ތިލަމާލެ ބްރިޖް މަސައްކަތަށް ބަންދުކޮށްފައިވާ ކަނޑުއޮޅިތަކުން ދަތުރުނުކުރުމަށް އިލްތިމާސްކޮށްފި

ތިލަމާލެ ބްރިޖް މަސައްކަތަށް ބަންދުކޮށްފައިވާ ކަނޑުއޮޅިތަކުން ދަތުރުނުކުރުމަށް މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ އިން އިލްތިމާސްކޮށްފިއެވެ.

އެ މިނިސްޓްރީން ވިދާޅުވީ, ތިލަމާލެ ބްރިޖު މަސައްކަޔް ކުރަމުންދާ ސަރަހައްދުގައި ހިމެނޭ މާލެ-ވިލިމާލެ އަދި ވިލިމާލެ-ގުޅިފަޅު ކަނޑުއޮޅިތަކަކީ ބަންދުކުރެވިފައިވާ ކަނޑުއޮޅިތައް ކަމަށްވުމުން, ރައްކާތެރިކަމަށްޓަކައި މި ދެ ކަނޑުއޮޅިން ކަނޑުގައި ދުއްވާ އުޅަނދު ނުދުއްވުމަށް ނަސޭހަތްތެރިވާ ކަަމަށެވެ.

މި ކަނޑުއޮޅިތަކުން ދަތުރުކުރާ މައްސަލަ ބޮޑުވެ ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން މިމަހުގެ 3 ވަނަ ދުވަހު ވަނީ އެ ކަނޑުއޮޅިން ދަތުރުކުރުން މަނާކޮށްފައެވެ.

އެ ވުޒާރާއިން ނެރުނު އިއުލާނުގައި ވަނީ, އެ ކަނޑުއޮޅިތަކުން ކަނޑުގައި ދުއްވާ އުޅަނދުފަހަރު ދުއްވުމަކީ ތަކުރާރުކޮށް މަނާކޮށްފައިވާ ކަމެއް ކަމަށް ވީނަމަވެސް އަދިވެސް އެ ކަނޑުއޮޅިން އުޅަނދުފަހަރު ދަތުރުކުރަމުންދާކަން ފާހަގަކުރައްވާފައެވެ. ހާއްސަކޮށް ރިޒޯޓްތަކުގެ ސްޕޯޓްބޯޓުފަހަރު މި ދެކަނޑުއޮޅި ބޭނުންކުރަމުންދާ ކަން ފާހަގަކުރެވިފައިވާ ކަމަށްވެސް އެވުޒާރާއިން ބުނެފައިވެއެވެ.

މާލެ-ތިލަފުށި ލިންކު މަޝްރޫޢުއާ ގުޅޭ ގިނަ މަސައްކަތްތަކަށް ބާޖު އަދި ސެލްފް އެލެވޭޓަޑް ޕްލެޓްފޯމްތައް ބޭނުންކޮށްގެން އެ ދެ ކަނޑުއޮޅީގައި މަސައްކަތް ކުރަމުންދާ ކަމަށާއި, މި ދެ ކަނޑުއޮޅީގައިވެސް ނަގިލި އެޅުމަށް ގިނަ އަދަދެއްގެ ބޮއިތައް އަޅާފައި އޮތުމުން މި ދެކަނޑުއޮޅި ބޭނުންކޮށްގެން ދަތުރު ކުރަމުންދާ އާންމު އުޅަނދުތަކަށް ނުރައްކާތެރި ހާދިސާއެއް ދިމާވުމަކީ އެކަށީގެންވާ ކަމެއް ކަމަށް އެވުޒާރާއިން ނެރުނު އިއުލާނުގައި ފާހަގަކޮށްފައިވެއެވެ.