މަޖިލީހުގެ ނައިބު ރައީސް ނާޒިމް
އިއްޔެ ހުވާކުރި ވިިހި ވަނަ ރައްޔިތުންގެ މަޖިލީހުގެ ކޮމެޓީއަށް އެކުލަވާލުމުގެ މަސައްކަތަކުގެ ތެރެއިން ގެދޮރުވެރިކަމަށް ޚާއްސަ ކޮމެޓީއެއް އުފައްދަވާނެ ކަމަށް ރައްޔިތުންގެ މަޖިލީހުގެ ނައިބު ރައީސް އަޙްމަދު ނާޒިމް ވިދާޅުވެއްޖެ އެވެ.
ނާޒިމް މިފަދައިން ވިދާޅުވީ ރޭ ދައުލަތުގެ މީޑިއާއިން ގެނެސްދިން ޕްރޮގްރާމެއްގައި ވާހަކަފުޅު ދައްކަވަމުންނެވެ. އެގޮތުން ނާޒިމް ވިދާޅުވީ ރައްޔިތުންގެ މަޖިލީހުގެ ދާއިމީ ކޮމެޓީތަކުގެ ތެރޭގައި ގެދޮރުވެރިކަމާ ގުޅުންހުރި ކަންކަމަށް ޚާއްޞަކޮށްގެން ކޮމިޓީއެއް އުފައްދަވަން ނިންމާފައިވާ ކަމަށެވެ.
ގެދޮރުވެރިކަމާ ބެހޭ ކޮމިޓީ އުފެއްދުމަށް ވެރިކަން ކުރާ ޕީއެންސީން ބޭނުންވި ނަމަވެސް ވިހިވަނަ މަޖިލިސް ފެށި ޖަލްސާގައި އެކަން ނުކުރެވުނީ ގެދޮރުވެރިކަމާބެހޭ އެކި ކަންކަމުގެ މެންޑޭޓް އޮތް ކޮމިޓީތައް މިހާރު ވެސް ހުރުމުން ކަން ފާހަގަކުރައްވައި ނާޒިމް ވިދާޅުވީ އާންމު ކޮމިޓީން މަޖިލީހުގެ ގަވާއިދަށް ގެންނަ ބަދަލުތަކާއެކު އެ ކޮމިޓީ އުފެއްދޭނެ ކަމަށެވެ. އަދި މި ކޮމެޓީ އަންނަ މަސް ނިމުމުގެ ކުރިން އުފެއްދޭނެކަން ނާޒިމް ހާމަކުރެއްވި އެވެ.
ނާޒިމް ވިދާޅުވީ މި ކޮމެޓީއާއި އެކު ގެދޮރުވެރިކަމާ ބެހޭ ހުރިހާ މައްސަލަތަކެއް އެކޮމެޓީއިން ދިރާސާކޮށް ޖަވާބުދާރީ ކުރުވަން ޖެހޭ ފަރާތްތަކާއި ސުވާލުކުރެވިގެންދާނެ ކަމަށެވެ. މިއާއި އެކު ގެދޮރުވެރިކަމާ ގުޅިގެން މީގެ ކުރިން ދިމާވެފައިހުރި މައްސަލަތަކަށް ދާއިމީ ޙައްލު ލިބުމަށް މަގުފަހިވެގެންދާނެ ކަމަށެވެ.
މަޖިލީހުގެ ކޮމެޓީތައް އަންނަ މަސް ނިމުމުގެ ކުރިން އެކުލަވާލާނެ ކަން މަޖިލީހުގެ ސުޕާމެޖޯރިޓީ އޮތް ޕީއެންސީގެ ޕީޖީއިން އިއްޔެ ވަނީ ހާމަކޮށްފައި އެވެ.
ފަހުގެ
