ޕީއެސްއެމްގެ އެތެރޭގެ ޚިޔާނާތުގެ މައްސަލައެއް: ތިޖުރީގައި އޮތީ 7 ރުފިޔާ، މުޅި ޖުމްލަ 4 މިލިއަން ރުފިޔާގެ ޚިޔާނަތް!

ޕަބްލިކް ސާވިސް މީޑިޔާ (ޕީއެސްއެމް)ގެ މުވައްޒަފަކު އެ ކުންފުނީގެ ފައިސާއަށް ޚިޔާނަތްތެރިވިކަމުގެ މައްސަލައެއް ފެންމަތިވެ، އެ މައްސަލަ ތަހުގީގު ކުރުމުގެ މަސައްކަތް އެ ކުންފުނިން ފަށައިފިއެވެ.

ޕީއެސްއެމްގެ ފައިސާއަށް ޚިޔާނަތްތެރިވިކަމުގެ ތުހުމަތު ކުރެވެނީ އެ ކުންފުނީގެ ކުރީގެ ފައިނޭންސް ހެޑްގެ މަގާމުގައި ހުންނެވި ފަރާތަށެވެ. އެގޮތުން އޭނާގެ މައްޗަށް ތުހުމަތުކުރެވެނީ ކުންފުނީގެ ފައިސާއަށް ޚިޔާނަތްތެރިވެ، ޑޮލަރު މާރުކުރުމުގެ ނަމުގައި ކުންފުނީގެ ފައިސާ ނަހަމަ ގޮތުގައި ބޭނުންކޮށްފައިވާ މައްސަލައެވެ.

އެ މައްސަލައިގެ މައުލޫމާތު ދެއްވަމުން މިއަދު ޕީއެސްއެމްއިން ބޭއްވި ނޫސްވެރިންގެ ބައްދަލުވުމުގައި އެ ކުންފުނީގެ މެނޭޖިން ޑިރެކްޓަރު ޒީނާ ޒާހިރު ވިދާޅުވީ، އެ ކުންފުނީގެ ފައިނޭންސްގެ ހެޑްގެ މަގާމުގައި ހުންނެވި ބޭފުޅާގެ ފަރާތުން ކުންފުނީގެ ފައިސާއިން ޑޮލަރު މާރުކުރުމުގެ ނަމުގައި، ކުންފުނީގެ ބޭނުންތަކަށް ނޫން ބޭނުންތަކަށް ބޭނުންކޮށްފައިވާކަން ފާހަގަ ކުރެވި، އެ މައްސަލަ ފުލުހުންނަށް އަދި އޮޑިޓާ ޖެނެރަލްގެ އޮފީހަށް ހުށަހަޅާފައިވާ ކަމަށެވެ. އަދި އެ މައްސަލައިގެ ޖިނާއީ ތަހުގީގެއް ފުލުހުން މިހާރު ހިންގަމުން އަންނަ އިރު، އެ މައްސަލައާ ގުޅިގެން ކުންފުނި އޮޑިޓް ކުރުމުގެ މަސައްކަތް އޮޑިޓާ ޖެނެރަލްގެ އޮފީހުން ކުރަމުން އަންނަ އިރު، އެ މައްސަލައިގައި ތުހުމަތުވާ މުވައްޒަފު މިހާރު ވަޒީފާއިން ވަކިކޮށްފައިވާ ކަމަށް ވެސް ޒީނާ ވިދާޅުވިއެވެ.

މައްސަލަ ފެންމަތިވުން

މި މައްސަލަ ފެންމަތިވެފައިވަނީ އެ ކުންފުނީގެ ނަގުދު ފައިސާގެ ގޮތުގައި ތިޖުރީގައި ހުރި ފައިސާގެ އަދަދުތައް ލޮގު ކުރުމުގައި ފާހަގަ ކުރެވުނު މައްސަލަތަކުންނާއި، 2020 ވަނަ އަހަރުން ފެށިގެން ކުންފުނީގެ ފައިސާއިން ޑޮލަރު ގަނެފައި ހުރި ނަމަވެސް، ކުންފުނީގައި ޑޮލަރު ނެތުމުގެ އިތުރުން، ކުންފުނީގެ މާލީ ސްޓޭޓްމެންޓްތައް އަދާހަމަނުކޮށް ހުރުމާއި، އެކި ފަރާތްތަަކަށް ހަދަމުންދިޔަ ޕޭމެންޓް ވައުޗަރުތައް އަދާހަމަނުކޮށް ހުރި ހިސާބުން، މި އަހަރުގެ ތެރޭގައެވެ.

