ސަލްމާން މިސްކިތް
ސިޚުރަކީ ކާފިރުވާފަދަ ބޮޑު ފާފައެއް ކަމަށާއި، އެ ފާފައާ ދުރުހެލިވުމަށް މިއަދުގެ ހުކުރު ޚުތުބާގައި ގޮވާލައިފިއެވެ.
ސިޚުރުގެ ނުބައިކަމުގެ މައްޗަށް އަލިއަޅުވާލައި މިއަދުގެ ހުކުރު ނަމާދުގައި ދިން ހުތުބާގައި ބުނީ، މިއަދު މިގައުމުގައި ފެތުރިފައިވާ ކުށްތަކުގެ ތެރޭގައި، އެ ކުށްތަކަކަށް އަރައިގަތުމުން، ދީނުން ބޭރުވާ ފަދަ ކުށްތަކެއްވާ ކަމަށާއި، އޭގެ ތެރެއިން އެއްކުށަކީ ސިޙުރުކަމަށެވެ.
އަދި ސިހުރަކީ މިއަދު މި މުޖްތަމަޢުގައި ޢާންމުވެފައިވާ ނުބައި ޢަމަލެއް ކަމަށާއި، ސިޚުރު ހަދާ މީހެއްގެ ގާތަށް ގޮސް، އޭނާގެ ބަސް ތެދުކޮށް އަދި އޭނާގެ ކިބައިން އެހީތެރިކަން ހޯދައިފިމީހާ ވެސް ކާފިރުވާނެ ކަމަށް ޚުތުބާގައި ބުންޏެވެ.
ސިޙުރުގެ ސަބަބުން ޢާއިލާތައް ރޫޅި، ދެމަފިރިންގެ ޒަވާޖީ ޙަޔާތް ބަރުބާދުވެއެވެ. ރަޙްމަތްތެރިންގެ މެދުގައި ރުޅިވެރިކަމާއި، ޢަދާވާތްތެރިކަން އުފެދެއެވެ. ދަރިވަރުންގެ ތަޢުލީމަށް ހުރަސްއެޅެއެވެ. ޞިއްޙަތު ސަލާމަތުން ހުރި މީހާ ބަލިވެ، ހިތާމަޔާއި، ވޭން ތަޙައްމަލުކުރަން ޖެހެއެވެ. އެފަދަ ޢަމަލެއް ކުރާ މީހެއްގެ ގާތަށް ގޮސް، އޭނާގެ ބަސް ތެދުކޮށް، އޭނާގެ ކިބައިން އެހީތެރިކަން ހޯދައިފި މީހާ، ކީރިތި ރަސޫލާ ގެ މައްޗަށް ބާވައިލެއްވި ތަކެއްޗަށް ކާފިރުވެއްޖެއެވެ. މިނުބައި ފާސިދު ޢަމަލު މިއަދު ވަނީ މުޅި މުޖުތަމަޢަށް ޢާންމުވެފައެވެ، - ހުކުރު ޚުތުބާ
ޚުތުބާގައި އިތުރަށް ބުނީ، ސިޚުރަކީ ޙަޤީގަތެއް ކަމަށާއި، އޭގެ އެއް ބާވަތަކީ އެކަން ކުރާ މީހުންގެ ކުޅަދާނަކަމުން މީސްތަކުންގެ ލޯމައްޗަށް އޮޅުވާލާ އޮޅުވާލުމަކަށް ސިޚުރުވުން ކަމަށެވެ. އަދި އަނެއް ބާވަތަކީ މީހުންގެ ހިތްތަކާއި ހަށިގަނޑަށް އޭގެ އަސަރު ފޯރާ ބާވަތެއް ކަމަށެވެ.
އެގޮތުން އެ ބާވަތުގެ ސިޚުރު ހެދުމަށް މީހުންގެ އިސްތަށްޓާއި، ނިޔަފައްޗާއި، ފުނަލުގެ ދަތާއި، ފޭރަން އަދި ފައިވާން ފަދަ ތަކެތި ބޭނުންކުރާ ކަމަށާއި، އެ ބާވަތުގެ ސިޚުރު ހަދައިގެން މީހުން މޮޔަ ކުރުމާއި، ބަލި ކުރުމާއި، މަރާލުމުގެ އިތުރުން ދެމަފިރިން ރުޅުކުރުވުމާއި ދުރުކުރުވާފަދަ ސިޚުރުތައް ހަދާ ކަމުގައި ވެސް ޚުތުބާގައި ބުންޏެވެ.
ޚުތުބާގައި އިތުރަށް ބުނީ، ސިޚުރަކީ ކާފިރުވާފަދަ ބޮޑު ފާފަފއެއް ކަމަށާއި، އެ ފާފައަކީ ދެދުނިޔޭގެ ގެއްލުމާއި ހަލާކަށް މަގުފަހިވާ ފާފަފެއް ކަމަށެވެ. އެހެން ކަމުން އެ ޢަމަލުން ދުރުވުމަށް ޚުތުބާގައި ވަނީ ގޮވާލާފައެވެ.
މުސްލިމް އަޚުންނޭވެ! ސިޙުރަކީ ކާފިރުވާ ފަދަ ބޮޑުފާފައެކެވެ. އެއީ ދެދުނިޔޭގެ ގެއްލުމާއި ހަލާކަށް މަގުފަހިވާ ޢަމަލެކެވެ. ތިޔަބައިމީހުން ސިޙުރުހާހޫރައާ ދުރުހެލިވާށެވެ! އަދި މުޞީބާތްތަކުން މިންޖުވުމަށާއި، ބޭނުންވާ ކަންކަމުގައި، އިޚްލާޞްތެރިކަމާ އެކު މާތް ﷲ ގެ ޙަޟްރަތުގައި ދުޢާ ދަންނަ ވާށެވެ! އެކަލާނގެއީ އަޅުތަކުންގެ ދުޢާ އިޖާބަކުރައްވާ ރަސްކަލާނގެއެވެ،- ހުކުރު ޚުތުބާ
ހުތުބާގައި ވަނީ ނޭދެވޭ ކަންކަމުން ރައްކާތެރިވުމަށް ކުރެވިދާނެ ކަންކަން އިސްލާމްދީނުގައި އަންގަވާފައިވާކަން ފާހަގަކޮށްފައެވެ. އެގޮތުން އެންމެ މުހިންމުކަމަކީ ފަރްޟު ފަސް ނަމާދަށް ރައްކާތެރިވުންކަމުގައި ފާހަގަކުރަމުން ޚުތުބާގައި ބުނީ. ދެވަނަ ކަމަކީ ޝައިތާނާގެ ކިބައިން ރައްކާތެރިވުމަށް ﷲގެ ހަޟްރަތުގައި ދުޢާ ދެންނެވުން ކަމަށެވެ.
ފަހުގެ
