ޕީއެސްއެމްގެ ޚިޔާނާތުގެ މައްސަލަ ޖުލައި މަހުން ފެށިގެން އަންނަނީ ތަހުގީގު ކުރަމުން - އޭސީސީ

ޕަބްލިކް ސާވިސް މީޑިއާ (ޕީއެސްއެމް) ގެ ހިޔާނާތުގެ މައްސަލައެއް ތަހުގީގު ކުރަމުންދާ ކަމަށް އެންޓި ކޮރަޕްޝަން ކޮމިޝަން (އޭސީސީ)އިން ބުނެފި އެވެ.

އޭސީސީން މިއަދު ބުނީ ޕީއެސްއެމް އިން ޑޮލަރު ގަތުމަށް ނެގި ފައިސާ އާއި އާމްދަނީގެ ގޮތުގައި ބަލައިގަނެފައިވާ ފައިސާއާގުޅޭ މައްސަލަ އެކޮމިޝަނުން ތަހުގީގުކުރަމުންދާ ކަމަށެވެ. އެގޮތުން މި މައްސަލައަކީ ފަބްލިކް ސަރވިސް މީޑިއާއިން އެ ކޮމިޝަނަށް ހުށަހަޅައިގެން އެ ކޮމިޝަނުން މި ޖުލައި މަހުން ފެށިގެން ތަޙުޤީޤު ކުރަމުންއަންނަ މައްސަލައެއް ކަމަށް ވެސް އޭސީސީން ވަނީ ބުނެފައި އެވެ.

އަދި ކޮމިޝަނުންވަނީ މައްސަލައިގެ "ޕްލިމިނަރީ ތަޙުޤީޤު" ނިންމައި، އިތުރަށް ތަޙުޤީޤު ކުރަންޖެހޭ ކަންކަން ހުރުމާއެކު މި މައްސަލަ އިތުރަށް ތަޙުޤީޤުކުރަން ފަށައިފައިކަންވެސް އޭސީސީން ބުނެއެވެ.

އޭސީސީން އިތުރަށް ބުނީ މި މައްސަލައާއި ގުޅުންހުރި ޕީއެސްއެމްގެ ޚާއްސަ އޮޑިޓް ކުރިޔަށް ދިޔައިރު، އޮޑިޓަރ ޖެނެރަލްގެ އޮފީހުން އެ ކޮމިޝަނާ މަޝްވަރާކޮށް، މައްސަލައާ ގުޅުންހުރިހެއްކާއި ޤަރީނާއަށް އަސަރު ނުކުރާނެގޮތަށް ދެ މުއައްސަސާއިން އެކުގައިވަނީ މަސައްކަތްކޮށްފައި ކަމަށެވެ.

މި މަހުގެ ތެރޭގައި ދިވެހި ފުލުހުންގެ ޚިދުމަތުންވެސްވަނީ މިމައްސަލަ އޭސީސީއަށް ހުށަހަޅާފައި އެވެ.

މި ހިޔާނާތާގުޅޭ އޮޑިޓު ރިޕޯޓު އޮޑިޓު އޮފީހުން އާންމުކޮށްފައިވާއިރު، އެ ރިޕޯޓުގައި ބުނެފައިވަނީ އެ ކުންފުންޏަށް ޑޮލަރު ގަތުމަށް ކަމަށް ބުނެ ނެގި ފައިސާގެ ތެރެއިން ބޮޑު އަދަދެއް އަދި އާމްދަނީގެ ގޮތުގައި ލިބުނު ފައިސާއިން ބޮޑު އަދަދެއް ގެއްލިފައިވާ ކަމަށެވެ. އެގޮތުން ރާއްޖެއިން ބޭރުގެ ފަރާތްކަށް ޑޮލަރުން ދައްކަންޖެހޭ ފައިސާ ދެއްކުމަށް ޑޮލަރު ގަތުމަށް 2020 ވަނަ އަހަރުން ފެށިގެން 2024 ވަނަ އަހަރުގެ އެޕްރީލު މަހުގެ ނިޔަލަށް ޕީއެސްއެމްގެ ބޭންކް އެކައުންޓުން ނަގާފައިވާ ފައިސާގެ ތެރެއިން 4.6 މިލިއަން ރުފިޔާ އާއި 2017 ވަނަ އަހަރުން ފެށިގެން 2024 ވަނަ އަހަރުގެ އެޕުރީލު މަހުގެ ނިޔަލަށް ޕީއެސްއެމް އަށް އާމްދަނީ އާއި އެހެނިހެން ގޮތްގޮތުން ބަލައިގަނެފައިވ ނަގުދު ފައިސާގެ 4.3 މިލިއަން ރުފިޔާ އަދި ތިޖޫރީގައި ބެހެއްޓި ނަގުދު ފައިސާގެ ތެރެއިން 190،000ރ. ކަމަށެވެ.

އެ ރިޕޯޓުގައި ބުނެފައިވާ ގޮތުން 2020 އިން 2024 ވަނަ އަހަރުގެ އޭޕްރީލްގެ ނިޔަލަށް އެކި ފަހަރުމަތިން ޕީއެސްއެމްގެ އެކައުންޓުން 5.8 މިލިއަން ރުފިޔާ ވަނީ ނަގާފަ އެވެ. މި ފައިސާގެ ތެރެއިން ކުންފުންޏަށް ލިބިފައިވަނީ 1.20 މިލިއަން ރުފިޔާއަށްވާ 76،000 ޑޮލަރު ކަމަށް އޮޑިޓް ރިޕޯޓުގައި ބުނެފައިވެ އެވެ. އަދި މި ފައިސާގެ ތެރެއިން ޕީއެސްއެމްގެ ކުރީގެ ފައިނޭންސް ޑިރެކްޓަރު އަހްމަދު ހަނީފުގެ ދަރިއެއްގެ އެކައުންޓަށް 1.16 މިލިއަން ރުފިޔާ ޖަމާކޮށްފައިވާ ކަމަށްވެސް ބުނެފައިވެ އެވެ. މީގެއިތުރުން ޕީއެސްއެމް އަށް 2017 އިން 2024 ގެ ނިޔަލަށް ނަގުދު ފައިސާގެ ގޮތުގައި ލިބުނު 4.3 މިލިއަން ރުފިޔާ އެ ކުންފުނީގެ އެކައުންޓަށް ޖަމާކޮށްފައި ނުވާ ކަމަށްވެސް ބުނެފައިވެ އެވެ. އަދި އޭގެ ތެރެއިން 4.1 މިލިއަން ރުފިޔާއާ އެންމެފަހުން ހަވާލުވި ކަމަށް ރެކޯޑުތަކުން ދައްކަނީ ހަނީފު ކަމަށްވެސް ބުނެފައިވެ އެވެ.

އަދި އޮންލައިން ޓްރާންސްފާކޮށްގެން 1.2 މިލިއަން ރުފިޔާ ނަގާފައިވާއިރު އޭގެ ބޮޑުބައެއް ޖަމާކޮށްފައިވަނީ ފައިނޭންސް ޑިރެކްޓަރުގެ ދަރިއެއްގެ ނަމުގައި ބީއެމްއެލްގައި ހުޅުވަފައިވާ އެކައުންޓަކަށްކަން އޮޑިޓުގައި ފާހަގަކޮށްފައިވެ އެވެ. އޭނާއަށް 1.1 މިލިއަން ރުފިޔާ ލިބިފައިވެ އެވެ.