ރައީސްގެ ސިޔާސަތަކީ ވަކި ފިކުރަކަށް ނުބަލައި ޚިދުމަތް ފޯރުކޮށްދިނުން - ޕީއެންސީ
އަލްފާ އަލީ
4/15/2024, 11:21:43 AM
--
ރައީސްގެ ސިޔާސަތަކީ ވަކި ފިކުރަކަށް ނުބަލައި ރައްޔިތުންނަށް ހިދުމަތް ފޯރުކޮށްދިނުން ކަމަށް ސަރުކާރު ހިންގާ ކޮންގްރެސް ކޯލިޝަނުން ބުނެފި އެވެ.
އެ ކޯލިޝަނުން މިހެން ބުނެފައިވަނީ, ހއ. ދިއްދޫގައި ބޭއްވި ކެމްޕެއިން ހަރަކާތެއްގައި އެ ރަށުގެ ފެނަކައިގެ އެސިސްޓެންޓް މެނޭޖަރު ދެއްކި ވާހަކަތައް ކުށްވެރިކޮށް ނެރުނު ބަޔާނެއްގައެވެ.
"ކަރަންޓު ހަމައެކަނި ދޫކުރަންވީ ޕާޓީގެ ގެތަކަށް" ކަމަށް އޭނާ ވިދާޅުވެފައިވާތީ އެކަން އެ ޕާޓީން ވަނީ ހަރުކަށި އިބާރާތުން ކުށްވެރިކޮށްފައެވެ.
ކޮންގްރެސް ކޯލިޝަނުން ބުނެފައިވަނީ, ދިއްދޫ ފެނަކައިގެ އެސިސްޓެންޓް މެނޭޖަރު ދެއްކި ވާހަކަތަކަކީ ރައީސް ޑރ. މުޢިއްޒު އަދި އެ ޕާޓީގެވެސް ސިޔާސަތެއް ނޫން ކަމަށެވެ. އެމަނިކުފާނުގެ ސިޔާސަތަކީ ވަކި ފިކުރަކަށް ނުބަލައި، ރައްޔިތުން ފޯރުކޮށްދޭންޖެހޭ ޚިދުމަތްތައް ފޯރުކޮށްދިނުންކަމަށް ވެސް ކޮންގްރެސް ޕާޓީން ބުންޏެވެ.