މިމަހުގެ 21 ގައި އީޔޫގެ ގިނަ ގައުމުތަކުން ފަލަސްތީނު ވަކިދައުލަތެއްގެ ގޮތުގައި ބަލައިގަންނަނީ!

ސްޕެއިންއާއި އަޔަލޭންޑް ހިމެނޭހެން އީޔޫގެ ބައެއް ގައުމުތަކުން ފަލަސްތީނު ވަކިދައުލަތެއްގެ ގޮތުގައި މިމަހުގެ ތެރޭގައި ބަލައިގަންނާނެ ކަމަށް އީޔޫއިން ބުނެފި އެވެ.

ސްޕެއިން، އަޔަލޭންޑް އަދި ޔޫރަޕިއަން ޔޫނިއަންގެ އެހެން މެމްބަރު ގައުމުތަކުން ފަލަސްތީނުގެ ދައުލަތެއް ބަލައިގަންނަން ނިންމާފައި ވަނީ މި މަހުގެ 21 ވަނަ ދުވަހު ކަމަށް އީޔޫގެ ހާރިޖީ ސިޔާސަތުގެ ވެރިޔާ ޖޯސެފް ބޮރެލް ވަނީ މިއަދު ވިދާޅުވެފައި އެވެ.

ސްޕެއިންގެ ބޮޑުވަޒީރު ޕެޑްރޯ ސަންޗޭޒް މިދިޔަ މާޗް މަހު ވިދާޅުވެފައިވަނީ ސްލޮވޭނިއާ އާއި މޯލްޓާއާއެކު ސްޕެއިނާއި އަޔަލޭންޑުން އިސްރާއީލާއެކު ފަލަސްތީނުގެ ދައުލަތެއް ބަލައިގަތުމުގެ ފުރަތަމަ ފިޔަވަޅެއް އެޅުމަށް އެއްބަސްވެފައިވާ ކަމަށާއި، ދެމެހެއްޓެނިވި ސުލްހައަށް ޓަކައި ދެ ދައުލަތުގެ ހައްލަކީ ކޮންމެހެން ބޭނުންތެރި ހައްލެއް ކަމަށް ދެކޭ ކަމަށެވެ.

ސްޕެއިންގެ ރޭޑިއޯ ސްޓޭޝަނެއް ކަމަށްވާ އާރްއެންއީގައި މެއި މަހުގެ 21 ވަނަ ދުވަހަކީ ސްޕެއިން، އަޔަލޭންޑް އަދި އީޔޫގެ އެހެން ގައުމުތަކުން ފަލަސްތީނުގެ ދައުލަތެއް ބަލައިގަންނާނެ ދުވަހެއްތޯ ސުވާލު ކުރުމުން ބޮރެލް ވަނީ އެކަމަށް އެއްބަސްވެވަޑައިގެންފައި އެވެ.

ސްޕެއިންގެ ޚާރިޖީ ވަޒީރު ހޯސޭ މެނުއަލް އަލްބަރޭސް މީގެ ކުރިން ވިދާޅުވެފައިވަނީ ފަލަސްތީނު ވަކި ދައުލަތެއްގެ ގޮތުގައި ބަލައިގަތުމާ މެދު ގޮތެއް ނިންމަވާފައިވާ ކަން ކަަށަވަރުކޮށްދީފައި އެވެ.

މިރޭ އީޔޫގެ ގައުމުތަކުގެ ވޯޓާއި އެކު އދ ގައި ފަލަސްތީނަށް ފުރިހަމަ މެމްބަރުކަން ދިނުމަށް އދ ގެ އާންމު މަޖިލީހުގައި ވަނީ ގަރާރެއްވެސް ފާސްކޮށްފައި އެވެ.