މަޖިލީހުގެ ރައީސް ކަމަށް ޕީއެންސީގެ ފަރާތުން އަބްދުއްރަހީމް, އެމްޑީޕީގެ ފަރާތުން ނާޒިލް!

ރައްޔިތުންގެ މަޖިލީހުގެ 20 ވަނަ ދައުރުގެ މަޖިލީހުގެ ރައީސް ކަމަށް ޕީއެންސީ އާއި އެމްޑީޕީގެ ފަރާތުން މެމްބަރުންގެ ނަން ތަޅުމަށް ހުށަހަޅައިފި އެވެ.

މިހާރު ކުރިޔަށްދާ މަޖިލީހުގެ ފުރަތަމަ ދައުރުގެ ޖަލްސާގައި މަޖިލީހުގެ ރައީސް އަކާއި ނައިބު ރައީސްއަކު އިންތިހާބުކުރުމަށް ވަނީ ހަމަޖެހިފައި އެވެ. އެގޮތުން މަޖިލީހުގެ ރައީސް ކަމަށް ޕީއެންސީގެ ފަރާތުން ހުށަހަޅާފައިވަނީ ފޮނަދޫ ދާއިރާގެ މެމްބަރު އަބްދުއްރަހީމްގެ ނަންފުޅެވެ. އަދި އެމްޑީޕީގެ ފަރާތުން ހުަށަހަޅާފައިވަނީ ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލްގެ ނަންފުޅެވެ.

މީގެ އިތުރުން މަޖިލީހުގެ ނައިބު ރައީސް ކަމަށްވެސް ދެ ޕާޓީގެ ފަރާތުންވެސް ވަނީ ނަންތައް ހުށަހަޅާފައި އެވެ. އެގޮތުން ޕީއެންސީގެ ފަރާތުން ހުށަހަޅާފައިވަނީ ދިއްގަރު ދާއިރާގެ މެމްބަރު އަހުމަދު ނާޒިމްގެ ނަންފުޅެވެ. އަދި އެމްޑީޕީގެ ފަރާތުން ހުށަހަޅާފައިވަނީ މަރަދޫ ދާއިރާގެ މެމްބަރު އަހުމަދު ދީދީގެ ނަންފުޅެވެ.

މި މެމްބަރުގެ މެދުގައި ސިއްރު ވޯޓެއް ކުޑައިރުކޮޅެއްގެ ތެރޭގައި ނެގުމަށް ވަނީ ހަމަޖެހިފައިއެވެ. މި ވޯޓުގައި 20 ވަނަ މަޖިލީހުގެ ހުވާ މިއަދު ހެނދުނު ކުރެއްވި 93 މެމްބަރުން ބައިވެރިވެވަޑައިގަންނަވާނެ އެވެ.

މަޖިލީހުގެ ރައީސް އާއި ނައިބު ރައީސް ހޮވުމަށް ބާއްވާ ޖަލްސާގެ ރިޔާސަތު ބަލަހައްޓަވަމުން ގެންދަވަނީ މީދޫ ދާއިރާގެ މެމްބަރު ޝިޔާމް އެވެ.

ވެރިކަން ކުރާ ޕީއެންސީއަކީ 20 ވަނަ މަޖިލީހުގެ ސުޕާމެޖޯރިޓީ އޮތް ޕާޓީއެވެ. އެގޮތުން އެޕާޓީގައި އެކަނިވެސް 75 މެމްބަރުން ތިއްބެވި އިރު މައިނޯރިޓީ ޕާޓީ އެމްޑީޕީގައި ތިއްބެވީ 12 މެމްބަރުންނެވެ.