ހުރިހާ ސިޔާސީ ލީޑަރުންވެސް އެކުގައި މަސައްކަތްކުރުމަށް ރައީސް ގޮވާލައްވައިފި

ހިޔާލުތަފާތުވުންތައް ދޫކޮށް ހުރިހާ ސިޔާސީ ލީޑަރުންވެސް އެކުގައި މަސައްކަތްކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ގޮވާލައްވައިފި އެވެ.

އެމަނިކުފާނު މިހެން ވިދާޅުވީ, އިއްޔެ ކުރިއަށްގެންދެވުނު 20ވަނަ ރައްޔިތުންގެ މަޖިލިސް އިންތިހާބުގައި ސަރުކާރު ހިންގާ ޕީއެންސީއަށް ލިބުނު ކާމިޔާބީ ފާހަގަކުރުމަށް މިރޭ އާޓިފިޝަލް ބީޗު ސަރަހައްދުގައި ކުރިއަށްގެންދެވުނު ޖަލްސާގައި ފާހަކަފުޅު ދައްކަވަމުންނެވެ.

ރައީސް މުއިއްޒު ވިދާޅުވީ, އިންތިހާބު ނިމިއްޖެ ކަމަށާއި ހިޔާލުތަފާތުވުންތައް ދޫކޮށްލައްވައި ހުރިހާ ސިޔާސީ ވެރިންވެސް އެކުގައި މިގައުމުތަރައްގީކޮށް ކުރިއެރުވުމަށް މަސައްކަތް ކުރަން ޖެހޭ ކަމަށެވެ.

20ވަނަ ރައްޔިތުންގެ މަޖިލިސް އިންތިހާބުގެ ވަގުތީ ނަތީޖާއަށް ބަލާއިރު ޕީއެންސީން ވަނީ 66 ގޮނޑި ކާމިޔާބުކޮށްފައެވެ. އިދިކޮޅު އެމްޑީޕީއަށް ކާމިޔާބުކުރެވުނީ 12 ގޮނޑި އެވެ.