ހުޅުމާލޭގައި ޖަހާފައި ހުރި ކެމްޕެއިން ޕޯސްޓަރުތަކަކަށް ގެއްލުންދީފި
އަހުމަދު ޝުރާއު
3/18/2024, 5:16:05 PM
ހުޅުމާލޭގައި ޖަހާފައި ހުރި ކެމްޕެއިން ޕޯސްޓަރަކަށް ބަޔަކު ގެއްލުންދިނުން
ކުރިޔަށް އޮތް ރައްޔިތުންގެ މަޖިލީހުގެ އިންތިހާބުގައި ވާދަކުރާ ކެނޑިޑޭޓެއްގެ ކެމްޕެއިން ޕޯސްޓަރަކަށް ބަޔަކު ގެއްލުންދީފި އެވެ.
ގެއްލުންދީފައިވަނީ ހުޅުމާލެ ހުޅުމާލޭ ދެކުނު ދާއިރާއަށް އެމްޑީޕީގެ ފަރާތުން ވާދަކުރައްވާ އަހުމަދު ޝަމްހީދުއަށް ކެމްޕެއިން ކުރުމަށް ހުޅުމާލެ ދެކުނު ދާއިރާގެ ބައެއް ސަރަހައްދުތަކުގައި ޖަހާފައި ހުރި ޕޯސްޓަރުތަކަކަށެވެ.
މި ކަމަމާއި ގުޅިގެން އެމްޑީޕީއިން މިރޭ ބުނީ ހުޅުމާލެ ދެކުނު ދާއިރާއަށް ވާދަ ކުރައްވާ މިޕާޓީގެ މަޖިލިސް20 ކެންޑިޑޭޓް ޑރ. ޝަމްހީދު ގެ ކެންޕެއިންނަށް ހުޅުމާލޭގައި ހަރުކޮށްފައިވާ ކެންވަސްތަކަށް ބަޔަކު ގެއްލުން ދީފައިވާ ކަމަށާއި މި ފިނޑި އަމަލު އެޕާޓީ އިން ކުށްވެރި ކުރާ ކަމެއް ކަމަށެވެ.
އަދި ހުރިހާ ކެންޑިޑޭޓުންނަށްވެސް އަމާން ކަމާއި އެކު ކެންޕެއިން ކުރުމުގެ ހަމަހަމަ ފުރުޞަތު އޮންނަންވާނެކަމަށް އެޕާޓީއިން ވަނީ ހާމަކޮށްފައި އެވެ.
ދާދި ފަހުން ބަޔަކު ވަނީ ޑިމޮކްރެޓްސްގެ ޓިކެޓުގައި މަޖިލީހަށް ވާދަކުރައްވާ ހަސަން ލަތީފުގެ ކެންވަސްތަކަކަށްވެސް ގެއްލުންދީފައި އެވެ.