ރުހުން ނުލިބޭ ތިން ވަޒީރުންނަށް ރުހުން ދިނުމަށް މާދަމާގެ މަޖިލިސް ޖަލްސާއަށް އެޖެންޑާކޮށްފި

ސަރުކާރުގެ ކެބިނެޓުގައި ހިމެނިވަޑައިގަންނަވާ ވަޒީރުންގެ ތެރެއިން ރައްޔިތުންގެ މަޖިލީހުގެ ރުހުން ލިބިވަޑައިނުގެން ތިއްބެވި ތިން ވަޒީރުންނަށް ރުހުން ދިނުމަށް، މާދަމާ އޮންނަ މަޖިލީހުގެ ޖަލްސާއަށް އެޖެންޑާކޮށްފިއެވެ.

19 ވަނަ ރައްޔިތުންގެ މަޖިލީހުގެ މެޖޯރިޓީގައި އިދިކޮޅު އެމްޑީޕީ އޮވެ، ރައީސް ޑރ. މުޙައްމަދު މުޢިއްޒުގެ ކެބިނެޓުގައި ހިމެނިވަޑައިގަންނަވާ ވަޒީރުންގެ ތެރެއިން ތިން ވަޒީރަކަށް ރުހުން ނުދޭން ވަނީ ފާސްކޮށްފައެވެ. އެ ތިން ވަޒީރުންނަކީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމު އަލީ ސަޢީދުގެ އިތުރުން ބަންޑާރަ ނައިބު އަޙްމަދު އުޝާމު ގެދޮރުވެރިކަމާ ބެހޭ ވަޒީރު ޑރ އަލީ ހައިދަރުއެވެ.

މި ވަޒީރުންނަށް ރުހުން ދިނުމުގެ މައްސަލަ މާދަމާ އޮންނަ 20 ވަނަ ރައްޔިތުންގެ މަޖިލީހުގެ ދެވަނަ ޖަލްސާއަށް އެޖެންޑާކޮށްފައިވާއިރު، މި ދައުރުގެ މަޖިލީހުގެ ސުޕަމެޖޯރިޓީ އޮތީ ވެރިކަން ކުރާ ޕީއެންސީގެ އަތުގައެވެ.

އެގޮތުން މާދަމާ އޮންނަ ޖަލްސާގައި ޖުޑިޝަލް ސާވިސް ކޮމިޝަން (ޖޭއެސްސީ)ގައި މަޖިލިސް ތަމްސީލު ކުރާނެ މެންބަރަކު ހޮވުމަށް ވެސް ވަނީ އެޖެންޑާކޮށްފައެވެ.

ރައްޔިތުންގެ މަޖިލީހުގެ 20 ވަނަ ދައުރުގެ ދެވަނަ ޖަލްސާ މާދަމާ އޮންނައިރު، ވެރިކަން ކުރާ ޕީއެންސީގެ 75 މެންބަރަކު މަޖިލީހުގައި ތިއްބަވައެވެ. އަދި އިދިކޮޅު މައި ޕާޓީ އެމްޑީޕީގެ 12 މެންބަރުން ތިއްބަވާއިރު ދެން އެންމެ ގިނަ މެންބަރުން ތިއްބެވީ އެމްޑީއޭގައެވެ. އެގޮތުން އެމްޑީއޭގެ ދެ މެންބަރަކު މަޖިލީހުގައި އިންނަވާއިރު، ދެން ތިއްބެވީ އަމިއްލަ ދެ މެންބަރަކާއި، ޖުމްހޫރީ ޕާޓީގެ މެންބަރަކާއި އެމްއެންޕީގެ މެންބަރަކާއި އަދި އެމްޑީއޭގެ ދެ މެންބަރުންނެވެ.