ޣައްސާން ދެއްވީ ބޭރު ސިފައިންގެ ބާރެެއް ރާއްޖޭގައި ނޯންނާނެ ކަމުގެ 100 އިންސައްތަ ޔަގީންކަން!

ރާއްޖޭގައި ބޭރުގެ އެއްވެސް އަސްކަރީ ބާރެއްގެ ބާރު ނޯންނާނެ ކަމުގެ ޔަގީންކަން ދިފާއީ ވަޒީރު ޣައްސާން މައުމޫން މިއަދު ދެއްވައިފި އެވެ.

ރާއްޖޭގައި ތިބި އިންޑިއާ ސިފައިން ރާއްޖެއިން ބާލާފައިވާކަން ރަސްމީކޮށް ހާމަކުރުމަށާއި އެކަމުގެ ތަފްސީލް ދެއްވުމަށް މިއަދު ބޭއްވި ޚާއްސަ ނޫސްވެރިންގެ ބައްދަލުވުމުގައި ޣައްސާން މިފަދައިން ހާމަކުރެއްވީ ނޫސްވެރިއަކު ކުރެއްވި ސުވާލަކަށް ޖަވާބުދެއްވަމުންނެވެ.

އެގޮތުން ނޫސްވެރިއަކު ވަނީ ރާއްޖޭގައި ޗައިނާގެ އަސްކަރީ ބާރު އޮތް ކަމަށް އިދިކޮޅުން ބުނަމުންދާ ކަމަށާއި އެކަމަށް ސަރުކާރުން ދޭނެ ރައްދަކީ ކޮބައިތޯއާއި ބޭރުގެ ބާރެއްގެ ނޫފޫޒު ރާއްޖޭގައި ނޯންނާނެ ކަމުގެ ކިހާ ބޮޑު ގެރެންޓީއެއް ދެވޭނެތޯ ދިފާއީ ވަޒީރާއި ސުވާލުކުރައްވާފައި އެވެ.

އެސުވާލަކަށް ދިފާއީ ވަޒީރު ޣައްސާން ދެއްވީ ވަރަށް ކުރު ޖަވާބެކެވެ.

ރައީސް ޑރ މުހައްމަދު މުއިއްޒު މިދިޔަ އަހަރުގެ ނޮވެމްބަރު މަހުގެ 17 ވަނަ ދުވަހު ރާއްޖޭގެ ވެރިކަމާއި ހަވާލުވެވަޑައިގެން އެންމެ ފުރަތަމަވެސް ފެއްޓެވީ ރާއްޖޭގެ ދިފާއީ ބާރަށް އިންޑިއާއިން ހަދިޔާކުރި 2 ހެލިކޮޕްޓަރާއި ޑޯނިއާ މަތިންދާބޯޓު ދުއްވުމަށް ރާއްޖޭގައި ތިބި އިންޑިއާގެ އަސްކަރިއްޔާގެ ސިފައިން އަނބުރާ ފޮނުވާލުމުގެ މަސައްކަތެވެ. އެގޮތުން މިމަހުގެ 9 ވަނަ ދުވަހު ސަރުކާރުން ވަނީ ރާއްޖޭގައި ތިބި އިންޑިއާގެ 76 ސިފައިން އަނބުރާ އިންޑިއާއަށް ފޮނުވާލާފައި އެވެ.

އަދި މިވަގުތު ރާއްޖޭގެ އިސްކަރިއްޔާގައި ހެލިކޮޕްޓަރާއި ޑޮނިއާ ދުއްވާނެ ގާބިލުކަން ނެތުމުގެ ސަބަބުން ފޮނުވާލި އިންޑިއާ ސިފައިންގެ ބަދަލުގައި އެގައުމުގެ ސިވިލިއަނުން ރާއްޖެ ގެނެސްފައި އެވެ.

އިދިކޮޅުން ދަނީ ރައީސް މުއިއްޒު އާއި އިންޑިއާއާއި ޑޮމޮގްރަފީ ވާދަވެރިކަން އޮތް ޗައިނާއާއި އެކު ގާތް ގުޅުމެއް އޮތްކަމަށް ބުނެ ރާއްޖޭގައި ޗައިނާގެ އަސްކަރިއްޔާގެ ބާރު އޮތް ކަމަށް ތުހުމަތު ކުރަމުންނެވެ.