![މިފަހަރުވެސް ބަޔާން މިއުނިކް އަތްދަށުވެ، އާސެނަލް ޗެންޕިްއަންސް ލީގުން ކަޓައިފި](/_next/image?url=%2Fsikundi-content%2Fuploads%2F2024%2F4%2FIMG_20240418_033755.jpg&w=3840&q=75)
މިފަހަރުވެސް ބަޔާން މިއުނިކް އަތްދަށުވެ، އާސެނަލް ޗެންޕިްއަންސް ލީގުން ކަޓައިފި
# ބޭރު ދުނިޔޭގެ ކުޅިވަރު# ޔުއެފާ ޗެމްޕިއަންސްލީގު# އާސެނަލް # ބަޔާން މިއުނިކްބަޔާން މިއުނިކްގެ މިޑްފީލްޑަރު ޖޯޝުއާ ކިމިޗް އާސެނަލް ކޮޅަށް ލަނޑުޖެހުމަށް ފަހު އުފާފާޅުކުރަނީ
ޔޫއެފާ ޗެމްޕިއަންސްލީގުގެ ކުއާޓާ ފައިނަލު ދެވަނަ ލެގުގައި ބުދަދުވަހުގެ ރޭ އަމިއްލަ ދަނޑުގައި 1-0 ގެ ނަތީޖާއަކުން އާސެނަލް ބަލިކޮށް ބަޔާން މިއުނިކުން މުބާރާތްގެ ސެމީ ފައިނަލުން ޖާގަ ހޯދައިފި އެވެ.
![ގޮސިޔާ](/_next/image?url=%2Fsikundi-content%2Fuploads%2F2024%2F1%2Fgosiya-ads.gif&w=3840&q=75)
މިދެޓީމު އާސެނަލްގެ ދަނޑުގައި ކުޅުނު ފުރަތަމަ ލެގުގެ މެޗު 2-2 ގެ ނަތީޖާއަކުން ދެޓީމް އެއްވަރުވެފައި ވާއިރު، މިނަތީޖާއާއެކު ބަޔާން މިއުނިކަށް ސެމީ ފައިނަލުން ޖާގަ ލިބުނީ 3-2 ގެ އެގްރިގޭޓް ނަތީޖާއަކުންނެވެ.
މިއީ ޗެންޕިްއަންސް ލީގް ނޮކްއައުޓް ސްޓޭޖުގައި 2005 ވަނަ އަހަރުގެ ފަހުން މި ދެޓީމު ވާދަކުރި 6 ވަނަ ފަހަރެވެ. އަދި މި 6 ފަހަރު ވެސް ބަޔާން މިއުނިކުން ވަނީ އާސެނަލްގެ މައްޗަށް ކުރި ހޯދާފައެވެ.
މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. އެގޮތުން މެޗުގެ 24 ވަނަ މިނެޓުގައި ބަޔާން މިއުނިކްގެ ޒުވާން މިޑްފީލްޑަރު ޖަމާލް މުސިއާލާއަށް ލިބުނު ހުސް ފުރުސަތެއްގައި އޭނާ ފޮނުވާލި ހަމަލާ އާސެނަލްގެ ކީޕަރު ދިފާއުކުރިއިރު، މެޗުގެ 30 ވަނަ މިނެޓުގައި އާސެނަލްގެ ކެޕްޓަން މާޓިން އޮޑެގާޑް އަށް ވަނީ މެޗުގެ ލީޑު ނެގުމަށް ވަރަށް ހުސް ފުރުސަތެއް ލިބި ބޭނުން ނުކުރެވިފައެވެ.
މީގެ އިތުރުން ވެސް މިހާފުގައި މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.
މެޗުގެ ދެވަަނަ ހާފުގައި ބަޔާން މިއުނިކުން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން ދެވަނަ ހާފުގެ 63 ވަނަ މިނެޓުގައި އެޓީމުން ވަނީ ލަނޑެއް ކާމިޔާބުކޮށް މެޗުގެ ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ ތަޖުރިބާކާރު މިޑްފިލްޑަރު ޖޯޝުއާ ކިމިޗް އެވެ. މިއީ އެޓީމުގެ ޕޯޗުގަލް ޑިފެންޑަރު ރަފައެލް ގެރޭރޯ ގޯލު ކުރިމައްޗަށް ހުރަސްކޮށްދިން ބޯޅައެއް ބޮލުން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.
މީގެ އިތުރުން ވެސް މިހާފުގައި ބަޔާން މިއުނިކުން ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗު ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ބަޔާން މިއުނިކް ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ބަޔާންގެ ހަމައެކަނި ލަނޑު ކާމިޔާބުކޮށްދިން ޖޯޝުއާ ކިމިޗް އެވެ.
މުބާރާތުގެ ސެމީ ފައިނަލުގެ ފުރަތަަމަ ލެގުގައި މެއި މަހުގެ އެއްވަނަ ދުވަހުގެ އަމިއްލަ ދަނޑުގައި ބަޔާން މިއުނިކް ނުކުންނާނީ ރެއާލް މެޑްރިޑާއި ދެކޮޅަށެވެ. އަދި މިދެޓީމުގެ މެދުގައި ކުޅެވޭ ސެމީފައިނަލްގެ ދެވަނަ ލެގު ރެއާލްގެ ދަނޑުގައި ކުޅުމަށް ހަމަޖެހިފައިވަނީ މެއި މަހުގެ 8 ވަނަ ދުވަހުގެ ރޭ އެވެ.