ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމެޓީގެ މުގައްރިރަކަށް މުހައްމަދު އިސްމާއިލް!

ވިހި ވަނަ ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމެޓީގެ މުގައްރިރަކަށް ވިލިމާލެ ދާއިރާގެ މެމްބަރު މުހައްމަދު އިސްމާއީލް ހަމަޖައްސައިފިއެވެ.

މުހައްމަދު އިސްމާއީލު އެކޮމެޓީގެ މުގައްރިރު ކަމަށް ހަމަޖައްސާފައިވަނީ މިއަދު ބޭއްވި އެކޮމެޓީގެ ފުރަތަމަ ބައްދަލުވުމުގައި އެވެ. އެގޮތުން މިއަދުގެ ބައްދަލުވުމުގައި އޮތީ ކޮމެޓީގެ މުގައްރިރު ކަމާއި ނައިބު މުގައްރިރު ހޮވުމެވެ.

މިއަދުގެ ކޮމެޓީގައި މުގައްރިރަކަށް މުހައްމަދު އިސްމާއީލްގެ ނަން ހުށަހެޅުއްވީ ހެންވޭރު ހުޅަނގު ދާއިރާގެ މެމްބަރު އަލީ އިބްރާހިމް އެވެ. އަދި އަލީ އިބްރާހިމްގެ އެ ހުށަހެޅުއްވުމަށް ތާއީދު ކުރައްވާފައި ވަނީ ހުޅުމާލެ ދެކުނު ދާއިރާގެ މެމްބަރު އަހުމަދު ޝަމްހީދު އެވެ.

މިއަދުގެ ބައްދަލުވުމުގައި ކޮމެޓީގެ ނައިބު މުގައްރިރަކަށް ހަމަޖައްސާފައިވަނީ ފެލިދޫ ދާއިރާގެ މެމްބަރު އާދަމް ޒާހިރު އެވެ. އާދަމް ޒާހިރުގެ ނަންވެސް ހުށަހެޅުއްވީ ހެންވޭރު ހުޅަނގު ދާއިރާގެ މެމްބަރު އަލީ އިބްރާހިމް އެވެ.

20 ވަނަ ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމެޓީގައި ހިމެނިވަޑައިގަންނަވީ ޖުމުލަ 11 މެމްބަރުންނެވެ. އެގޮތުން މަޖިލީހުގައި ސުޕަ މެޖޯރިޓީ އޮތް ކޮންގްރެސް ޕާޓީގެ 8 މެމްބަރުން ހިމެނިވަޑައިގަންނަވާއިރު އެމްޑީއޭގެ އެއް މެމްބަރާއި އެމްޑީޕީގެ ދެ މެމްބަރު މި ކޮމެޓީގައި ހިމެނިވަޑައިގަންނަވައެވެ.

މުގައްރިރާއި ނައިބު މުގައްރިރުގެ އިތުރުން އެ ކޮމީޓީގައި ދެން ހިމެނިވަޑައިގަންނަވާ 9 މެންބަރުން:

• ހުޅުމާލެ ދެކުނު ދާއިރާގެ މެމްބަރު އަހުމަދު ޝަމްހީދު
• ހެންވޭރު ހުޅަނގު ދާއިރާގެ މެމްބަރު އަލީ އިބްރާހިމް
• ގަލޮޅު ދެކުނު ދާއިރާގެ މެމްބަރު މީކާއިލް އަހުމަދު ނަސީމު
• މައްޗަންގޯޅި ދެކުނު ދާއިރާގެ މެމްބަރު މުސްތަފާ ހުސެއިން
• އިހަވަންދޫ ދާއިރާގެ މެމްބަރު އަހުމަދު ނަސީރު
• ދިއްދޫ ދާއިރާގެ މެމްބަރު އަބްދުއްލަތީފު މުހައްމަދު
• މީދޫ ދާއިރާގެ މެމްބަރު އަހުމަދު ސިޔާމް
• ދާންދޫ ދާއިރާގެ މެމްބަރު މުހައްމަދު ފަޒީލް
• ފުވައްމުލައް މެދު ދާއިރާގެ މެމްބަރު އަލީ ފަޒާދު

ރައްޔިތުންގެ މަޖިލީހުގެ ގަވާއިދުގެ 113 ވަނަ މާއްދާގެ ދަށުން މި ކޮމިޓީގެ މަސްއޫލިއްޔަތަކީ، ސަރުކާރުން ހިންގަމުންގެންދާ ސިޔާސަތުތަކާ އުސޫލުތަކާ ގަވާއިދުތަކާ ޕްރޮޖެކްޓްތަކާ މަސައްކަތްތަކާ ބެހޭގޮތުން ކަމާގުޅޭ ޤާނޫނުތަކުގައި ބަޔާންވެގެންވާ ގޮތަށް އެ ކަންކަން ހިނގާތޯ ބެލުމާއި، ސަރުކާރުގެ ނިޒާމު އިސްލާޙުކުރުމަށްޓަކައި ކުރާ ކަންތައްތައް ބަލައި، އެކަންކަމާ ގުޅޭގޮތުން ފަންނީ ލަފާދިނުމާއި، ސަރުކާރުގެ މުއައްސަސާތަކުގެ މެންޑޭޓްތައް ދިރާސާކޮށް ފުށުއެރުންތައް ބަލައި އިޞްލާޙުކުރުމަށް ފެންނަ ކަންކަމުގައި ލަފާދިނުމާއި، ސަރުކާރުގެ މަސްއޫލިއްޔަތު ސަރުކާރުން އަދާކުރާ މިންވަރު ބެލުމާއި ދައުލަތުގެ ބަންޑާރަ ނައިބު ހިމެނޭގޮތުން ވަޒީރުންނަށް ރުހުންދިނުމާއި ވުޒާރާތަކުގެ މަސައްކަތްތައް ކަނޑައެޅުމުގައި މަޖިލީހަށް ލަފާދިނުމާއި ސަރުކާރުގެ ކަމާބެހޭ އިދާރާތަކުން އެކުލަވާލާ ޝާއިޢުކުރަމުންދާ އެކިއެކި ރިޕޯޓުތައް ދިރާސާކުރުމާއި، އިދާރީގޮތުން ސަރުކާރު ހިންގުމުގައާއި، ޤާނޫނުތައް ހެދުމުގެ ދާއިރާގައި ޢަމަލުކުރުމުގެ އުޞޫލުތައް ދިރާސާކުރުމާއި، އަދި ސަރުކާރުގެ ހިންގުން ހަރުދަނާކޮށް އިޞްލާޙުކުރުމާ ގުޅުންހުރި ކަންކަމާގުޅޭގޮތުން ތަޙްޤީޤްކޮށް ދިރާސާކުރުމެވެ.