ފުރިހަމަ މުއުމިނަކު، ރަމަޟާން މަސް ނިމުނަސް ހެޔޮޢަމަލު ކުރުމަކަށް އަލްވަދާޢު ނުކިޔާނެ - ޚުތުބާ

މުއުމިނުންނަކީ، ވަކި މަހެއްގައި، ވަކި މޫސުމެއްގައި، ﷲ އަށް އަޅުކަން ކުރަން ޖެހޭ ބައެއްނޫން ކަމަށާއި، އެއީ މުޅި ހަޔާތުގައިވެސް މާތް ﷲ އަށް އަޅުކަން ކުރަން ޖެހޭ ބައެއް ކަމަށް މިއަދުގެ ހުކުރު ޚުތުބާގައި ބުނެފި އެވެ.

މިއަދުގެ ހުކުރު ޚުތުބާ ހާއްސަކޮށްފައިވާ މައުޟޫއަކީ "ރަމަޟާން މަހަށްފަހު ހެޔޮޢަމަލު ކުރުންމަތީ ދެމިތިބޭށެވެ" އެވެ.

ޚުތުބާގައި ބުނެފައިވަނީ ރަމަޟާން މަސް އަހުރެމެންނާ އަލްވަދާޢު ކިޔަނީ ކަމަށާއި، އެހެންނަމަވެސް ފުރިހަމަ މުއުމިނަކު ދުވަހަކުވެސް ހެޔޮ އަމަލުކުރުމަށް އަލްވަދާއު ނުކިޔާނެ ކަމަށެވެ.

މަރު ބައްދަލުކޮށްފުމަށް ދާންދެން އަހަރުމެންނަށް އޮތީ ހެޔޮއަމަލު ކުރުންމަތީ ދެމި ތިބުމެވެ.

މުސްލިމަކު ހެޔޮ ޢަމަލެއް ކުރުމަށް ފަހު، އެންމެ މުހިންމު ކަމަކީ، އެ ޢަމަލު ޤަބޫލުކުރައްވާތޯ ދެންނެވުމާއި، އެ ޢަމަލުކުރުންމަތީ ދެމިހުރުމުގެ ތައުފީޤަށް އެދި ދުޢާ ދެންނެވުން ކަމަށް ޚުތުބާގައި ބުނެފައިވެއެވެ.

މި ރަމަޟާން މަސް އަހަރުމެންނާ ވަކިވެގެން ދަނީ ޝައްވާލް މަހުގެ ހަ ރޯދައިގެ ނިޢުމަތަށް ފަހިކޮށްދީފައި ކަމަށް ޚުތުބާގައި ބުނެފައިވެއެވެ. ދީލަތިވަންތަ ﷲ ދެއްވި މި ނިޢުމަތުގެ ބޭނުން ހިފައި މުޅި އަހަރު ދުވަހު ރޯދަހިފިކަމުގެ ޘަވާބު ލިބިގަތުމަށް ހުތުބާގައި ވަނީ ނަސޭހަތްތެރިވެފައެވެ.

ކުރިން ކުރެވިފައިވާ ހެޔޮޢަމަލުތަކަކީ، ގިނަގުނަ ޢަމަލުތަކެއް ކަމުގައި، އަހަރެމެން ދެކިގެންނުވާނެއެވެ. އެހެނީ ކުރެވުނު ހެޔޮ ޢަމަލުތަކަށްޓަކާ ބޮޑާވެ، އެއީ މާގިނަ ހެޔޮ ޢަމަލުތަކެއް ކަމުގައި ދެކޭނަމަ، އެ ޢަމަލުތައް ބާޠިލުވެދާނެ ކަމަށް ޚުތުބާގައިވަނީ ބުނެފައެވެ.

އެހެންކަމުން އަހަރުމެންގެ އަބަދުވެސް މަސައްކަތް ކުރަންވީ ހެޔޮއަމަލުކުރުން މަތީ މުޅި ހަޔާތް ހޭދަކޮށް ސުވަރުގެއަކީ އަހަރުމެންގެ މަންޒިލްކަމުގައި ހެދުމަށެވެ.