ހަމަޖެހިފައިވަނީ އެރަށު ޓީ ޖެޓީ ސަރަހައްދުގައި އެވެ. އެރޭގެ 08:30 ގައި ފަށާ މި ހަރަކާތްތަކުގެ ތެރޭގައި އަޔާޑާ މޯލްޑިވްސް ރިސޯޓުގެ ފަރާތުން ކުރިޔަށްގެންދާ ފަޔަރސްޓޯންގ ކުޅިވަރާއި ގަސްދޮށު ޖަމާއަތުގެ ފަރާތުން ކުރިޔަށްގެންދާ ބޮޑުބެރުގެ ހަރަކާތްތަކާއި ސިއްހީ މަރުކަޒުގެ ފަރާތުން ކުރިޔަށް ގެންދާ ނެށުމުގެ ހަރަކާތްތައް ހިމެނެއެވެ. އަދި ހަވާ އެރުވުމުގެ ހަރަކާތްވެސް ކުރިޔަށް ގެންދިޔުމަށް ހަމަޖެހިފައިވަނީ އީދު ދުވަހުގެ ރެއެވެ.

ގައްދޫ ކައުންސިލުން ވަނީ އީދަށް ގައްދޫއަށް ވީހާވެސް ގިނަ ބަޔަކު ޒިޔާރާތް ކުރުމަށް އެދިފައި އެވެ.