ކުޅުދުއްފުށީގައި ހިނގި އަލިފާނުގެ ހާދިސާއެއްގައި ގެއެއް އަނދައި ހުލިވެއްޖެ

ކުޅުދުއްފުށި ސިޓީގައި ހިނގި އަލިފާނުގެ ހާދިސާއެއްގައި ގެއެއް އަނދައި ހުލިވެއްޖެއެެވެ.

އެމްއެންޑީއެފުން ވިދާޅުވީ, ކުޅުދުއްފުށި ސިޓީ "ސިގްނަލް" ގޭގައި އަލިފާނުގެ ހާދިސާއެއް ހިނގައިގެން އުޅޭ ކަމުގެ މައުލޫމާތު މިއަދު މެންދުރު 13:17 އެހާކަންހާއިރު ލިބިފައިވާ ކަމަށެވެ.

މިހާދިސާގެ މައުލޫމާތު އެމްއެންޑީއެފް ނޮދަން އޭރިއާ ކޮމާންޑް، ހދ.ކުޅުދުއްފުށީ ފަޔަރ ސްޓޭޝަނަށް ލިބުމާއެކު، އެ ފަޔަރ ސްޓޭޝަންގެ ފަޔަރފައިޓަރުން ވަނީ އެ ސަރަހައްދަށް ގޮސް ކުރި މަސައްކަތުން އަލިފާން ނިއްވާލެވިފައިވަނީ 14:12 ހާއިރު ކަމަށްވެސް އެމްއެންޑިއެފުން ވިދާޅުވިއެވެ.

މިހާދިސާގައި އެއްވެސް މީހަކަށް އަނިޔާއެއް ލިބިފައި ނުވި ނަމަވެސް އެގެއަށް ވަނީ ބޮޑެތި ގެއްލުންތަކެއް ލިބިފައި ކަމަށް އެމްއެންޑީއެފުން ވިދާޅުވިއެވެ.

މިކަމާ ގުޅިގެން ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީން ވިދާލުވީ, ކުޅުދުއްފުށި ސިޓީ ސިގްނަލް ގޭގައި މިއަދު ހިނގި އަލިފާނުގެ ހާދިސާގައި އެގޭގައި މީހުންނަށް ދިރިނޫޅެވޭ ވަރަށް ގެއްލުން ލިބިފައިވާތީ, އެގޭގައި ދިރިއުޅުނު އާއިލާއަށް ކުޅުދުއްފުށީ ސިޓީ ކައުންސިލާ ގުޅިގެން އެހީތެރިކަން ފޯރުކޮށްދެމުންދާ ކަމަށެވެ.