މާލެއާއި ވިލިމާލޭގެ މަގުތައް ޒަމާނީ ފެންވަރަށް ތަރައްޤީކުރުމުގެ މަޝްރޫއުގެ ދަށުން މަގުތަކުގެ ސާވޭ މަސައްކަތް ނިންމާލައިފި

މާލެއާއި ވިލިމާލޭގެ މަގުތައް ޒަމާނީ ފެންވަރަށް ތަރައްޤީކުރުމުގެ މަޝްރޫއުގެ ދަށުން މަގުމަތީގެ ހާލަތު ދެނެގަތުމުގެ މަސައްކަތް ނިންމާލައިފި އެވެ.

ބިނާރާބެހޭ ވުޒާރާއިން ބުނީ މާލެ އާއި ވިލިމާލޭގެ މަގުތައް އަލުން ހެދުމަށް ރައީސުލްޖުމްހޫރިއްޔާ ޑޮކްޓަރ މުޙަންމަދު މުޢިއްޒު ވެވަޑައިގެންފައިވާ މުހިންމު ވަޢުދުގެ ދަށުން، މި މަޝްރޫޢުގެ ޢަމަލީ މަސައްކަތް މިހާރު ފަށާފައިވާ ކަމަށެވެ.

އެގޮތުން މި މަޝްރޫއުއަށް މުހިންމު ފަރާތްތަކާއެކު ސިލްސިލާކޮށް ބޭއްވި ބައްދަލުވުންތަކަށްފަހު، ޗައިނާ ސަރުކާރުން އެކުލަވާލި އެކްސްޕާޓް ޓީމުން މާލެ އާއި ވިލިމާލޭގެ މަގުމަތީގެ ހާލަތު ދެނެގަތުމުގެ މަސައްކަތް އިއްޔެ ނިންމާލާފައި އެވެ. އެމަސައްކަތް ފެށީ މިމަހުގެ 5 ވަނަ ދުވަހު އެވެ.

މި މަސައްކަތުގެ ތެރެއިން އެ ޓީމުން ވަނީ މިނިސްޓްރީގެ ޓެކްނިކަލް ޓީމާ އެކު މާލެ އާއި ވިލިމާލެ މަގުގެ ފީސިބިލިޓީ ސްޓަޑީގެ މަސައްކަތް ކޮށްފަ އެވެ. އެގޮތުން ދެން މި މަޝްރޫއުގެ ދަށުން ކުރިޔަށްދާނީ މަޝްރޫއުގެ ޑިޒައިނިން މަރުހަލާ އެވެ.

ބިނާރާ ބެހޭ ވުޒާރާއިން ބުނީ މި މަޝްރޫޢުގެ މަޤްޞަދަކީ މަގުތަކުގެ ޙާލަތު ގޯސްވަމުންދާ މިންވަރު ޒަމާނީ ފެންވަރަށް އަޕްގްރޭޑްކޮށް ރައްޔިތުންނަށް ބޮޑެތި ފައިދާތަކެއް ހޯދައިދިނުން ކަމަށެވެ.

ޒަމާނީ ފެންވަރަކަށް މާލެއާއި ވިލިމާލޭގެ މަގުތައް ތަރައްޤީކުރުމަށް ޗައިނާ ސަރުކާރާ ދިވެހި ސަރުކާރާ ދެމެދު އެއްބަސްވުމެއްގައި ސޮއިކޮށްފައިވަނީ ރައީސުލްޖުމްހޫރިއްޔާ މިއަހަރުގެ ޖެނުއަރީ މަހުގެ ތެރޭގައި ޗައިނާއަށް ކުރެއްވި ރަސްމީ ދަތުރުފުޅުގެ ތެރެއިންނެވެ.