އެގޮތުން އެ މައްސަލަ ފެންމަތިވުމާއެކު، މިދިޔަ މަހުގެ ތެރޭގައި އެ ކުންފުނީގެ ޚާއްސަ އޮޑިޓެއް ކުރުމަށް އެދި އޮޑިޓާ ޖެނެރަލްގެ އޮފީހަށް ކުންފުނީގެ ފަރާތުން އެދުނު އިރު، އެ މައްސަލައިގެ ތެރެއިން އެ ކުންފުނިން ހިންގި ތަހުގީގުން އެނގުނީ، ކުންފުނީގެ ތިޖޫރީގައި އޮތީ އެންމެ ހަތް ރުފިޔާކަމުގެ އިތުރުން، ކުންފުނިން ހަތަރު މިލިއަން ރުފިޔާ މަދުވާކަމެވެ.

އެގޮތުން ޕީއެސްއެމްގެ ތިޖޫރީގައި ހުންނަ ފައިސާއަކީ ޙާއްސަ ޙާލަތްތަކުގައި ބޭނުންކުރުމަށް ހުންނަ ނަގުދު ފައިސާކަމަށް ވާއިރު، މުޅިއަކު އެއްލައްކައާއި ދެ ލައްކައާ ދެމެދުގެ ފައިސާ ތިޖޫރީގައި ހުންނާނެ ކަމަށް އެ ކުންފުނިން ގަބޫލުކުރެއެވެ. އެހެން ނަމަވެސް އެ މައްސަލަ ފެންމަތިވެ، ފުލުހުންނާއި، އޮޑިޓާ ޖެނެރަލްގެ އޮފީހުގެ ފަރާތްތަކާއި އަދި ކުންފުނީގެ އެކި ފަރާތްތަކުގެ ހާޒިރުގައި ތިޖޫރީ ހުޅުވުއިރު، ކުންފުނީގެ ތިޖޫރީގައި އޮތީ އެންމެ ހަތް ރުފިޔާއެވެ.

މީގެ އިތުރުން، ޕީއެސްއެމް އަކީ ބޭރުގެ ކުންފުނިތަކަށް ބަރޯސާވެ، އެފަދަ ކުންފުނިތަކަށް ޑޮލަރުން ފައިސާ ދައްކަން ޖެހޭ ކުންފުންޏަކަށްވާއިރު، އެފަދަ ކުންފުނިތަކަށް ފައިސާ ދެއްކުމުގެ ނަމުގައި ޕީއެސްއެމް އިން ދިވެހި ރުފިޔާ ނެގި ނަމަވެސް، އެފަދަ ކުންފުނިތަކުގެ ޕޭމެންޓްތައް ނުދައްކާ ހުރިކަން ވެސް އެ ކުންފުންޏަށް ވަނީ ފާހަގަވެފައެވެ.

އަދި އެ ފައިސާ ކުންފުނިން ނަގާފައިވަނީ ކުންފުނީގެ މެނޭޖްމެންޓްގެ ހުއްދައެއް ނެތި ކަމަށްވާއިރު، މުޅި ޖުމްލަ ފައިސާގެ އަދަދު ހަތަރު މިލިއަން ރުފިޔާއަށް އަރާ ކަމަށް މިއަދުގެ ނޫސްވެރިންގެ ބައްދަލުވުމުގައި ކުންފުނީގެ އިސްވެރިން ވިދާޅުވެފައިވެއެވެ.

އެ ފައިސާ ކުންފުންޏަށް ނުލިބި، އަމިއްލަ ފަރާތަކަށް ޖަމާކޮށްފައިވާ ކަމަށްވާއިރު، މިހާރު އެ މައްސަލަ ފުލުހުން ގެންދަނީ ތަހުގީގުކުރަމުންނެވެ.

ޖުމްލަ 261 މިލިއަން ރުފިޔާގެ ދަރަންޏެއް އޮތް ޕީއެސްއެމް އިން އެފަދަ މައްސަލައެއްގެ ވާހަކަތައް ހިއްސާކޮށްފައިވާއިރު، އެ ވާހަކަތައް އެ ކުންފުނިން ހިއްސާކޮށްފައިވަނީ މީސް މީޑިޔާގައި އެކުންފުންނާއި އެކުންފުނީގެ އިސްވެރިންނަށް ޚިޔާނާތުގެ ތުހުމަތުތަކެއް އަމާޒުކުރަމުންދާ ދުވަސްވަރެއްގައެވެ. އެފަދަ ތުހުތަމުތަކަކީ ދޮގު ތުހުމަތުތަކެއް ކަމަށް އެކުންފުނީގެ މެނޭޖިން ޑިރެކްޓަރު ޒީނާ ވަނީ ވިދާޅުވެފައެވެ.