ގަވާޢިދާއި ޚިލާފަށް މަސައްކަތްކުރާ ބިދޭސީން 30 ދުވަސްތެރޭ ރަށުން ފޭބުމަށް ގައްދޫ ކައުންސިލުން އަންގައިފި

ގަވާޢިދާއި ޚިލާފަށް ގައްދޫގައި މަސައްކަތްކުރާ ބިދޭސީން 30 ދުވަސްތެރޭ އެރަށުން ދިޔުމަށް ކައުންސިލުން އަންގައިފި އެވެ.

ގައްދޫ ކައުންސިލުން މިފަދައިން ނިންމާފައިވަނީ ގައްދޫގައި ޞައްޙަ އެމްޕްލޯއިމަންޓް އެޕްރޫވަލްއެއްނެތި(ލިޔެކިޔުން ފުރިހަމަނުވާ) ޤަވާޢިދާއި ޚިލާފަށް ޢާންމު ވިޔަފާރި މަޞްލަޙަތު ގެއްލޭގޮތަށް ރަށުތެރޭގައި ބިދޭސިން މަސައްކަތްކުރާކަމުގެ ޝަކުވާ ކެނޑިނޭޅި ކައުންސިލަށް ލިބެމުންދާތީ އަޅަން ނިންމާފައިވާ ޚާއްޞަ ފިޔަވަޅުތަކެއްގެ ގޮތުންނެވެ.

އެގޮތުން މި ފިޔަވަޅުތަކަކީ ހޯމް ލޭންޑް މިނިސްޓްރީއާއި އަދި ދިވެހި ފުލުހުންގެ އިދާރާއާއިއެކު ކައުންސިލުން ފެށި މަސައްކަތްތަކެއް ކަމަށް ގައްދޫ ކައުންސިލުން ވަނީ ބުނެފައި އެވެ.

ގައްދޫ ކައުންސިލުން ވަނީ ބިދޭސީން ބޭނުންކޮށްގެން ޤަވާޢިދާއި ޚިލާފަށް އެއްވެސް ބާވަތެއްގެ މުޢާމަލާތެއް ނުކުރުމަށާއި އަދި ތިރީގައިވާ ކަންކަމަށް ސަމާލުވުމަށް އެދިފައި އެވެ.

1. ޑޮމެސްޓިކް ސަރވަންޓް، ޑޮމެސްޓިކް އެޓެންޑެންޓް ނުވަތަ މިނޫންވެސް ގޭގައި މަސައްކަތްކުރުމުގެ ހުއްދައެއް އޮތް ބިދޭސީއަކު ރަށުތެރޭ މަސައްކަތްތަކަށް ނުފޮނުވުމަށާއި އަމިއްލަ އިޚްތިޔާރަށް މަސައްކަތްކުރަން ރަށުތެރެއަށް ދޫނުކުރުން.
2. ވިޔަފާރި ނަމެއްގައި، ކޮންޓްރެކްޓް އުޞޫލުން އެމްޕްލޯއިމަންޓް އެޕްރޫވަލްއާއިއެކު މަސައްކަތްކުރާ ބިދޭސީން އެވިޔަފާރިއެއް ޙަރަކާތްތެރިވާ ސައިޓެއްގައި މެނުވީ މަސައްކަތްނުކުރުން.
3. ޤަވާޢިދާއި ޚިލާފަށް މަސައްކަތްކުރާ ބިދޭސީންނަށް އެކަމަޑޭޝަންފަދަ ޚިދުމަތްތައް ނުދިނުން.
4. ޤަވާޢިދާއި ޚިލާފަށް މަސައްކަތްކުރާ ބިދޭސީން ބޭނުންކޮށްގެން މަސްވެރިކަމާއި، ދަނޑުވެރިކަން އަދި ވެލިނެގުން ފަދަ މަސައްކަތްތައް ނުކުރުން. މިއާއި ޚިލާފުވާ ފަރާތްތަކުގެ އުޅަނދުތަކާއި، ދަނޑުތަކުގެ ރަޖިސްޓްރީ ޚިދުމަތް ފަދަ ކައުންސިލުން ދޫކުރަންޖެހޭ ޚިދުމަތްތައް ދިނުން ހުއްޓާލެވޭނެވެ.
5. ޤަވާޢިދާއި ޚިލާފަށް ގައްދޫގައި މަސައްކަތްކުރާ ބިދޭސީންނާއި ގައްދޫ ކައުންސިލްގެ ބިދޭސީންގެ ދަފްތަރުގައި ޖެހިފައި ނުވާ ބިދޭސީން 30(ތިރީސް) ދުވަހުގެ މުއްދަތުގެ ތެރޭގައި ގައްދޫ ދޫކޮށް ދިޔުން.

ގައްދޫ ކައުންސިލުން ވަނީ މިއެންގުމާއި ޚިލާފަށް ޤަވާޢިދާއި ޚިލާފަށް ގައްދޫގައި ބިދޭސީން ބޭނުންކޮށްގެން މަސައްކަތްކުރުވާ ފަރާތްތަކާއި ހައްދެއް ސުމާރެއް ނެތް މިންވަރަށް، ހިތުހުރި ގޮތަކަށް އަމިއްލައަށް މުސާރައާއި އަގުހަދައިގެން ޤަވާޢިދާއި ޚިލާފަށް މަސައްކަތްކުރާ ބިދޭސީންނަށް، ދިވެހިރާއްޖޭގެ އިމިގްރޭޝަންގެ ޤާނޫނާއި އަދި ދިވެހިރާއްޖޭގައި ބިދޭސީން ވަޒީފާ އަދާކުރުމާބެހޭ ގަވާއިދުގެ ދަށުން ފިޔަވަޅު އެޅުމަށް ކަމާއިގުޅޭ އިދާރާއަށް ފޮނުވާނެ ކަމުގެ އިންޒާރުވެސް ދީފައި އެވެ.