ގާސިމް
ވިހި ވަނަ ރައްޔިތުންގެ މަޖިލީހުގެ މާލިއްޔަތު ކޮމިޓީގެ މުގައްރިރަކަށް މާމިގިލީ ދާއިރާގެ މެމްބަރު ގާސިމް އިބްރާހިމް ހަމަޖައްސައިފިއެވެ.
މީގެ ކުރިން ރާއްޖޭގެ މާލީ ވަޒީރުކުރަންވެސް ކުރެއްވި ގާސިމް މަޖިލީހުގެ މާލިއްޔަތު ކޮމެޓީގެ މުގައްރިރަކަށް ހަމަޖައްސާފައިވަނީ މިއަދު ބޭއްވި އެކޮމެޓީގެ ފުރަތަމަ ބައްދަލުވުމުގައި އެވެ. އެގޮތުން މިއަދުގެ ބައްދަލުވުމުގެ އެޖެންޑާގައި އޮތީ ކޮމެޓީގެ މުގައްރިރު ކަމާއި ނައިބު މުގައްރިރު ހޮވުމެވެ.
މުގައްރިރުގެ މަގާމަށް ގާސިމްގެ ނަން ހުށަހެޅުއްވީ އޭދަފުށީ ދާއިރާގެ މެންބަރު އަހުމަދު ސަލީމް އެވެ. ސަލީމްގެ މި ހުށަހެޅުމަށް ތާއީދު ކުރެއްވީ ބާރަށު ދާއިރާގެ މެމްބަރު އިބްރާހިމް ސުޖާއު އެވެ. ކޮމެޓީގެ ނައިބު މުގައްރިރަކަށް ހަމަޖައްސާފައިވަނީ އޭދަފުށީ ދާއިރާގެ މެމްބަރު ސަލީމް އެވެ. ސަލީމްގެ ނަން ކޮމެޓީއަށް ހުށަހެޅުއްވީ ބާރަށު ދާއިރާގެ މެމްބަރު ސުޖާއު އެވެ. އަދި އެހުށަހެޅުމަށް ތާއީދުކުރެއްވީ މާމިގިލީ ދާއިރާގެ މެމްބަރު ގާސިމް އެވެ.
20 ވަނަ ރައްޔިތުންގެ މަޖިލީހުގެ މާލިއްޔަތު ކޮމިޓީގައި ހިމެނިވަޑައިގަންނަވީ ޖުމުލަ 11 މެމްބަރުންނެވެ. އެގޮތުން މަޖިލީހުގައި ސުޕަ މެޖޯރިޓީ އޮތް ކޮންގްރެސް ޕާޓީގެ 8 މެމްބަރުން ހިމެނިވަޑައިގަންނަވާއިރު ޖޭޕީގެ އެއް މެމްބަރަކާއި މައިނޯރިޓީގައި އޮތް އެމްޑީޕީގެ 2 މެމްބަރުން މި ކޮމެޓީގައި ހިމެނިވަޑައިގަންނަވައެވެ.
ގާސިމް އާއި ސަލީމްގެ އިތުރުން އެ ކޮމީޓީގައި ދެން ހިމެނިވަޑައިގަންނަވާ 9 މެންބަރުން:
- ފުނަދޫ ދާއިރާގެ މެންބަރު މުހައްމަދު މަމްދޫހް
- ހިތަދޫ މެދު ދާއިރާ މެންބަރު އަހުމަދު އަޒާން މަރުޒޫގް
- ކެލާ ދާއިރާގެ މެންބަރު އަބްދުﷲ ޝަރީފް
- ފުވައްމުލަކު އުތުރު ދާއިރާގެ މެންބަރު ހަމަދު އަބްދުﷲ
- ބާރަށު ދާއިރާގެ މެންބަރު އިބްރާޙިމް ޝުޖާއު
- ދިއްގަރު ދާއިރާގެ މެންބަރު އަހުމަދު ނާޒިމް
- ގެމަނަފުށީ ދާއިރާގެ މެންބަރު އަސަދުﷲ ޝިހާބް
- ހުޅުމާލެ ދެކުނު ދާއިރާގެ މެންބަރު އަހުމަދު ޝަމްހީދު
- ހަނިމާދޫ ދާއިރާގެ މެންބަރު އަބްދުލް ގަފޫރު މޫސާ
މާލިއްޔަތު ކޮމެޓީގެ މަސްއޫލިއްޔަތަކީ، ދައުލަތުގެ އިދާރާތަކުން ކުރާ އެކިއެކި ޚަރަދަކީ ޤާނޫނު ހުއްދަކުރާ ގޮތުގެމަތިން އަދި މަޖިލީހުން ފާސްކޮށްފައިވާ ބަޖެޓާ އެއްގޮތްވާ ގޮތުގެމަތިން ކުރާ ޚަރަދުތަކެއްތޯ ބެލުމާއި، މަޖިލީހުން ފާސްކުރާ ފައިސާގެ ޢަދަދުތައް ހޭދަކުރެވިގެން ނުވަތަ ޚަރަދުކުރެވިގެންދަނީ އެކަންކަމަށްތޯ ބެލުން ހިމެނެއެވެ. އަދި ހުއްދަކޮށްފައިވާ މިންވަރަށްވުރެ އިތުރަށް ދައުލަތުގެ އިދާރާތަކުން ފައިސާ ޚަރަދުކޮށްފައިވާނަމަ، އެގޮތަށް ފައިސާ ޚަރަދުކުރަންޖެހުނު ސަބަބާއި ޙާލަތު ކޮމިޓީން ބެލުން ހިމެނެއެވެ. މިގޮތުން ދައުލަތުގެ މާލިއްޔަތާ ގުޅޭގޮތުން ކަންކަން ބެލުމުގައި، ދައުލަތުގެ އިދާރާތަކާއި، ދައުލަތުގެ ޙިއްޞާވާ ކުންފުނިތަކާއި ދައުލަތުގެ ވިޔަފާރި އިދާރާތަކާއި، ދައުލަތުގެ މިނިވަން އިދާރާތަކުގެ މާލީ ހިސާބުތައް ދިރާސާކުރުމާއި، އޮޑިޓަރ ޖެނެރަލްގެ އެކިއެކި ރިޕޯޓްތައް ދިރާސާކުރުމާއި އަޅަންޖެހޭ ފިޔަވަޅުތައް ފާހަގަކޮށް، ދައުލަތުގެ ކަމާބެހޭ އިދާރާތަކަށް އެންގުން ހިމެނެއެވެ.
މީގެ އިތުރުން، ދައުލަތަށް ލޯނު ނެގުމާއި ދައުލަތުގެ ފަރާތުން ގެރެންޓީ ދިނުމުގައި މަޖިލީހުގެ ފަރާތުން އަދާކުރަންޖެހޭ ދައުރާ ގުޅިގެން ކަންކަންކުރުމާއި، މޯލްޑިވްސް މަނިޓަރީ އޮތޯރިޓީއާއި އޮޑިޓަރ ޖެނެރަލްގެ އޮފީހުން ކުރާ މަސައްކަތްތައް ބެލުމާއި، އަދި ރައްޔިތުންގެ މަޖިލީހުން ކަނޑައަޅަންޖެހޭ މުސާރަތައް ކަނޑައެޅުމުގައި އެހެން ކޮމިޓީތަކުގެ މަޝްވަރާ ހޯދުން ހިމެނެއެވެ.
ފަހުގެ
